Pagtuman sa Adlaw nga Igpapahulay

Alang sa kadaghanang mga tawo, ang Dominggo usa lang ka ordinaryong adlaw sa semana alang sa dugang pagpahulay ug paglingaw-lingaw. Apan, ang karaan ug bag-ong pagpadayag nagtudlo sa kaimportante sa pagbalaan sa adlaw nga Igpapahulay. Sa mga pahina 56–57 niini nga isyu, si Larry M. Gibson, first counselor sa Young Men general presidency, naghisgut sa importante nga bahin sa pagtuman sa adlaw nga Igpapahulay. Miingon si Brother Gibson, “Ang paagi sa atong pagbalaan sa adlaw nga Igpapahulay mao ang pagpakita sa atong pakigsaad sa paghinumdom kanunay ni Jesukristo.”

Samtang ang inyong mga anak magkat-on sa pagtuman sa pagbalaan sa adlaw nga Igpapahulay, sila maandam sa pagdawat og daghang mga panalangin. Sama sa giingon ni Brother Gibson, “kon kita mosunod ug mopuyo sa balaan nga sugo sa pagbalaan sa adlaw nga Igpapahulay, ang Ginoo, mopanalangin nato, mogiya nato, ug modasig nato sa pagsulbad sa mga problema nga moabut nato.”

Mga Sugyot sa Pagtudlo sa mga Batan-on

Basaha og dungan ang artikulo ni Brother Gibson sa mga pahina 56–57. Dayon hisguti unsay buhaton sa inyong pamilya matag semana aron makaandam sa pagbalaan sa adlaw nga Igpapahulay. Sa family home evening, mahimo ninyong kantahon ang “Gently Raise the Sacred Strain” (Hymns, nu. 146) o lain nga himno kabahin sa Igpapahulay ug hisguti unsay mahimo sa inyong pamilya sa Dominggo aron mabalaan ang adlaw nga Igpapahulay.
Ikonsiderar sa pagbasa uban sa inyong tin-edyer sa seksyon sa pagtuman sa adlaw nga Igpapahulay sa Alang sa Kalig-on sa mga Kabatan-onan, lakip sa mga kasulatan nga gilista diha sa katapusan. Kamo mahimong dungan nga mangita og uban pang mga kasulatan kabahin sa pagbalaan sa adlaw nga Igpapahulay ug hisguti ang mga baruganan nga anaa sa pagtuman sa adlaw nga Igpapahulay.
Kon ang bag-ong kurikulum sa kabatan-onan anaa sa inyong pinulongan, mahimo ninyong gamiton ang mga leksyon sa pagpangita og mga artikulo o video kabahin sa pagtuman sa adlaw nga Igpapahulay. Adto sa lds.org/youth/learn. Ang mga leksyon sa bulan sa Septyembre kabahin sa kasugoan makatabang niining hilisgutan.

Mga Sugyot sa Pagtudlo sa mga Bata

Basaha ang “Bag-o nga Deacon” sa Oktubre 2013 nga Liahona ug hisguti ang kaimportante sa sakrament sa pagbalaan sa adlaw nga Igpapahulay.
Ikonsiderar sa pagbasa ang “Usa ka Leksyon sa Balaang Pagtahud” sa Marso 2010 Liahona; mahimo usab ninyong buhaton ang kalihokan nga nalakip sa artikulo. Hisguti uban sa inyong mga anak kon sa unsang paagi ang balaang pagtahud diha sa simbahan makatabang sa pagbalaan sa adlaw nga Igpapahulay.
Hisguti unsa ang mahimo sa inyong pamilya sa Dominggo aron sa pagtahud sa Ginoo. Mahimo ninyong basahon ang “Desisyuni Karon Dayon” sa Marso 2012 Liahona alang sa ehemplo sa usa ka tawo nga nagbalaan sa adlaw nga Igpapahulay bisan sa malisud nga kahimtang.
Uban sa inyong mga anak mahimo mong mokanta og pipila ka kanta nga may kalabutan sa adlaw nga Igpapahulay, lakip ang “Sabado” (Songbook sa mga Bata, 105). Hisguti ang mga pamaagi kon unsaon sa inyong pamilya paggamit ang Sabado ug ubang mga adlaw sa semana aron sa pag-andam alang sa Dominggo.

Paghulagway pinaagi ni Taia Morley