Usa ka Kahon sa mga Litrato

Pipila ka tuig ang milabay ang akong bana ug ako naglabay og basura sa lokal nga landfill sa dihang akong nabantayan ang usa sa mga babaye nga nagtrabaho didto nga gialsa ang usa ka kahon aron ibutang sa incinerator. Sa kalit lang ang kahon naabli, ug pipila ka mga litrato nahulog.

Samtang nagtan-aw ko, ako adunay kusog nga impresyon nga moduol ug kuhaon kadtong kahon sa mga litrato. Nagdali-dali ko sa paggawas sa sakyanan aron kuhaon ang mga litrato. Ang babaye ug ako mibati nga wala tuyoa ang paglabay sa mga litrato, ug gikombinser nako siya nga ihatag ngari nako ang mga litrato aron makapangita ko og tawo nga ganahang moangkon niini.

Nagsiksik sa gatusang mga litrato diha sa kahon, nakakita ko og usa ka sobre nga gibutangan og address alang sa sa usa ka tawo nga anaa sa Warburg, Alberta, Canada. Sulod sa pipila ka tuig, akong gisulatan ang pipila ka mga tawo nga adunay samang apelyido, apan wala gayuy mitubag.

Sa dihang ang akong pamilya aduna nay Internet, akong nadiskobrehan nga adunay usa ka historical society sa Warburg. Nangutana ko kon aduna bay nagtrabaho didto nga makaila sa mga ngalan nga akong nakita sa luyo sa mga litrato.

Usa ka bulan ang milabay gitawagan mi sa usa ka tawo nga gikontak sa historical society. Siya miingon nga ang iyang igsoong babaye nagpuyo duol namo, ug siya mihangyo kon iya bang makita ang mga litrato. Siyempre miingon mi og oo.

Pagkasunod adlaw, sila si Floyd ug Beth Hawthorn, mga Santos sa Ulahing mga Adlaw, miabut aron motan-aw sa mga litrato. Sa dihang akong giablihan ang kahon, si Brother Hawthorn miingon, “Nan, siya kana,” nagtudlo sa litrato diha sa ibabaw. Litrato kadto sa lolo ni Sister Hawthorn.

Samtang ilang gitan-aw ang matag litrato, gisultihan kami nila ni Brother ug Sister Hawthorn kabahin sa mga tawo sa kada litrato. Ang mga Hawthorn nagduhaduha nga sila paryente sa tawo nga milabay sa mga litrato, ug wala silay ideya nganong ang mga litrato naadto sa landfill.

Kusog akong pagbati nga gitabangan ko sa Langitnong Amahan nga mabalik ang mga litrato sa pamilyang Hawthorn. Ako mopamatuod nga ang buhat sa family history mao ang usa sa labing importante nga buhat nga angay himoon. Kon kita andam sa paghimo sa buhat, ang Ginoo motabang kanato sa pagbuhat niini.