Ano ang Nakikita Mo?
Kapag pinag-aaralan natin at pinag-iisipang mabuti ang mga simbolo sa mga ordenansa ng ebanghelyo, ang ating kaisipan ay nasesentro kay Jesucristo.
Dahil nasa paligid natin ang mga simbolo, madalas ay hindi natin gaanong iniisip ang tungkol sa mga ito. Ngunit ang pagbibigay-pansin sa mga simbolo ng ebanghelyo ay maaaring maging susi sa higit na pagkaunawa.
Ginagamit ng mga banal na kasulatan ang salitang tulad ng uri, anino, sagisag, tanda, talinghaga, pag-alaala, saksi, o patotoo upang ilarawan ang isang bagay na naglalayon na ituon ang ating isipan sa iba pang bagay na mahalaga (tingnan sa Moises 6:63). Halimbawa, nang pinasimulan ni Jesus ang sakramento sa Huling Hapunan, ibinigay Niya sa Kanyang mga disipulo ang pira-pirasong tinapay na kakainin nila at sinabing, “Ito’y aking katawan, na ibinibigay dahil sa inyo: gawin ninyo ito sa pagaalaala sa akin” (Lucas 22:19). Ngayon, malinaw na malinaw na ang tinapay ay hindi literal na Kanyang katawan; tulad ng sabi Niya, ito ay para ipaalala sa atin ang Kanyang katawan—at marami pang iba. Iyan ang dahilan kaya napakabisa ng mga simbolo—nagpaparating ito ng mensahe nang hindi gumagamit ng wika at nagpapaalala ng ilang magkakaugnay na kaisipan nang sabay-sabay, na nagdaragdag ng lalim at kahulugan.
Mangyari pa, ang mga ordenansa ay hindi lamang gawaing may isinisimbolo; naghahatid ang mga ito ng tunay na kapangyarihan para pagpalain tayo sa pamamagitan ng awtoridad ng priesthood. Ngunit naglalaman din ang mga ito ng mga simbolo na nagtuturo sa atin tungkol sa Tagapagligtas at sa ating mga tipan. Maging ang pagpapailalim sa at pagtanggap ng ordenansa ng priesthood ay panlabas na palatandaan ng pananampalataya at kababaang-loob ng isang tao. Narito ang marami sa mga simbolo na may kaugnayan sa mga ordenansa ng binyag, kumpirmasyon, at ng sakramento, gayundin ang ilan sa mga ideyang nauugnay sa mga ito.
Binyag
Tubig: paghuhugas, paglilinis, pagpapadalisay mula sa kasalanan
Puting damit: kadalisayan (“walang sino mang tao ang maliligtas maliban kung ang kanyang mga kasuotan ay nahugasang maputi … [at dinalisay] sa pamamagitan ng dugo ni [Cristo]” [Alma 5:21]); pagkakapantay-pantay (mayaman man o mahirap, lahat ay magsusuot ng gayon ding damit sa binyag, sapagkat “pantay-pantay ang lahat sa Diyos” [2 Nephi 26:33])
Nakataas na kanang kamay: nakataas ang kamay tungo sa langit, nangangako sa langit; tanda rin ng panunumpa (tingnan sa Genesis 14:22; Daniel 12:7)
Paglulubog: ang kamatayan, libing, at Pagkabuhay na Muli ni Cristo (tingnan sa Mga Taga Roma 6:3–4); ating espirituwal na pagsilang kay Cristo (“ipanganak ng tubig” [Juan 3:5])
Kumpirmasyon
Pagpapatong ng mga kamay: pisikal na paghawak ng mga kumakatawan sa Diyos, pagbibigay sa iba ng mga pagpapala na mula sa Diyos
Pagtanggap ng kaloob na Espiritu Santo: tinatawag na “pagbibinyag ng apoy” (tingnan sa 2 Nephi 31:13); paglilinis at espirituwal na pagsilang kay Cristo
Sakramento
Paglalagay ng tinapay at tubig sa harap ng kongregasyon: mga simbolo ng sakripisyo ni Cristo, na winakasan ang pag-aalay ng hain sa pamamagitan ng pagbuhos ng dugo (tingnan sa Alma 34:13–14); naghahandog tayo ngayon ng “hain sa Panginoon … [na] bagbag na puso at nagsisising espiritu” (D at T 59:8)
Pagpuputol-putol ng tinapay: paghihirap ng katawan ni Cristo para sa ating kapakanan, ang Kanyang pisikal na kamatayan, Kanyang Pagkabuhay na Muli upang tayo ay mabuhay na muli
Pagluhod para manalangin: pagpapakumbaba, pagpapailalim sa kalooban ng Diyos; tanda ng walang-hanggang tipan (tingnan sa D at T 88:131)
Pagkain ng tinapay: pag-alaala sa katawan ni Jesucristo (tingnan sa Mateo 26:26–29), ang tinapay ng kabuhayan (“ang lumalapit sa akin ay hindi magugutom” [Juan 6:35], “ang kumakain ng tinapay na ito ay mabubuhay magpakailan man” [Juan 6:58])
Pag-inom ng tubig (alak noong una): ang dugo ni Cristo (ibinuhos sa Getsemani, sa Kanyang pagdurusa sa kamay ng mga kawal, at sa krus), na “[naglilinis sa atin] sa lahat ng kasalanan” (I Ni Juan 1:7) at “nasa tipan ng Ama tungo sa ikapagpapatawad ng [ating] mga kasalanan” (Moroni 10:33); dugo bilang “pinakaugat ng buhay o kinakailangang lakas ng lahat ng laman” (Gabay sa mga banal na Kasulatan “Dugo”; scriptures.lds.org) at yaong nagbabayad-sala para sa mga kasalanan sa pamamagitan ng sakripisyo (tingnan sa Levitico 17:11); tubig na buhay (tingnan sa Juan 4:14)