Naʻe Mate ʻa e Telefoní

Lolotonga ʻema nofo ʻi he kolo Lūsia ko Lositovo-ʻoni-Toní ʻi Māʻasi 1997, naʻá ku papitaiso ai mo hoku husepānití ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Naʻe tali e konga lahi ʻo ʻeku ngaahi fehuʻi ʻi heʻeku ako ʻa e ngaahi tokāteline ʻo e Siasí. Naʻe mālie ke te ʻilo ki he palani ʻo e fakamoʻuí, kau ai ʻa e ouau ʻo e papitaiso maʻá e kau pekiá. Naʻá ku ʻohovale ke ʻilo ʻe lava ʻo papitaiso kitautolu maʻa ʻetau ngaahi kui kuo pekiá.

Naʻe fakaafeʻi kimaua ʻe he palesiteni fakamisioná ʻi he ʻosi ha taʻu ʻe taha ʻo ʻema papitaisó ke ma teuteu ke ō ki he temipalé. Naʻá ma kamata fakahoko e fakatotolo he hisitōlia fakafāmilí, ko ha konga ʻo ʻema teuteú. Naʻá ku fakakaukau fekauʻaki mo hono fai e ngāue ko ʻení mo e tatangi ʻe telefoní ʻi ha ʻaho ʻe taha. Ko ʻeku faʻē ʻi he fonó. Naʻá ku kole ki ai pe te ne ʻomai ha lisi ʻo e ngaahi kui kuo pekia he tafaʻaki hoku husepānití. Naʻe ʻohovale ia peá ne talamai ko e papitaiso maʻá e kau pekiá ʻoku ʻikai ko ha tokāteline ʻa Kalaisi ka ko ha faʻahinga meʻa naʻe faʻu ʻe he kau Māmongá. Naʻe ʻikai ke u fakapapauʻi ha founga ke tali ʻaki koeʻuhí he naʻe ʻikai ke u maheni mo e ngaahi fakamoʻoni fakafolofola ʻoku nau poupouʻi ʻa e tokāteliné.

ʻI heʻeku fakakaukau mo e founga ke u tali ʻakí, kuo mate ʻa e telefoní ia. Naʻe ʻikai ke u fakapapauʻi ʻi ha taimi pe ko e hā ne hokó, ka naʻá ku tāpuniʻi ʻa e telefoní pea foki ki hoku loki mohé. Naʻá ku toʻo leva ʻa e Fuakava Foʻoú, tūʻulutui ke lotu, mo kole ki he Tamai Hēvaní ke fakahinohino mai ʻa e feituʻu te u lava ʻo maʻu ai ʻa e talí.

ʻI he ʻosi ʻo ʻeku lotú, naʻá ku fakaava leva ʻa e Tohi Tapú. Naʻá ku ongoʻi ʻo hangē ʻoku talamai ʻe ha taha ke u lau ʻa e veesi 29 ʻi he peesi naʻá ku fakaava haké. Ko e vahe 15 ia ʻo e 1 Kolinitoó, ʻa ia ʻoku fakamatala fekauʻaki mo e tokāteline ʻo e papitaiso maʻá e kau pekiá.

Naʻe ongo kiate au mo u ʻohovale ʻi hono tali mai ʻe he Tamai Hēvaní ʻeku lotú ʻi he momeniti pē ko iá. Ko ha ongo fakafiefia moʻoni.

Naʻá ku fakakaukau lahi ki he aʻusia ko ʻení ʻi he fakafokifā pē kuo toe tatangi ʻa e telefoní. Ko ʻeku faʻē-ʻi-he-fonó, ʻi heʻene ʻeke mai pe ko e hā naʻe mate ai ʻa e telefoní. Naʻá ku talaange naʻe ʻikai ke u ʻilo ka naʻá ku kole ange ke fakaava ʻene Tohi Tapú ʻo lau ʻa e 1 Kolinitō 15:29.

Ne ʻosi ha ngaahi ʻaho siʻi mei ai kuo hili ʻi heʻeku funga tēpilé ha lisi ʻo ha kāinga ne nau ʻosi pekia. Ne lau heʻeku faʻē-ʻi-he-fonó ʻa e potufolofolá pea kuo tui ʻeni naʻe akoʻi ʻe he Fakamoʻuí ʻo fakafou ʻi he ʻAposetolo ko Paulá, ʻa e tokāteline ʻo e papitaiso maʻá e kau pekiá.

Kuo ʻosi talaʻofa ʻe he ʻOtuá ha ngaahi tāpuaki maʻongoʻonga maʻanautolu ʻoku nau fai ʻa e ngāue huhuʻi ko ʻení. ʻOku ou ʻilo ʻoku moʻoni ʻeni.