Hello, Gamayng Karnero

Gitabangan nako ug sa akong bana ang among anak nga babaye ug ang iyang duha ka anak nga mga lalaki sa airport, diin nag-andam sila sa ilang pagbiyahe balik sa ilang balay. Among gitabangan ang among anak samtang siya naningkamot sa pagpahimutang sa mga gamit, pag-asikaso sa mga passport, ug pagdala sa iyang lihukan nga tres anyos nga anak. Si Tommy, ang among usa ka tuig nga apo, natulog sa iyang stroller hangtud kalit siya nga nakamata. Nalisang siya sa grabeng kasaba sa dapit, hayag nga mga suga, ug sa kaguliyang.

Akong nakita ang iyang panagway ug nasayud unsay mahitabo, maong akong gitawag akong anak. Dali-dali siyang miduko, gihikap ang nawong ni Tommy, giatubang siya, ug mahigugmaong miingon, “Hello, gamayng karnero.”

Diha-diha dayon ang iyang nangunot nga agtang, nagtibi nga ba-ba ug daw nakuyawan nga abaga mirelaks na samtang ang iyang tibuok lawas nanghupaw sa kahupay. Mipahiyom siya og gamay sa dayon niyang pagpiyong og balik. Ang iyang kahadlok napulihan og kalmang kasiguroan ug kalinaw nga daw misanap kaniya. Kadto gamay apan gamhanang pagpakita sa pagsalig ni Tommy sa iyang inahan. Ang iyang pamilyar nga hikap, tingog, ug presensya mihupay kaniya.

Sama ni Tommy, kitang tanan mobati og kahadlok, walay kasiguroan, ug nabug-atan. Makahupay nga masayud nga si Jesukristo, ang Maayong Magbalantay, nagtawag kanato. Siya nakaila sa Iyang panon, ug kita hingpit nga makasalig Kaniya. Mahigugmaon siyang miingon, “Kaninyo ibilin ko ang kalinaw, kaninyo ihatag ko ang akong kalinaw. … Kinahanglan dili magkaguol ang inyong kasingkasing, ni magtalaw” (Juan 14:27).

Nasayud ko nga panahon sa pagduha-duha kita makadawat og kahupayan ug kasiguroan samtang kita modangup sa Maayong Magbalantay uban sa hugot nga pagtuo ug pagsalig. Kon napanalanginan ko nga mahupay taliwala sa kasamok, ganahan kong hinumduman ang panghitabo sa airport uban sa akong anak ug apo. Sama ni Tommy, makaginhawa ko nga nahupay samtang ang akong mga palas-anon napagaan. Atol niadtong mga panahona, mibati ko og personal nga “Hello, gamayng karnero” gikan sa akong Magbalantay.