Elder Ulisses Soares

O Elder Ulisses Soares, ka a tekivu veiqaravi ena Mataveiliutaki ni Vitusagavulu ena Janueri 2013, sa vakadinadinataka sara ga e matana na tubu totolo ni Lotu ena vica vata na tiki vuravura.

A sucu o Elder Soares mai São Paulo e Brazil, ena Okotova ni 1958. Oi rau na nona itubutubu, o Apparecido kei Mercedes Soares, erau a curu ki na Lotu ni yabaki lima tiko o koya. Eratou dau soqoni ena dua na rumu ena dela ni dua na vale ni madrai. Se nanuma tiko o Elder Soares na mamarau a vakila ni se yabaki walu ena kena tauyavu na imatai ni iteki ena Ceva kei Amerika mai São Paulo ena 1966. A tubu vakatotolo sara na Lotu mai Brazil ki na 50 na iteki ena 1990 ka sivia na 200 na iteki ena 2000.

O Elder Soares, ka rawata e dua na diqiri ni bejila ena veika vakavika kei na bula vakailavo mai na Pontificia Catholic University kei na dua na MBA mai na National Institute of Postgraduate Study, a cakacaka tiko ena dua na kabani ni taya ni vica na matanitu ena gauna a soli kina vua e dua na itutu ena Lotu. Ni saumi me cakacaka ena Tabacakacaka ni iLavo, sega ni dede sa yaco me dairekita ni veika vakayago ena valenivolavola ni iwasewase ni Lotu mai São Paulo, me veitokoni ki na Mataveiliutaki ni iWasewase me 10 na yabaki. A veiqaravi talega vakaimatai ni peresitedi ni iTeki na São Paulo Brazil Cotia.

A veiqaravi vakaperesitedi ni Tabana ni Kaulotu na Portugal Porto mai na 2000 ki na 2003 ka kacivi ki na iMatai ni Kuoramu ni Vitusagavulu ena Epereli ni 2005. Sa veiqaravi oti o koya ena Mataveiliutaki ni iWasewase na Brazil kei na Africa Southeast.

“Na veika oqori sa solia vei au na ivakarau ni rai meu raica ni rawa ni tauyavu na Lotu ena veivanua kecega era tu kina na tamata yalodina,” e kaya o koya, “kei na ivakarau ni rai meu raica na veika e dodonu meu vulica meu veiqaravi vakavinaka cake kina.”

Erau a vakamau o Elder Soares kei na watina o Rosana Fernandes Morgado ena Okotova ni 1982 ena Valetabu na São Paulo Brazil. Erau nodratou itubutubu e tolu na gone.

A veiqaravi vakadaukaulotu tudei ena tabana ni kaulotu na Brazil Rio de Janeiro o Elder Soares. A veiqaravi talega vakaperesitedi ni kuoramu ni italatala qase, daunivakasala ena matabisopi, lewe ni matabose e cake, sekeriteri liu ni iteki, ka itini ni welefea ena yasana.