Uo Faifeautalai

Na talosagaina e Alex ia lana uo o Jake la te taaalo i lona fale i le Aso Toonai. Na la fiafia i taavale tutuu ae vaaia loa e Jake se ata o loo tautau i luga o le puipui.

“O ai le la?” Na ia fesili atu ai, a o tusi lona lima i le ata o Thomas S. Monson.

“O Peresitene Monson le la,” sa fai atu ai Alex.

E lei faia se tala a Jake.

“E te iloa, o le perofeta o la matou Ekalesia,” sa fai atu ai Alex.

Sa foliga matamuli Jake. “Matou te le’o toe o i le lotu,” na ia fai atu ai.

“Aisea na tou le toe o ai?” Na fesili atu ai Alex.

Na faamimigi tauau o Jake. “Ou te le iloa.”

“E te manao ta te o i le Aso Sa?” Sa fesili atu ai Alex. E mafai ona ta o faatasi i le Peraimeri. E ese le lelei o lo’u faiaoga.”

Sa susulu mai foliga o Jake. “Sei ou fesili i lou tina, ae ou te iloa o le a ia faataga au ou te alu,” sa fai atu ai Jake.

I le taimi o le aiga o le aoauli, na fesili ai Alex i lona tina, “E mafai ona ma o ma Jake i le Peraimeri taeao?”

“E tatau ona ta fesili i le tina o Jake,” sa fai atu ai Tina. “Afai e fai mai o ia ioe, ona mafai lea ona ia alu.”

Mulimuli ane i lena aso, sa sau le tina o Jake e ave o ia.

“E mafai ona ma o ma Jake i le Peraimeri taeao?” Sa fesili atu ai Alex.

“E mafai, Tina?” Sa fai atu ai Jake. “Fai mai Alex e ese le manaia o le Peraimeri. E fai a latou tala, usu pese, ma aoao e uiga i tagata i totonu o tusitusiga paia.”

“Ou te le iloa,” le tala a le tina o Jake, ma foliga le mautonu. “Ua leva tatou te le o toe o i se lotu.”

“Faamolemole, Tina,” sa fai atu ai Jake. “Ou te fia alu.”

“E talia fiafia Jake matou te o faatasi,” sa fai atu ai le tina o Alex.

“E te mautinoa e te fia alu?” sa fesili atu ai le tina o Jake.

“Ou te mautinoa!” Sa fai atu ai Jake.

“Ou te manatu la e le afaina,” sa fai atu ai le tina o Jake.

Sa opo faavave e Jake lona tina. “Faafetai,” sa ia fai atu ai.

I le taeao o le Aso Sa, na piki ai e le aiga o Alex ia Jake. Sa ia ofuina ona ofu o le Aso Sa. Ina ua uma le sauniga faamanatuga sa o tama i le Peraimeri. Ina ua la taunuu i le vasega, na fai mai le faiaoga, “Ua matou fiafia lava e faatasi ma oe, Jake.”

Ina ua tuua le lotu, na ave e le aiga o Alex Jake i le fale.

“Faafetai mo le aveina o au i le lotu faatasi ma outou,” sa fai atu ai Jake.

Na ataata atu le tina o Alex ia te ia. “E le afaina, Jake. Matou te faamoemoe tatou te toe o foi,” sa ia fai atu ai.

I le aiga o lena afiafi, na fesili atu Alex, “E mafai ona ou valaaulia Jake tatou te o i le lotu i le Aso Sa lea?”

Na lue atu le ulu o Tina. “O le a ou mulimuli i lau faataitaiga ma valaaulia foi lona tina tatou te o faatasi,” na ia fai atu ai.

“O oe o se faifeautalai lelei, Alex,” sa fai atu ai Tama.

Sa tei Alex. “Sa na o na avea lava o au ma se uo,” sa ia fai atu ai.

“O le mea lena e ta’u o se faifeautalai,” sa fai atu ai Tina, “o se uo.”