Taabo aika Tabu Inanon Maium
Te botoniango ibukin te miutuo n te ririki aei e kaoiko bwa kona katoka tarakim n rikim bwa mwakoron te aonaaba ma ko riai ni kabanea am taratara iaon abanuean te Atua. N aron Beretitenti Boyd K. Packer, te Beretitenti n te Kooram n Abotoro are Tengaun ma Uoman, e a tia n anga reirei, bwa ti maiu n aia tabo kairiribai.1 “Teei ngkami n taabo aika tabu” bon te kiing nakon te kamaiuaki.
Te botoniango aio e kaoi titiraki aika kakaawaki: Terana te tabo ae e tabu? E mena iaara te tabo ae tabu? Ti na kangaa n tei inanon taabo aika tabu? Ti na kangaara ni karaoi taabo aika ti maekanii bwa a na tabu riki? Ngkai ko kakaaei kaeka nakon titiraki aikai, am kaeka e na kaira am reitaki, am rinerine n am waaki ni kakukurei, ao aron tein kunnikaim, taeka ake ko rinei, ao aron am mwakuri.
Ko a tia ni katabeko nakon kakorakoran mweengam ao am utu. Kataia ni karaoa mweengam bwa te tabo ae tabu, ae e na onrake ma Tamnein te Uea. Ko kona ni boutokaa te tataro n utu ao kamatebwaian te boki ae tabu.
Am ruu e kona n riki bwa te abo ae tabu are e na kaoa te Tamnei. Ngkana te burabeti e na noora am ruu, e kona n taraia bwa te tabo ae tabu? Ko taraa am ruu bwa te tabo ae tabu?
Ti kona n tei n taabo aika tabu ngkana ti nako n taromauri. Booki aika tabu a nga reirei bwa uoote ao titeiki i Tion bon taabo aika tabu aika a na “riki bwa te ootanga, ao te tabo ni kamanomano man te angibuaka” (D&C 115:6).
Te kabanea n tabo ae tabu iaon te aba bon te tembora. Beretitenti Thomas S. Monson e a tia n taku: “Raoraou aika kairake aika a mena ami ririki n te roro ae tebwi tabun, karekea ami kouru bwa kam na nakon te tembora. Tai karaoi bwaai ake a na tukiko man rinnakom ni mataroana ao man anai kakabwaia aika tabu ao akea tokiia ikekei. I kamoamoai ngkami ake kam a tia n nakon te tembora n taai nako ni karaoi bwabetito ibukiia maate.”2 Kam na tau n taainako ni karekea te beba ni kariaia nakon te tembora, e ngae ngkana te tembora e raroa nako.
N tabo nako are ko mena iai are e mena iai te Tamnei e kona n riki bwa te tabo ae tabu. Beretitenti Harold B. Lee (1899–1973) e anga reirei bwa taabo aika tabu iai riki rekereke ma e kangaa temanna ni maiu nakon ae e ngaara ana tabo temanna ni maeka.3 Ngkana e tau maium ni maeka n taainako ma te Tamnei ae Raoiroi, ngkanne ko tei n te tabo ae tabu.
Ni kabane tembora iai te koroboki ae “Mimitong nakon te Uea.” Ukoukoria n taainako n tei n taabo aika tabu. Ngkai ko maiuakin kainibabaire, tataro ni katoabong, ao wareki booki aika tabu—ni kaneti riki ma ana Boki Moomon—ko na namakina ana iraorao te Tamnei ae Raoiroi. Te Uea n ti Ngaia e berita nakoim, “Bwa e koaua ae I taku nakoim, bwa bwaai aika korakora a tataningaiko” (D&C 45:62). I booraoi ao ni kakoaua bwa e bon koaua aio!