Ko e tatali kia Sīsuú
“He ko e Foha ʻo e Tangatá ʻe haʻu ia ʻi he nāunau ʻo ʻene Tamaí mo ʻene kau ʻāngeló” (Mātiu 16:27).
Naʻe hakule ʻe Keiti e puha tukuʻanga meʻá, ʻo kumi fakalelei ʻi he ngaahi pepa manusinusí. Ka naʻe ʻikai pē ke ne maʻu e meʻa naʻá ne kumí.
Naʻá ne toe faʻo e meʻa kotoa ki he puhá pea ʻalu ke kumi e Fineʻeikí.
Naʻe ʻosi kumi ʻe Keiti ʻi he tuʻa pianó, ʻi he lalo sea moluú, pea naʻa mo e mohenga pēpē ʻo Tōmasí. Kuo mole ia. Kuó ne ʻosi talaange ki he Fineʻeikí.
“Fineʻeiki, kuo pulia e pēpē ko Sīsuú.”
Ne taki atu leva ʻe Keiti e Fineʻeikí ki he ʻīmisi ʻo e ʻaloʻí he loto falé. Naʻe ʻi ai ʻa Siosefa mo Mele pea mo e kau tauhi sipí. Ko e Kau Tangata Potó–pea mo e kāmelí mo e ʻasí—ne nau ʻi ai. Naʻe tuʻu takai ʻa e ngaahi tamapuá kotoa ʻi he ʻaiʻanga kai ʻo e manú ne ʻikai ʻi ai ha tahá.
Pehē ange Fineʻeikí, “ʻOku ngali pehē, ʻikai ko ia?”
“ʻIo, ʻoku ʻikai ke u lava ʻo maʻu ia ʻi ha feituʻu. Naʻá ku kumi mo kumi.” He ʻikai hano ʻaonga ʻe īmisi ʻo e ʻaloʻí ka ʻikai ke ʻi ai e pēpē ko Sīsuú.
Ne ʻalu e Fineʻeikí ki he laupapa tukuʻanga tohí. Naʻá ne talaange ʻi heʻene kakapa ki ʻolunga ʻo toʻo hifo ha meʻa mei he laupapa taupoto ki ʻolungá, “ʻOku ʻikai ke Ne pulia.”
Ne fakatau ʻe Keiti ʻene mānavá ʻi heʻene fiemālié. Naʻá ne talaange, “Ko ʻena! Te u ʻalu ʻo tuku ia ki he ʻaiʻangakai ʻo e manú.”
Naʻe ala atu ki he kiʻi tamapuá, ka naʻe toe tuku ia ʻe he Fineʻeikí ki he funga laupapá. Ne talaange ʻe he Fineʻeikí, “Ko e taʻu ní, te tau toki tuku e pēpē ko Sīsuú ki he ʻaiʻangakai ʻo e manú ʻi he pongipongi Kilisimasí. Ko ha tukufakaholo ia ne ako ʻe he Tangataʻeikí ʻi Falanisē.”
“Ko e hā hono ʻuhingá? ʻOku mata-mamahi e taha kotoa.”
Ne pehē ange e Fineʻeikí, “ʻOku ʻikai ke u ʻilo ʻe au pe ʻoku nau mamahi. Ka kiate au, ʻoku lahi ange ʻa e hangē ʻoku nau tatalí.”
Ne vakavakaiʻi ʻe Keiti ʻa e ʻū tamapuá. Naʻe lava ke ne fakatokangaʻi e feituʻu ʻi he ʻaiʻangakai ʻo e manú naʻe tonu ke ʻi ai ʻa e pēpē ko Sīsuú. Ko ha niʻihi ʻo e ngaahi tamapuá naʻa nau aʻu atu ki he feituʻu ko iá.
Pehē ange leva ʻa Keiti, “Mahalo pē.”
Naʻe ʻeke ange ʻe he Fineʻeikí, “Manatuʻi hoʻo loto vēkeveke ʻi he teʻeki fāʻeleʻi ʻo Tōmasí, ke fai mo haʻú?”
Ne malimali ʻa Keiti ki hono kiʻi tuongaʻane kei valevalé, he naʻe vaʻinga pē ʻi ha funga sipi kafú. “ʻIo, naʻe hangē ʻe fuʻu fuoloá.”
