Teimatoa Ni Kataneiai

“I aki manga tangiria ni kan reirei iaon te biaano,” I tuanga tinau. I a tia n rinanon reirei aikai inanon ririki aika a bati ao ni kua n taekan te kataneiai. I a tauraoi ni katokia. E ngae n anne I aki rangin rabakau iai. Ibukina ngkai I rootaki ni buan au kakauongo ao bukina bwa I kabonganai bwai n ibuobuoki ibukin te kakauongo, I tuai man iangoia bwa te aomata ae iai ana tarena n te katangitang. N taainako e anaa te tai ae bati n te kataneiai n reiakina tangin te kuna.

E aki bati n taetae tinau ma e tuangai bwa I riai n teimatoa n reirei ni karokoa are I a kona ni katanga te kuna n taromauri. Imwiin te ngurengure ae bati iaon au itera ao te kakaunganano ae bati mairouia au karo, I a baireia bwa n aki katokia.

Tabeua te ririki imwiina ao tengaa te maaire raroan te umwantabu ni maungan Guatemala nuuka. Ngkai te mitinare, I kaea te maungatabu n te mwakoro. I moantaai n roko ao ni kunea te biaano ikekei, ngaia are I a tekateka ao ni katang kuuna n taromauri. Angiina kaain te uoote ao mwakoro iai aia kiibote ae maiu man te iti ae uarereke are a kanganga kantangakiia, ngaia are I a rangin kukurei ni katangtang n ae bon te biaano raoi. N tokina, I a butiaki bwa n na raoniia kaain te taromauri ibukin te maungatabu.

Te bwai are bita anuau imarenan au ririki n ataei ma are au tai ni mitinare? I namakina mwaakan te Tamnei rinanon te katangtang.

Inanon au tai ni mitinare, a bati au tai ni kabonganai konabwai iaon te katangtang are I a tia n reiakin. I kakantaningai taai aika a bati n anene ao ni katanga te biaano ao ni katangtang e kuri ni katoa wiiki n tain te bootaki n toa. N taainako I aki kona ni mwaninga au kakauonga nakoia membwa mai Guatemala aika a kakaonimaki n anenei kuuna n taromauri. I reireniia membwa kuuna n taromauri aika a boou ake a iruwa iai. I reiakin tabeua reirei iaon moan mwaneka n te biaano. Ngai ma toau ti anene nakoia aomata ake ti reireiniia. E ngae ngke a aki tang raoi kunara, e mena ikekei te Tamnei n taainako n ringii nanoia aomata.

I reiakinna bwa e aki kakawaki bwa tera am tarena, ko teimatoa ni kona ni karikikarekei konabwai iaon te katangtang. N na aki kona n riki bwa te tia biaano n ana karinan te aonaaba, ao angiina membwa i Guatemala a na aki kona ni kaaina te Taebwanaeko Kuaea. Ma e aki kakawaki. Ti teimatoa ni kona ni kukurei ni namakina te Tamnei rinanon te katangtang. I bon rangin kakaitau ngkai au karo a kaungaai ni kateimatoa te reirei iaon te biaano, ao I kakaitau ngkai I tematoa ni kataneiai.