Ngano ug Unsay Angay Nakong Ikumpisal sa Akong Bishop?

Daghang kabatan-onan mibati nga mas komportable mokumpisal sa ilang mga sayop ngadto sa ilang mga ginikanan o mga lider sa kabatan-onan. Bisan og ang imong mga ginikanan ug mga lider makahatag sa gikinahanglan nga suporta ug tambag, ang Ginoo mipahayag nga ang bishop mao ang komon nga maghuhukom sa Israel (tan-awa sa D&P 107:72, 74). Siya adunay responsibilidad sa pagtino sa katakus sa mga miyembro sa iyang ward. Pinaagi sa ordinasyon ug matarung nga pagpuyo, ang bishop adunay katungod sa pagpadayag gikan sa Espiritu Santo kabahin sa mga miyembro sa iyang ward, lakip nimo.

Ang bishop makatabang nimo sa proseso sa paghinulsol sa mga paagi nga dili mahatag sa imong mga ginikanan o ubang mga lider. Kon ang sala seryuso gayud, siya motino nga ang imong mga pribilehiyo sa simbahan kinahanglan nga dunay restriksyon. Pananglitan, isip kabahin sa proseso sa imong paghinulsol, siya mohangyo nimo nga dili una moambit sa sakrament o mogamit sa priesthood. Makigtambayayong siya nimo ug motino kon ikaw takus na ba nga mohimo niadtong sagrado nga mga kalihokan.

Ang imong bishop motambag nimo unsay imong buhaton sa paglig-on sa imong abilidad sa pagbatok sa tintasyon. Mahimong moawhag siya nimo sa pagtuon og usa ka doktrinal nga hilisgutan, sama sa paghinulsol, ug dayon mopakigbahin kaniya sa unsay imong nakat-unan. Mahimong mohangyo siya nimo sa pagpakig-istorya niya matag semana sa pagreport unsay imong gibuhat sa paglikay sa imong kaugalingon gikan sa makapatintal nga mga sitwasyon.

Ikaw tingali naghunahuna, “Kanang tanan maayo, apan unsaon nako nga makahibalo nga seryoso ang akong gibuhat nga kinahanglan kong makig-istorya sa bishop? Ang mubo nga tubag: “ang imong konsensya mosulti kanimo.” Kon imong mabati ang kahapdos sa konsensya, lihok diha-diha dayon (tan-awa sa Alma 34:31–34).

Kabahin sa paghinulsol, si Haring Benjamin mitudlo, “ako dili makasulti kaninyo sa tanan nga mga butang diin kamo mahimo nga makabuhat og sala; kay adunay daghan nga mga paagi ug hinungdan, gani hilabihan kadaghan nga ako dili na makaihap kanila” (Mosiah 4:29). Mao nga kay sa mohatag og detalyado nga lista sa mga butang nga kinahanglan nimong ikumpisal sa imong bishop, tuguti ko sa pagpakigbahin og pipila ka mga baruganan nga makatabang nimo sa paghimo niana nga desisyon.

Nasayud ko nga ikaw naningkamot nga magmasulundon, apan tingali nasayop—gani seryoso nga kasaypanan. Kadaghanan sa mga sayop nga nahimo sa mga tawo nasulbad pinaagi sa personal nga pag-ampo ug sinsero nga paghinulsol. Ang ubang sayop, ilabi na kalabut sa imoralidad, kinahanglan nga ikumpisal sa bishop sa dili pa ikaw makadawat og kapasayloan sa Ginoo.

Samtang ikaw maghunahuna sa sayop nga imong gihimo, ikaw tingali mobati nga sad-an, dili mahimutang, masulub-on, o gani miserable. Kon nasinati nimo bisan hain niini nga mga pagbati, nan kinahanglan tingali nga makig-istorya ka sa imong bishop mahitungod niadto nga mga sayop.

Ayaw pagsulay sa pagpawalay sala sa imong kaugalingon o mangatarungan aron mawagtang ang pagbati nga nakasala. Tingali maghunahuna ka, “Makauulaw tingali nga mosulti sa bishop unsa may akong nabuhat. Nagtuo siya nga ako mas buotan nga tawo kay niana. Makalitan siya kon sultihan ko siya kon unsay akong gibuhat. Dili na siya ganahan nako.”

Mosaad ako nimo nga siya dili manghimaraut nimo. Isip usa ka sulugoon sa Ginoo, siya mabination ug masinabuton samtang siya naminaw kanimo. Dayon motabang siya nimo sa proseso sa paghinulsol. Siya ang mensahero sa Ginoo sa kalooy sa pagtabang nimo nga mahimong limpyo pinaagi sa Pag-ula ni Jesukristo.

Ang Ginoo nag-ingon: “Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila.

“Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal kanila ug mobiya kanila” (D&P 58:42–43).

Kon ikaw mokumpisal ug mobiya sa imong mga sala, ang Ginoo mopasaylo kanimo. Dili ka na kinahanglang manubag ngadto Kaniya niadtong mga sala inig abut sa panahon nga ikaw pagahukman.

