Naʻe Fehālaaki ha Meʻa ʻi Heʻeku Vakapuná

ʻI heʻeku fakaʻuli atu ʻeku vakapuna fonu pāsesé he leleʻangá, ʻi ha efiafi ʻe taha, naʻá ku ongoʻi ʻoku ʻi ai ha meʻa ʻoku fehālaaki he nāunau fakaʻuli ʻo e vaká. Naʻá ku afe leva mei he leleʻangá ʻo vilo ʻo hanga ki mui, ke fakapapauʻi ʻeku ongo fakalaumālié. Naʻe ʻikai ha meʻa ia ʻe ngali maumau.

Naʻá ku fifili leva, “Te u puna ke aʻu kei taimi ʻa e kau pāsesé ki he feituʻu ʻoku nau ō ki aí, pe te u foki ki he tauʻangá?” Naʻá ku ʻilo ʻe fai ha toloi lōloa ʻi ha toe foki. Ko e ngaahi leleʻangá ʻoku huʻu taha pē; kuo pau ke u tali ki he kau ngāue he malaʻé ke nau fakaʻataʻatā ha feituʻu ke u foki atu ai he lele mai ʻa e ngaahi vakapuná. Pea te mau tatali leva ki he kau ngāue monomonó ke nau vakaiʻi ʻa e vakapuná. ʻE fakatupu ʻe he toloí ha ngaahi palopalema ki he kautaha vakapuná pea mo e kau pāsese ʻoku tali mai ki ai ha kakaí pea mo ha fetongi vaká. Naʻá ku toe fakakaukau foki pe ko e hā ʻe fai ʻe he potungāue monomonó ki heʻeku lipooti ʻoku ʻi ai e palopalema he vaká ka ʻoku ʻikai haʻaku fakamoʻoni pau ka ko ʻeku ongoʻi mālohi peé.

ʻI heʻeku hoko ko e ʻeikivaka ʻo e vakapuná, ko hoku fatongia ʻa ʻemau malú, ko ia ne u pehē leva ke u muimui ʻi heʻeku ongó ʻo foki.

Naʻá ku talaange ki he taha ngāue fakamīsiní ʻi heʻemau aʻu atu ki he taʻuʻangá, naʻá ku ongoʻi ʻoku ʻi ai ha meʻa ʻoku fehālaaki he vakapuná ka naʻe ʻikai ke u ʻilo pe ko e hā. Naʻe ʻikai tui ia ʻoku ʻi ai ha palopalema.

Naʻá ne pehē, “Mahalo ko e viku pē leleʻangá. Mahalo naʻa mou heheke ʻi he valitaá.” Ka neongo ia, naʻe loto ke ne vakaiʻi ʻa e nāunau fakaʻuli ʻi he vaʻe he taumuʻá. Naʻá ne kole mai ʻi he hili ʻo ʻene vakaiʻi ʻení, ke fakahifo ʻa e kau pāsesé kae lele he vakapuná ʻo siviʻi.

Naʻe hohaʻa ʻaupito ʻi heʻene foki mai ʻi ha ʻosi ha miniti ʻe 30. Lolotonga ʻo ʻene siviʻí, naʻá ne fanongo ki ha ongo ʻo ha meʻa ʻoku toutou oloʻi. Ko e taimi naʻá ne lomiʻi ai ʻa e taʻofí ʻi heʻene liliu ke foki mai ki he tauʻangá, naʻe ʻikai ke ne toe mapuleʻi e vaká pea mei sīfā ai ki tuʻa mei he leleʻangá.

Naʻe hā mei hano siviʻi fakalelei ta naʻe ʻikai sai hono fakaleleiʻi ʻo e taʻofí ʻi he efiafi ki muʻá. Kapau ne u fakatōtō e vakapuná ʻi ha ʻosi ʻo ʻemau puná, naʻe ʻikai mei ngāue e taʻofí, pea he ʻikai ke u toe mapuleʻi ʻa e vakapuná.

Naʻe ʻomi leva ha vakapuna ʻe taha ke u pailate ai, peá u ʻave fakalelei ʻa e kau pāsesé ki honau feituʻú ʻi ha ʻosi ha houa ʻe tolu.

ʻOku ou fiefia naʻá ku fakafanongo ki he fanafana ʻa e Laumālié. ʻOku ou ʻilo ʻe tataki kitautolu ʻe he Laumālié kapau te tau kole ʻa e fakahinohino ʻa e ʻEikí mo fakafanongo ki he ngaahi ueʻi ʻoku hoko maí.