Unsaon Nako nga Mahimong usa ka Malampusong Misyonaryo?

Makapasubo nga nakaamgo nga kulang ang akong pagtuo. Nangita ko og mga dapit diin ako makapalig-on sa akong pagtuo ug nakaamgo nga kon ang mga butang wala mahitabo sumala sa plano, ako nahingawa.Ang Isangyaw ang Akong Ebanghelyo nag-ingon: “Ang kahingawa makapahuyang sa imong pagtuo. Kon paubsan nimo ang imong mga gilauman [expectations], ang imong kaepektibo mokunhod, ang imong kadasig sa pagtinguha mohuyang, ug mas maglisud ka sa pagsunod sa Espiritu.”² Nakaamgo ko nga gitugutan nako ang among kapakyasan nga mohuyang sa akong pagtuo.

Nagsugod ako sa pag-ampo alang sa kausaban sa kasingkasing ug mas dakong pagtuo. Misalig usab ako sa saad nga gihatag sa Mormon 9:21: “Bisan kinsa nga motuo diha kang Kristo, sa walay pagduhaduha, bisan unsa ang iyang pangayoon sa Amahan sa ngalan ni Kristo kini ihatag ngadto kaniya; ug kini nga saad alang sa tanan, ingon ngadto sa mga lumulupyo sa yuta.” Kini nga saad migiya nako nga mas mag-ampo nga mainiton alang sa mga panalangin ug mga milagro nga gibati nako ug sa akong kompanyon nga among gikinahanglan, kanunay nagkadugang, “Imong pagbuot ang matuman.” Kini nga mga pag-ampo nakatabang nako sa pagdawat sa kausaban sa mga plano ug kapakyasan uban sa mas dakong pagtuo, nasayud nga ang Langitnong Amahan motubag kanunay sa pag-ampo sa hugot nga pagtuo—bisan kon ang mga tubag moabut sa mga paagi nga wala nato damha. Mas nakaila ko sa mga paagi sa Ginoo nga naggiya kanamo sa tibuok adlaw.

Samtang ako naningkamot sa pagpalig-on sa akong pagtuo, akong nakit-an ang positibo nga matang sa pahayag gikan sa Isangyaw ang Akong Ebanghelyo nga tinuod: kon imong patas-an ang imong gilauman, ang imong pagka-epektibo motubo, ang inyong tinguha molambo, ikaw mas makasunod sa Espiritu. Dugang pa, mas magmalaumon ako sa misyonaryo nga buhat ug sa akong misyonaryo nga pagserbisyo kon ako makaila ug makadayeg sa mga milagro nga nahitabo matag adlaw.

Gisugdan sa Ginoo sa pagpakita nako nga Siya mibuhat og mga milagro alang namo matag adlaw—apan ako wala makamatikod niini hangtud nga ako tinud-anay nga naningkamot nga magmapasalamaton. Ang pagpasalamat mas labaw pa kaysa usa ka maayong kinaiya o nindot nga mga pamatasan. Sa dihang mipahayag ko og pasalamat sa Ginoo ug sa uban, mas misalig ako. Akong nakita ang akong kaugalingon nga nadasig alang sa ubang mga misyonaryo kon sila nagmalampuson imbis masina (tan-awa sa Alma 29:14, 16). Mas naka-focus ako sa unsay anaa nako ug unsay nahimong eksakto kay sa unsay akong kulang ug unsay nasayop.

Akong nakat-unan nga ang pagpasalamat mao ang makatabang nato nga dili nato itandi ang atong mga kaugalingon sa uban. Kadtong panahon nga wala ako mobati nga malampusong misyonaryo sa kasagaran miabut tungod kay akong gisultihan ang akong kaugalingon, “ang akong nahimo dili sama kamaayo sa ilaha,” o, “Sila mas maayo kay kanako. Nakat-unan usab nako nga samtang ang sumbanan sa Ginoo mao ang paghatag nato sa matarung nga mga ehemplo nga sundon, mao kini ang tintasyon ni Satanas sa pagtandi sa atong mga kaugalingon kanila aron sa pagtino sa atong bili o kalampusan. Apan ang Isangyaw ang Akong Ebanghelyo miklaro niini: “Likayi ang pagtandi sa imong kaugalingon sa ubang mga misyonaryo ug sa pagsukod sa mga resulta sa imong mga paningkamot tandi kanila.”³ Sa katapusan, ang pagpasalamat nakatabang nako sa paglikay sa garbo ug nakapahinumdom nako nga ang Ginoo mao ang nagdumala sa Iyang buhat. Dili ko kinahanglang masina tungod kay ang akong kauban nga mga misyonaryo nagpakita nga malampuson.⁴

Sa wala pa nako kini nga kausaban sa panglantaw, naka-focus ra kaayo ko sa piho nga matang sa mga panalangin nga ako nakalimot na sa pagtan-aw sa laing mga paagi nga gitubag sa Ginoo ang among mga pag-ampo ug panalangin sa among misyonaryo nga buhat. Sa katapusan, ang Ginoo misugod sa pagpanalangin sa misyonaryo nga buhat sa among area sa maanindot ug wala damha nga mga paagi. Nakakita kami og mga tawo nga andam nga modawat sa among mensahe, apan akong nakat-unan nianang higayuna nga dili mosukod sa akong kalampusan pinaagi sa mga pagpili sa uban.

Si Presidente Gordon B. Hinckley (1910–2008) mipakigbahin sa tambag sa usa ka presidente sa misyon kabahin sa misyonaryo nga buhat: “Buhata ang imong labing maayong mahimo, ang imong labing maayo. Pag-ampo ug paningkamot pag-ayo ug isalig sa Ginoo ang pag-ani.”⁵ Isangyaw ang Akong Ebanghelyo nagtudlo og susama nga butang mahitungod sa malampusong mga misyonaryo: “Maghimo sa imong pinakamaayo sa pagdala og mga kalag ngadto kang Kristo, ug magtinguha pag-ayo nga makat-on ug mouswag.”⁶

Kon ako andam na sa paghinulsol, kon ako matinuoron manubag sa Ginoo nga akong gibuhat ang akong pinakamaayo, ako magmasaligon nga ako usa ka malampusong misyonaryo—bisan og modawat o dili ang mga tawo sa among mensahe. Sa daghang mga paagi, ang sukod sa akong kalampusan isip misyonaryo mahukman pinaagi sa akong kaandam sa paghinulsol ug sa akong determinasyon sa pagpadayon sa pagtrabaho.

Ako adunay daghang mga milagro nga girekord sa akong journal gikan niini nga panahon sa akong misyon. Samtang ako naningkamot nga mas matinud-anon ug mapasalamaton, mas nakabaton ako og maayong panglantaw, nalikayan nako ang kahingawa, ug akong nabati ang Espiritu nga buhong diha sa buhat. Akong nasayran nga ang gitudlo sa Isangyaw ang Akong Ebanghelyo tinuod: “Kon imong gibuhat na ang imong pinakamaayo, mahimong makasinati ka gihapon og mga kapakyasan, pero dili ka mahingawa sa imong kaugalingon.Makabati ka og kasiguroan nga ang Ginoo nalipay kon imong mabati ang Espiritu nga naglihok pinaagi kanimo.”⁷ Ug sa dihang ako mibati nga ang Ginoo nahimuot nako, makalahutay ko og bisan unsa nga pagsulay.