Elder Terence M. Vinson

O Elder Terence M. Vinson, se qai kacivi vou ki na iKarua ni Kuoramu ni Vitusagavulu, se bera vakadua ni bau rogoca na vosa Momani ni bera na nodrau sota kei Kay Anne Carden ena itekivu ni 1970 vakacaca mai Serene, Ositerelia. Erau a veitalanoataka na lewe rua na veika vakalotu ka rau mani yacova kina e dua na veidinadinati. Ena vei-Sigatabu yadua erau na lako ruarua ki na lotu nei Terence ni se gone kei na dua na tabana lailai ni Lotu i Jisu Karisito ni Yalododonu Edaidai. E dua na ilawalawa era sota ena dua na vale vakaitamera ka totoka, na kena ikarua ena dua na vanua lailai redetaki eratou sa rawata rawa na vica na Yalododonu Edaidai e kea.

Ia ni oti vakalailai “sa vakamadua mai na veivakatautauvatataki,” ka tekivu taura na lesoni mai vei ira na daukaulotu o Terence. E vuqa na nona taro. Ia, ni tiko ena koniferedi ni iteki, a vakila e dua na itukutuku vakamatata sara me vaka ga ni cavuti mai gusu. “Au gadreva meu curu ki na Lotu me rawa niu toso. Na taro kece e dau tu vei au ena yaco mai na kena isau,” e kaya o koya.

A mani papitaiso ena macawa ka tarava.

A sucu o Terence Michael Vinson mai Serene e Ositerelia, ena Maji ni 1951 vei John Laurence kei May Therese A. Vinson. Na tamana, ka cakacaka vakadaubokobuka, a solibula vakalevu me rawa kina ni ratou vuli na luvena e vitu.

A rawata o Elder Vinson e dua na diqiri ni bejila ena fika kei na wiliwili mai na Sydney University kei na dua na dipoloma ni veivakavulici mai na Sydney Teachers College. A rawata talega e dua na dipoloma ni tuvatuvalaki vakailavo mai na Deakin University kei na dua na diqiri ni masita ni veika vakailavo mai na Macquarie University. Ena nona bula vakacakacaka, e dua o koya na qasenivuli kilai levu ni fika, lekijara, ka daunivakasala vakailavo ka liutaka e dua na kabani ni tuvatuvalaki vakailavo kei na vakatubuilavo.

A vakamautaki Kay Anne, na marama ka vakaveikilaitaki koya ki na kosipeli, ena 2 ni Me, 1974, mai Serene, ka rau vauci na veiwatini ena ka 23 ni Okosita, 1975, ena Valetabu mai Hamilton Niu Siladi; e ono na luvedrau. Ni se bera ni oti e tolu na yabaki mai na nona papitaiso, a kacivi o Elder Vinson me bisopi. Sa veiqaravi oti o koya ena vica na mataveiliutaki ni iteki vakakina vakamata ni yasana kei na Vitusagavulu ni iWasewase.