Sunda ang Iyang mga Tunob

Imahe

Christ walking with sheep in the background.

Ang mga kasulatan nag-awhag nato nga mahimong sama Kang Jesukristo ug “magakinabuhi sama sa iyang pagkinabuhi” (1 Juan 2:6). Apan ang paghimo nianang unang lakang malisud—ilabi na kon kamo wala masayud unsaon sa pagsugod.

Makakita kamo og tabang sa Isangyaw ang Akong Ebanghelyo: Usa ka Giya sa Misyonaryo nga Pangalagad. Tingali maghunahuna mo nga kini handbook lang sa full-time nga mga misyonaryo, apan sa tinuod usa kini ka nindot nga himan nga makatabang ninyo nga makasugod sa inyong mga tumong nga mahimong sama sa Manluluwas. Ang kapitulo 6 gidesinyo sa pagtabang ninyo nga makasabut ug mogamit sa siyam ka piho nga Kristohanong kinaiya.

Ania ang pipila ka mga sugyot kon unsaon sa paggamit sa Isangyaw ang Akong Ebanghelyo ug sa mga kasulatan samtang kamo maningkamot sa pagpalambo og Kristohanong mga hiyas:

• Sa pagsugod, adto sa Kalihokan kabahin sa Hiyas sa katapusan sa kapitulo 6 sa Isangyaw ang Akong Ebanghelyo (pahina 152). Kini nga kalihokan makatabang ninyo sa pagtino kon unsa nga mga hiyas nga karon inyong espirituhanon nga kalig-on ug unsa ang kinahanglan ninyong palamboon.

• Pagkahuman sa kalihokan, sa mainampoong paagi pagpili og usa ka hiyas nga i-focus. Ikonsiderar ang pagbasa sa seksyon sa kapitulo 6 mahitungod niana nga hiyas.

• Paghimo og piho, masukod nga mga tumong nga makatabang ninyo sa pagpalambo niini nga hiyas. Hatagi ang inyong kaugalingon og panahon sa pagtrabaho sa inyong tumong. Dayon timbang-timbanga ang inyong pag-uswag. Pananglit, kon kamo naninguha nga mas manggiloy-on, kamo maghimo og tumong nga mosulti og positibo nga mga butang mahitungod sa inyong mga igsoon makatulo matag adlaw sulod sa usa ka semana. Sa katapusan sa semana, timbang-timbangon ninyo kon sa unsang paagi inyong gihimo ang inyong tumong ug mohimo og mga pagpahiangay nga makatabang kaninyo nga mopadayon sa paglambo.

• Ang Isangyaw ang Akong Ebanghelyo naghatag og mga kasulatan nga tun-an ang matag hiyas. Mahimo kamong mainampuong magtuon sa mga kasulatan nga gilista ug isulat ang mga impresyon nga inyong nadawat samtang kamo nagbasa.

• Pangayo og tabang sa Langitnong Amahan sa pagpalambo og usa ka Kristohanong kinaiya. Pangayo og pihong tabang sama sa, “Palihug hatagi ko’g kalig-on sa pagbuntog sa akong kasuko kon ang akong mga igsoon mokuha sa akong mga butang.” Kon mas piho ang inyong pag-ampo, mas sayon alang ninyo sa pag-ila sa mga tubag sa Ginoo.

Ang pagkahimong sama sa atong Manluluwas, nga si Jesukristo, usa ka hinay-hinay nga proseso ug usa ka tibuok kinabuhi nga pagpaningkamot. Usahay daw mas lisud pa kini kay sa advanced physics. Apan ayaw pagpakawala sa paglaum. Ang Ginoo nagsaad kanato: “Siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” (D&P 50:24). Samtang kita modawat, magtuon, ug mogamit sa kahayag ug kamatuoran ug mopadayon sa pagsunod sa Dios matag adlaw, kita makasiguro nga kita mahimong mas mahisama sa atong Manluluwas, nga si Jesukristo.