100 na Yabaki ni Lotu Vakamatavuvale
Sa kilai tu ni vula oqo sa yacova kina na ika 100 ni yabaki na nodratou vakauqeta na Mataveiliutaki Taumada vei ira na lewenilotu mera dau vakayacora na lotu vakamatavuvale. Na veika e volai toka oqo e tauri mai na dua na ivola mai vei iratou na Mataveiliutaki Taumada ena kena a tavoci na lotu vakamatavuvale. E a tavoci ena Epereli 1915 ka tabaki sara ena Improvement Era ena June 1915 (tabana e 733-34) Sa vakacokotaki na matanivola lelevu kei na icegutaro (panituweti).
iTaba iloloma ni Valenivola ni iTukutuku ni Lotu
Kemuni na Taciqu kei na Ganequ:
Keitou vakasalataki kemuni na Yalododonu Edaidai mo ni vakamareqeta sara na ivunau ni Kalou ka soli ena Vunau kei na Veiyalayalati wase 68:
“Raica ko ira na itubutubu mai Saioni, se ena dua na iteki sa tauyavutaki tu, me ra vakavulici ira na luvedra ena ivakavuvuli dina ni ra sa yabaki walu; io na ivakavuvuli ni veivutuni, na vakabauti Jisu Karisito na Luve ni Kalou Bula, na papitaiso kei na isolisoli ni Yalo Tabu e na veitabaki ni liga; ia kevaka e sega, era na cudruvi kina; …
“Ia me ra vakavulici ira talega na luvedra me ra dau masu ka caka dodonu ena mata ni Turaga.” [raica na V&V 68:25, 28].
O ira na gone ni Saioni mera sa qaqarauni sara ga ena taqomaki ni ivakaro e a soli vei ira na Isireli ni gauna makawa ka mai vakavoui vei ira na gone
“Mo vakarokorokotaki rau na nomu iTubutubu me dede kina nomu bula ena vanua sa soli kina vei iko ko Jiova na nomu Kalou” [Lako Yani 20:12].
Na ivakatakila oqo e vaqaqacotaka ki na Yalododonu Edaidai, ka sa namaki vei ira na tama kei ira na tina ena loma ni Lotu oqo mera vakatavuvulitaka ka cakava na ivakaro oqo ena loma ni nodra matavuvale.
Keitou sa vakasalataka ka vakatura me sa tauyavutaki e dua na “lotu vakamatavuvale” ena loma taucoko ni Lotu, oqo na gauna vei ira na tama kei na tina mera vakasoqoni ira vata mai na luvedra tagane kei na yalewa ena nodra itikotiko ka vakavulici ira ena vosa ni Turaga. Ena rawa ni ra na vulica vakavinaka sara na ka e gadrevi kei na ka e vinakati baleta nodra matavuvale kei na gauna vata oqori era na qai kilai ira kina vakavinaka na gone kei na wekadra vakakina na ivakavuvuli ni kosipeli i Jisu Karisito. Na lotu vakamatavuvale oqo e dodonu me dau caka kina na masumasu, laga sere ni lotu, sere, kei na ivakatagi, wili iVolanikalou, veiulutaga vakamatavuvale, kei na veidusimaki eso ena ivakavuvuli vakosipeli vakakina na veileqaleqa ni bula, vakakina na itavi kei na yalayala ni gone vei ira na itubutubu, na vuvale, na Lotu, na itikotiko kei na vanua. Baleti ira na gonelalai, me caka na cavuqaqa e veiganiti, lagasere, italanoa, kei na qito ena rawa ni vakamacalataki mai. Rawa ni qai dua na ivakalomavinaka rawarawa sara e vakarautaki ga e vale mena qai vakayagataki.
Me kua soti ni vakabibitaki na veika e dau caka me rawa ni vakaitavi kece na lewe ni matavuvale ena lotu.
Na veisoqoni vakaoqo ena rawa ni vakavinakataka na veimaliwai vei ira na itubutubu kei ira na luvedra, ira na veitacini, kei na kena soli na madigi ni veivakasalataki, veivakayaloqaqataki, kei na ivakaro mai vei rau na itubutubu vei ira na luvedrau tagane kei na yalewa. E dau solia e dua na gauna vei ira na tagane kei na nodra vakavinavinakataka na nodra matavuvale ka me na rawa kina na yalayala ni Turaga vei ira me na vakavotukana kei na vakabalavutaki ni nodra bula kei na bula marau. …
Keitou … vakauqeti ira na itabagone mera na tiko voli ga e vale ena yakavi oqori ka vakayagataka na nodra kila me rawa ni taleitaki na nodra cau kei na nodra veidusimaki.
Kevaka mera talairawarawa na Yalododonu ena ivakasala oqo keitou yalataka na veivakalougatataki levu ena yaco mai. Ena laveti cake na veilomani mai vale vakakina na talairawarawa vei ira na itubutubu. Ena tubu na vakabauta ena yalodra na itabagone e Isireli, ka na nodra na kaukauwa me ra ravuta rawa kina na veivakayarayarataki ca kei na veitemaki ena yaco vei ira.
Oi Keitou na Veitacini,
Joseph F. Smith
Anthon H. Lund
Charles W. Penrose
Mataveiliutaki Taumada