Me Tiki ni Noda Bula na Koniferedi

E a vosa o Peresitedi Thomas S. Monson baleta na bibi ni talairawarawa kei na talaidredre sa dau kauta ga mai na kena ca (draunipepa 89). Vakasamataka mada na gauna o a talairawarawa kina ki na lawa ni matavuvale.Vakacava beka na gauna o a talairawarawa kina ki na lawa ni Kalou? Na cava o a vakila ni ko dau talairawarawa?

E talanoataka o Elder M. Russell Ballard ena Kuoramu ni iApositolo Le Tinikarua na goneyalewa lailai a teivaka e dua na tomata mai na dua na sorena lailai (draunipepa 18).Wilika se tukuna tale na italanoa oqo vakamatavuvale ka veivosakitaka na veika e vakavulica baleta na nomu rawa ni laki vakataka sara na Tamada Vakalomalagi. Sa rawa mo lalawataka e dua na ka mo toro volekata kina vua na Tamada Vakalomalagi.

E a vosa o Elder Enrique R. Falabella ena Vitusagavulu me baleta na veika mena qaqaco kina na matavuvale (draunipepa 102). A vakavulica ni so vei ira na vosa bibi me tukuni vei ira na nomuni matavuvale o ya na “Au lomani iko.” “Vinaka vakalevu,” kei na “Vosoti au.”A vakatura o Sisita Rosemary M. Wixom, na peresitedi raraba ni Lalai, me tukuni, “Au na dau lomana na veika kece a baleti iko” (draunipepa 81). Raica na ka ena yaco ni ko vakayagataka na vosa oqo ki na nomu matavuvale. Ena vakamarautaki ira beka? Na cava o vakila?

E vakavulica o Peresitedi Thomas S. Monson e va na ivakavuvuli ni vakavakarau ki na cakacaka ni kaulotu— sega ni baleta ga na daukaulotu tudei ia sa baleta na lewe ni Lotu (draunipepa 66). Sa rawa mo vulica na nona vosa ena nomu vakasamataka tiko oqo: Na cava au rawa ni cakava meu daukaulotu vinaka cake ena gauna oqo?

E vakavulica o Elder Jeffrey R. Holland ena Kuoramu ni iApositolo Le Tinikarua ni sega ni cala meda dau vakatitiqa se lomatarotaro, ia a vakavulica talega: “Ququmi matua toka ga ena ka o sa kila tiko ka tudei tu me yacova ni sa tadu mai na ikuri ni kila. … Mo dina ki na vakabauta sa tiko vei kemuni” (draunipepa 93). Sa rawa mo vola ena nomu ivolaniveisiga na veika o vakabauta, ivakadinadina, kei na so na veika vakayalo o sa sotava. Sa rawa mo vola talega na nomu vakatataro ka maroroya tiko ni gauna o wilika kina na ivolanikalou kei na ilavelave oqo, o na raica kina na kena isau.

E vuqa era vosa era a tukuna na veika e baleta na talairawarawa kei na kena veivakalougatataki. Me kena ivakaraitaki, a vakavulica o Peresitedi Monson, “Na kilai ni dina kei na isau ni taro levu duadua ena yaco mai vei keda ni da sa talairawarawa tiko ki na ivunau ni Kalou” (draunipepa 89). Sa rawa mo vakasaqara ena ilavelave oqo mo makataka se vola na vuqa na veivakalougatataki ni talairawarawa. Na nomu raica rawa na veivakalougatataki oqo ena vakauqeti iko mo tomana tiko na nomu bula dodonu.

E vica era vosa era a vakavulica ni rawa mo veiqaravi ena dua ga na gauna sa rawa, sega ena cakacaka ni veivukei e parokaramutaki. “Veiqaravi e veisiga,” e vakavulica o Brother David L. Beck, na peresitedi raraba ni Cauravou. ‘E tu wavokiti keda na kena madigi.” Ena vosa nei Brother Beck, o na wilika kina e so na ivakaraitaki ni nodra veiqaravi na itabagone vei ira na tamata (draunipepa 55).

E vuqa era a vosa era vakadinadinataki Jisu Karisito. Na cava o rawa ni vulica me baleta na kena ituvaki vakalou, Nona ilesilesi, kei na veiqaravi mai na vosa ena draunipepa 22, 70, 96, 99, kei na 109?

Na ulutaga ni lewenivuli ni itabagone ni vula o Me sa baleti ira tiko na parofita kei na ivakatakila. Kevaka o vakavulici ira na itabagone e vale ni lotu se ra tiko na gone, sa rawa me veivosakitaki vata kei ira na lewenivuli kei na taro oqo: Na cava e bibi kina meda rogoca ka vakamuri ira na parofita? Sa rawa mo vulica na ilavelave oqo mo raica kina na parofisai kei na ivakaro, ni vakamuri oqo, ena vukei keda meda kune-vinaka ena veigauna dredre.

E vica era vosa era a vakatabakiduataka na kena vaqaqacotaki na matavuvale. Me kena ivakaraitaki, a vakavulica o Elder Richard G. Scott ena Kuoramu ni iApositolo Le Tinikarua, “Ni sa tu o koya [na iVakabula] ena loma donu ni bula ni nomu matavuvale, sa na kune kina na vakacegu kei na maravu ni draki” (draunipepa 29). Raica na sala mena yaco na iVakabula me iusutu donu ni nomu matavuvale ni ko vulica na vosa nei Elder Scott ka vakakina na veivosa era draunipepa 6, 81, 83, kei na 102.