“ʻOkú ke ʻiloʻi naʻe tatali ʻa e kau palōfitá ʻi ha taʻu ʻe lauiafe ke hāʻele mai ʻa Sīsū ʻo tokoni ke tau toe foki ʻo nofo mo e Tamai Hēvaní?”
Naʻe manatuʻi ʻe Keiti ʻene mamata he fakatātā ʻi he Palaimelí ʻo ha palōfita naʻá ne tohi ʻo fakamatalaʻi e ʻaloʻi ʻo e Fakamoʻuí. Talaange leva ʻe ia, “ʻOku ou tui pehē.”
Talaange ʻe he Fineʻeikí, “Naʻe fakakaukau e kau palōfita hangē ko ʻĪsaiá mo tohi fekauʻaki mo e meʻa ʻe fakahoko ʻe he Fakamoʻuí ʻi he taimi ʻe hāʻele mai aí. Ne nau fakamoleki ʻenau moʻuí kotoa he tatali kiate Ia ke ʻaloʻí. Ko e taha ia e ngaahi ʻuhinga ne tau fokotuʻu pehē ai ʻa e ʻīmisi ʻo e ʻaloʻí, ke fakamanatu kiate kitautolu naʻe tatali ha kakai tokolahi ʻi ha taimi lōloa ke hāʻele mai ʻa e Fakamoʻuí.”
Ne talaange leva ʻe Keiti, mo sio ki he kau tauhisipi naʻe tatali kia Sīsuú, “Te u helaʻia au he tatali ʻi heʻeku moʻuí kotoa”.
Ne pehē ange e Fineʻeikí, “Ka ʻoku ʻi ai foki mo ha ʻuhinga ʻe taha ʻoku tau fai ai ʻení.”
“Ko e hā?”
“ʻOkú ke manatuʻi ne tau talanoa ʻi he efiafi fakafāmili ʻi ʻapí ki he Hāʻele ʻAngaua Maí?”
Naʻe kiʻi fakakaukau taimi nounou ʻa Keiti. “ʻOku ʻikai ko e to e hāʻele mai ia ʻa Sīsuú?
Ne pehē ange e Fineʻeikí, “ʻOku tonu ia.”
“ʻE hoko ia ʻa fē?”
“Sai, ʻoku ʻikai ke tau ʻilo. Ka ʻoku tau tatali kia Sīsū ke hāʻele mai, hangē pē ko e kau tauhisipí ʻi he ʻīmisi ʻo e ʻaloʻí pea hangē ko e kau palōfita ʻo e kuonga muʻá. Ko e ʻuhinga ia ʻe taha ʻo ʻetau tatali kae ʻoua kuo hoko e Kilisimasí ke toki tuku e pēpē ko Sīsuú ki he ʻīmisi ʻo e ʻaloʻí—ke fakamanatuʻi mai ʻoku tau tatali mo kitautolu foki kia Sīsū.”
Fehuʻi ange ʻe Keiti, “ʻE toe hāʻele mai ki ha ʻaiʻangakai ʻo e manú?”
“ʻIkai, he ʻikai toe pēpē Ia. Ko e taimi ʻe toe hāʻele mai ʻa Sīsuú kuo ʻosi toetuʻu ia. Ka ʻoku fakamanatu mai ʻe he ʻaiʻangakai ʻo e manú ʻoku ʻikai ke ʻi ai ha tahá ʻo hangē ko hoʻo tatali ki he pongipongi Kilisimasí, pea hangē ko e tatali ʻa e kakaí ke hāʻele mai ʻa Sīsū ki māmaní, ʻoku pehē ʻa ʻetau tatali ko ʻeni ke toe hāʻele maí. Naʻe ʻikai ke mole meiate kitautolu ʻa e pēpē ko Sīsuú. Ko ha konga pē ʻeni e founga hono fakamanatua Ia ʻe he fāmilí.”
Ne malimali pē ʻa Keiti mo pehē ange, “ʻOku fie maʻu pē ke tau tatali.”
Ne pehē ange e Fineʻeikí, “ʻOku tonu ia.”
“Lolotonga ʻetau talí, ʻe lava ke ta taʻo ha ngaahi kūkisi melie?”