Ko e Mana Maʻongoʻonga Tahá

ʻI ha ʻaho laʻā lelei ʻi Sepitema, ne hoko ai ha fakatuʻutāmaki lahi ki he kā ne ʻi ai ʻema taʻahine siʻisiʻi taha ko ʻĒliká. Naʻe fakapuna ia ʻi ha helikopeta ki he falemahakí, pea hili ha tafa fakavavevave ʻi ha ngaahi houa lahi ne ma maʻu e ongoongo fakamamahi kuo mālōlō homa ʻofefine taʻu 17 fakaʻofoʻofa mo fiefiá.

Naʻe fakamamahi kiate kimaua ʻa e ngaahi māhina siʻi hono hokó. Naʻá ma kātekina hono ʻaho fāʻeleʻí mo e Fakafetaʻí (Thanksgiving) pea teuteuʻi kimaua ki homa ʻuluaki Kilisimasi he ʻikai ke mau fakataha aí. Naʻe fakatokanga mai ʻa e kakaí ʻe faingataʻa ʻa e ngaahi ʻaho mālōloó, ka naʻe ʻikai ha faʻahinga fakatokanga ʻe lahi feʻunga ke ne teuteuʻi kimaua.

Makehe mei he ongoʻi lōmekina ʻi he loto mamahi lahí mo e tuēnoá, naʻá ku meheka ʻi he ngaahi fāmili kehe naʻe fakataha mo kātoanga fiefiá. Naʻá ku fifili lahi ai, “Ko e hā ʻoku hoko ai ʻeni kiate kimauá? Ko e hā naʻe ʻikai foaki mai ai ha mana hangē ko ia ʻoku fakamatala ʻe he niʻihi kehé?”

Lolotonga ʻeku ongoʻi loto mamahí, ne u manatuʻi ha taimi naʻe fakahoko ai ʻe homau uōtí ha ʻekitivitī naʻe ui ko e “Kilisimasi ʻi Pētelihemá.” Naʻe ō mai ʻa e kāingalotu ʻo e uōtí kuo nau ʻosi teuteu ʻo hangē naʻa nau moʻui ʻi he kuonga naʻe ʻaloʻi ai ʻa Sīsuú. Naʻe tui ʻe ʻĒlika, ʻa ia naʻe taʻu fā he taimi ko iá, ha kofu hinehina motuʻa lōloa mo ha holoholo naʻe haʻi takai ʻaki hono ʻulú. Ko e aofangatuku ʻo e efiafí ko hano fakafaivaʻi ʻo e ʻAloʻí ʻi ha fale tauhiʻanga ʻo e fanga monumanú naʻe faʻu pea teuteuʻi ʻaki ha ngaahi haʻinga mohuku mo ha kiʻi ʻaiʻanga kai ʻo e manú. Naʻe fakatātaaʻi ʻe ha ongomātuʻa kei talavou mo haʻana kiʻi valevale ʻa Mele, Siosefa, mo e pēpē ko Sīsuú.

ʻI heʻemau tuʻutakai ʻi he ʻaloʻiʻangá, naʻá ku fakatokangaʻi kuo pulia ʻa ʻĒlika ia mei hoku tafaʻakí. Naʻá ku hohaʻa ka naʻe taʻeʻoua ʻeku fakatokangaʻi atu e kapa hono kofu hinehiná ofi ki he ʻaloʻiʻangá. Naʻe hiki leva ʻeku hohaʻá mei he manavasiʻi naʻa hoko ki ai ha meʻá ʻou manavasiʻi naʻá ne maumauʻi ʻa e polokalamá. Naʻá ku mei ui atu, ka naʻá ku toe longo pē ʻo mamata ʻi heʻene lue atu ki he ʻaiʻangakai ʻo e manú.

Naʻe tūʻulutui fakalongolongo pē ʻa ʻĒlika ofi kia Mele pea hanga hake ki ai ʻo hangē ʻokú ne kole ha ngofuá. Pea toki ala atu leva ʻa ʻĒlika ʻo amoamohi fakalelei ʻa e kiʻi pēpē ne mohé. Naʻe ʻikai ko au pē naʻá ku fakatokangaʻí. Naʻe ʻikai hano taimi kuo fakalongolongo mo e niʻihi kehé mo nau mamata ʻi heʻene tūʻulutui ʻo ofi ki he pēpeé. Naʻe mafola ha ongoʻi ʻofa ʻi he kakaí ʻi heʻenau fakatokangaʻi ko e pēpeé ni ko e valevale ia ko Kalaisí, kia ʻĒlika.

ʻI heʻeku mamahí, naʻe ʻomai ʻe he manatu ki he Kilisimasi ko ʻení ha ngaahi ongo ʻo e nonga mo e fakafiemālie, ʻi heʻeku manatu ki he līʻoa ʻeku kiʻi taʻahine kei siʻí. Naʻe fonu ʻeku fakakaukaú ʻi ha ngaahi fehuʻi fekauʻaki mo e moʻuí pea mo e maté—ha ngaahi fehuʻi naʻe hangē naʻe ʻikai ke fuʻu mahuʻinga fēfē kimuʻa he mālōlō ʻa ʻĒliká. ʻI heʻeku fakakaukau loto ki he Toetuʻú mo e Tutukí, naʻá ku hangē ko Melé. Naʻe ʻofa heʻene Tama toki ʻaloʻí, peá ne kātekina kimui ha mamahi mo ha loto mamahi kāfakafa ʻi heʻene siotonu ki Heʻene faingataʻaʻia mo pekiá. Naʻe ʻikai fakahaofi ʻa Kalaisi mei heʻene kātekina e mamahi ʻi he kolosí, pea naʻe ʻikai hao ʻa Mele mei heʻene mamahí.

ʻOku tau fakamanatua ʻi he Kilisimasí ʻa e kamata ʻo e moʻui ʻa e Fakamoʻuí ʻi māmaní, ka kiate au, ʻe fakatahaʻi maʻu ai pē he taimí ni Hono ʻaloʻí mo ʻEne faingataʻaʻiá, pekiá, mo e Toetuʻú—ko e Fakalelei. ʻOku ou ʻilo ʻoku ʻikai ko e ngataʻangá e mālōlō ʻa ʻĒliká koeʻuhí he naʻe maumauʻi ʻe he Fakamoʻuí ʻa e ngaahi haʻi ʻo e maté. Ko e mana ia ke fakamālōʻia—ko e mana maʻongoʻonga taha ʻo e kuonga kotoa pē.