Ang Biyahe ni Mamá Sefi ngadto sa Templo

Usa ka adlaw samtang anaa ko sa opisina sa Mexico Mission niadtong mga 1940, usa ka sister miabut gikan sa gamayng lungsod sa Ozumba, nahimutang sa tiilan sa Popocatépetl, usa ka aktibong bulkan mga 43 ka milya (70 km) sa habagatang silangan sa Siyudad sa Mexico. Kaila mi niya. Ang iyang ngalan mao si Mamá Sefi.

Ang full-time nga mga misyonaryo mipuyo sa iyang gamayng panimalay nga hinimo sa beka, diin aduna siyay giandam nga kwarto para lang kanila. Si Mamá Sefi, wala gani kaabut og lima ka pye (1.5 m) kataas, nanginabuhi pinaagi sa pagbaligya og prutas sa mga merkado sa mga lungsod libut sa Ozumba. Ang kada lungsod adunay lain-laing adlaw sa pagpangumpra, ug moadto siya sa kada merkado aron ibaligya iyang prutas.

Siya miadto sa opisina sa misyon nianang adlawa nga nagdala og usa ka sako sa harina. Napuno kini sa tostones, mga silver nga sinsilyo nga tag-singkwenta centavos nga iyang gitigom sa daghang mga tuig. Pipila niini gikan pa sa panahon ni Porfirio Díaz, kinsa nagdumala sa Mexico gikan 1884 hangtud 1911. Si Mamá Sefi mibiyahe gikan Ozumba ngadto sa mission home sakay sa bus uban sa iyang kwarta nga gisulod sa sako. Iyang giingnan si President Arwell L. Pierce nga nagtigom na siya sulod sa daghang tuig aron makabiyahe siya ngadto sa Salt Lake Temple aron madawat iyang endowment.

Nakakuha siya og pagtugot sa pagbiya sa nasud, gipahulam siya og malita sa usa ka misyonaryo, ug amo siyang gipasakay sa tren. Nanawag si President Pierce gamit ang telepono sa usa ka tawo didto sa El Paso, Texas, aron mosugat niya diha sa tren tabok sa utlanan sa U.S. ug pasakyon si Mamá Sefi sa bus padulong sa Siyudad sa Salt Lake. Ang mga miyembro sa Spanish branch sa Siyudad sa Salt Lake mao ang mosugat niya diha sa bus, moasikaso sa iyang mga panginahanglan, ug motabang niya didto sa templo.

Pipila ka semana ang milabay, si Mamá Sefi mibalik sa Siyudad sa Mexico ug dayon sa iyang balay sa Ozumba. Luwas niyang nahimo kadtong taas nga biyahe. Dayon mibalik siya sa pagpamaligya og prutas sa mga merkado.

Si Mamá Sefi dili makasulti og Iningles, busa amo siyang gipangutana kon giunsa niya pag-order og pagkaon samtang nagbiyahe sakay sa bus gikan sa El Paso ngadto sa Siyudad sa Salt Lake—sulod sa pipila ka adlaw. Siya miingon nga adunay tawo nga mitudlo kaniya unsaon sa pagsulti og “apple pie” sa Iningles, busa matag higayon nga ang bus mohunong para mangaon, siya mo-order og apple pie.

Tungod kay mao lang kadto ang pulong nga iyang nasayran sa Iningles, apple pie lang ang iyang gikaon atol sa iyang pagbiyahe sakay sa bus didto sa Amerika—pag-adto ug pag-uli. Apan wala kini panumbalinga ni Mamá Sefi. Hinoon, mibalik siya nga mapasalamaton ug masanagon sa iyang kasinatian didto sa templo.