Elder Edward Dube

A vakaveikilitaki ki na kosipeli o Elder Edward Dube ena 1981 mai vua e dua na itaukei ni cakacaka ka dau cakacaka o koya ena nona vale. A solia vua na turaga oqo e dua na ilavelave ni iVola i Momani. A sega ni bau wilika me yacova na 1983, ia a vakauqeti sara mai na nona ivakadinadina o Josefa Simici me baleta na nona veisiko o Moronai ka vakadonuya kina na veisureti me tiko ena dua na soqoni ni lolo kei na soli ivakadinadina ena valenilotu mai Kwekwe, Zimbabwe.

A logaloga ca taumada, ni vakila na kena isema vakatamata dauveiqaravi vei ira e vuqa era tiko kina.

“Ia ni ra wasea na nodra ivakadinadina me baleta na iVola i Momani, au vakila e dua na isema vei ira na tamata oqo,” a nanuma lesu kina, “ka mani rawa kina meu wasea na noqu nanuma me baleta na iVola i Momani.”

A qai soli vua e muri na lesoni mai vei ira na daukaulotu, papitaiso, qai laki veiqaravi vakadaukaulotu ena tabana ni Kaulotu na Zimbabwe Harare Mission.

Ena gauna oya, a vakavulica o koya na matavuvale nei Naume Keresiya Salazani, se qai yabaki 16 ena gauna oya. Erau tomana tiko nodra veikilai ni oti na kaulotu ka rau mani vakamau mai Kwekwe ena 9 ni Tiseba. Erau nodratou itubutubu e tolu na goneyalewa kei na dua na tagane.

A sucu ena Me ni 1962 ena koro ko Chirumanzu, Zimbabwe, vei rau o Clement kei Rosemary Dube, a rawata o Elder Dube e dua na dipoloma ni vuli mai na koliji o Zimbabwe D. E. College ena 1992 qai laki cakacaka ena iVakarau ni Vuli ena Lotu, ka tauyavutaka na semineri kei na inisitute mai Zimbabwe, Zambia, kei Malawi. Sa vakalougatataki o koya me raica e vuqa na gonevuli sa solia vei ira na sitivikiti ni tauri ivola ena nodra sa gole yani me veiqaravi ena veitutu ni veiliutaki ena Lotu ena veivanua oqori ni sa tubu na Lotu.

Sa veiqaravi oti o koya vakaperesitedi ni kuoramu ni italatala qase, peresitedi ni tabana, peresitedi ni tikina, peresitedi ni iteki, daunivakasala ena mataveiliutaki ni dua na tabana ni kaulotu, ka vaka kina, mai na 2009 ki na 2012, peresitedi ni Tabana ni Kaulotu na Zimbabwe Harare. Ni se bera na nona kacivi ki na iMatai ni Kuoramu ni Vitusagavulu a veiqaravi tiko vaka-Vitusagavulu ni iWasewase.