Usahay ang usa ka tawo mohunong sa pagbuhat og sayop apan wala gayud mokumpisal, kon kini gikinahanglan, ngadto sa iyang bishop. Isip sangputanan, ang tawo magpadayon sa pagpas-an sa palas-anon sa sala nga mag-inusara, imbis nga tugutan ang Manluluwas nga mokuha sa palas-anon.

Tuguti ko nga mohatag nimo og usa ka ehemplo. Usa ka gabii pipila ka tuig na ang milabay, nag-interbyu ko og mga hamtong nga mopabag-o sa ilang mga rekomend sa templo. Usa ka hamtong nga babaye misulod aron magpainterbyu. Siya naminyo sa templo ug aktibo sa simbahan sa tibuok niyang kinabuhi.

Akong gibati nga naguol kaayo siya. Samtang nagpadayon sa interbyu, nakadawat ko og espiritwal nga impresyon. Miingon ko kaniya, “Sister, duna koy impresyon nga nakahimo ka og grabe nga sayop sa tin-edyer pa ka nga wala nimo ikumpisal sa lider sa priesthood. Andam ka bang mosulti nako niini?”

Diha-diha dayon mihilak siya. Miingon siya nga tinuod kini, apan gibati ang kaulaw sa pagkumpisal niini ngadto sa bishop. Samtang iyang gikumpisal kon unsay iyang nabuhat, mipaambit siya og igo nga mga detalye aron matino nako ang iyang pagkatakus.

Ang pagkumpisal sa iyang mga sala ngadto sa usa ka priesthood lider nagtimaan sa katapusan sa iyang proseso sa paghinulsol kay sa sinugdanan. Iyang gidala ang palas-anon ug kasub-anan niana nga sala sa kapin sa 30 ka tuig.

Tungod kay nahuman na niya ang katapusang lakang sa paghinulsol, ang iyang kahasol sa konsensya nawala. Usahay makita nako siya human niana nga gabii sa interbyu. Misanag ang iyang panagway, ug siya malipayon.

Gusto ko nga kamo masayud nga wala ko kahinumdom sa iyang pangalan. Ang Ginoo makatang-tang sa ingon nga mga panumduman gikan sa mga bishop. Unsay akong nahinumduman mao nga pinaagi sa pagkumpisal ngadto sa iyang lider sa priesthood, ang usa ka hamtong nga babaye nahupay sa gibati nga sala nga gidala niya sa daghang mga tuig.

Palihug ayaw paghimo niana nga sayop. Kon ikaw dunay pagbati nga nakasala apan dili sigurado kon kinahanglan ka nga mokumpisal sa imong bishop, lakaw pakigkita kaniya. Tuguti siya nga motabang kanimo. Ayaw irisgo nga magdaladala sa wala kinahanglana nga palas-anon sa imong kinabuhi, nga makapamiserable sa imong pagbati. Pinaagi sa inyong pagkumpisal ngadto sa bishop ug sa imong paghinulsol, ang Ginoo mokuha niana nga palas-anon sa imong kalag (tan-awa sa Isaias 1:18).

Imahe

A young woman seated across the desk from her bishop.

Gibayran ni Jesukristo ang bili sa mga sala sa tanang katawhan pinaagi sa Iyang maulaon nga sakripisyo. Gidapit ka niya sa paghinulsol ug paglikay sa dugang nga kaguol ug pag-antus. “Paghinulsol, tingali unya … ang imong mga pag-antus masakit—unsa ka sakit ikaw wala masayud, unsa ka hilabihan kaanindot ikaw wala masayud, oo, unsa ka lisud sa pag-antus ikaw wala masayud.

“Kay tan-awa, Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol;

“Apan kon dili sila maghinulsol sila kinahanglan gayud nga mag-antus sama kanako. …

“Busa, ako magsugo kanimo pag-usab sa paghinulsol, … ug nga ikaw mokumpisal sa imong mga sala, tingali unya og ikaw mag-antus niini nga mga silot nga Ako nakapamulong” (D&P 19:15–17, 20).

Ako mopamatuod nga pinaagi sa Iyang pag-antus, si Jesukristo mibayad na sa bili sa imong mga sala. Ikaw mahimong mapasaylo kon ikaw maghinulsol. Ayaw sulayi ang pagbayad sa bili sa imong mga sala. Walay bisan unsa nga imong kaugalingong pag-antus ang makatubos nimo; pinaagi lamang sa Pag-ula nga ikaw makadawat og kapasayloan.

Hinaut nga magpakita ka og hugot nga pagtuo diha kang Jesukristo ug sa Iyang Pag-ula. Ako mopamatuod pinaagi sa pangalan ni Jesukristo nga pinaagi sa paghinulsol, lakip ang pagkumpisal ngadto sa imong bishop kon gikinahanglan, ikaw malimpyo. Dugang pa, pinaagi sa grasya sa Manluluwas—Iyang makaabag nga gahum—malig-on ang imong abilidad sa pagbatok sa tintasyon sa umaabut. Busa, ikaw makabaton og kalinaw sa hunahuna ug kalipay niining kinabuhia, ug ikaw makapanunod sa kinabuhing dayon didto sa kalibutan nga moabut.