Tibwauakin Ootau

Bon te bong ae e aki tataneiai te aba ibukin California Maiaki, USA, ma te baa, te iti, te karau ae bwaka, ao te kabuebue ae korakora. I kaantaningaa te motirawa ao matakuakinan te tamnei inanon mweengau ae eea kaon. Ma ngke I a tekateka, I namakinna bwa N na riai n wetea raoraou ae Sherrill.

Ngke I a weteia, I ataia bwa e a tia ni mate ana iti man te ingabong anne. E raraoma bwa kanana ake a mwaitoro a nang aki mwaitoro ao ana miriki a na buakaka, ai ngaia are ti a kamwainga kanan neienne nakon au aitibwaoki.

N te bong are imwiina ao Ngai ma Sherrill ti tei imatan mweengana. Ni kabane auti ake a mena n iteran te kawai are e mena iai a bon bane n rotongitong, ao auti ake n iteran te kawai iai aia iti. Teuana te auti ae onoti ae e a kaitika au taratara. Ni kaaitaraira raoi n iteran te kawai, te auti e a raneanea ma te oota ngkai aomata a tekateka ni kamanna n taetae ni kawai, ngarengare, ao ni kukurei ibon irouia.

Inanon boong ake imwiina, I aki kona ni katoka iangoan te bwai are I a tia n nooria. Te kaokoro e bon rangi n otara: te rotongitongi n iteran te kawai are teuana ao te taura aika a rangi n oota n iterana are teuana; aomata a tekateka inanon te roo ao naake irarikiia a kimwareirei n te oota.

Te tamnei e a kamimiiai bwa mwaitira au tai n ai aroia aomata ake n iteran te kawai—ni kimwareirei n ootan te euangkerio ao tabeman a tekateka inanon te roo. I iangoia ngke I tekateka n te kaman ma tabeman raou man te ekaretia, ni kimwareirei n ootan te euangkerio n aki tibwaia ma tabeman.

Ni kabane aomata n te aonaaba a bungiaki ma te oota—Ootan Kristo. Ngkai membwa n te Ekaretia, iai iroura te karineaki n reitaki nakon te oota anne man tibwauakin te euangkerio. Te Tia Kamaiu e anga reirei:

“Nooria, a aki kaura te taura te bae aomata ma ni kakia iaan te bwaketi? Tiaki, ma a katoka iaoni nnena, ao e anga ootana nakoia ake a mena n te bata;

Mangaia are kaotai ami taura imataia te botanoamata aio, bwa a na norii ami mwakuri aika a raraoi ma ni karaoiroa Tamami are i karawa iai (3 Nibwaai 12:16).

Ngkai membwa n te Ekaretia, iai tabera n tibwauai ara koaua ibukin Kristo ma tabeman—ai moaraara riki te koraki ake a tuai ni karekea te euangkerio. Imwiin te taneiai aio, I kamatoaai bwa N na riki bwa te aekaki n aomata are e na kona n onimakinna te Tama are i Karawa n tibwauaa te euangkerio ma raou ake a tuai ni karekea te euangkerio e ngae ngke tiaki te bwai ae kamwengaraoi karaoakina.