Masu kei na Valenisokalou Eso

E rai cake o Dani ia se bera ga ni raica rawa na dela ni valenisoro. Era a lako mai ke o ira na lewe ni dua na lotu tani. Sega ni kila rawa o Dani se cava na vuna eratou lako mai kina ki na lotu oqo na nona matavuvale ena dua na Vakaraubuka, ia e tukuna o Ta ni ratou lako ki na dua na ka e vakatokai na Yavinisere.

“Na cava o ya?” Taroga o Dani.

“E dua na soqoni era lagasere, wili ivolanikalou, ka masu vata kina na tamata,” e tukuna o Ta. “Me vaka e dua na matavuvale levu ni sa oti e dua na siga.”

Taleitaka o Dani na kena irogorogo oya. Eratou gade tiko mai Igiladi na nona matavuvale. Ena Sigatabu sa oti eratou a lako ki na dua na tabanalevu ena dua na siti ka vakatokai o York. Ena lalai era kila kece na gonelalai na ivolanikalou kei na sere vata e kila o Dani. E kila o koya ni tabanalevu a lako kina e tiki ni nona lotu dina o Jisu, me vaka na nona tabanalevu mai vale.

Ia na valenisoro oqo e duatani sara mai na kena sa matau tu vua. E raica e dua teveli lailai ka sinai tu ena kadrala. E vakaraica toka o Dani ni waqaca e dua na gonetagane e dua na kadrala.

“Na cava o vakawaqa kadrala tiko kina?” E tarogi koya o Dani.

E matadredre na gonetagane. “Au dau waqara e dua na kadrala niu masulaka eso na ka bibi. Na balavu ga ni kena waqa tiko, au nuitaka ni na rogoca tiko na Kalou na masu.”

E vaka ga na irairai ni kadrala sa dau matau tu vei Dani. E veilecayaki vakalailai, ia e vinakata me vakarokoroko. E matadredredre vua na gonetagane.

Eratou dabe sobu o Dani kei na nona matavuvale, sega ni dede sa tekivu na Yavinisere. E raica na gonetagane vata ga ena vica na iyatu mai vei iratou. Oti qai kila ni sega ni kila e dua na sere era lagata tiko na tamata kecega. Ni ra masu, era wiliwili mai na dua na ivolalailai. E duatani na veika kece mai na veika sa matau tu vua.

Ia e totoka na ivakatagi, kevaka mada ga e sega ni kila. Oi qai tucake e dua na turaga me wilika na ivolanikalou. A vakaicurucuru tu, ka sega ni vakasutu kei na neketai me vaka na bisopi nei Dani. Ia ni tekivu wiliwili qai vakila o Dani ni kila na italanoa oya! E wilika tiko me baleta nona vakabula e 10 na vukavuka o Jisu.

“Ta,” e vakasolokakana o Dani “Au dau taleitaka na italanoa oqo.”

A dredre o tamana. “O au talega.”

Qai cabora na turaga vakaicurucuru e dua na masu. A kerea vua na Kalou me vakalougatataki ira era tauvimate se vakaleqai tu. Me vaka ga a vakayacora o Dani! A kerea talega me ra vakalougatataki na iliuliu ena nona lotu. Qai nanuma o Dani nodratou dau kerei Tamada Vakalomalagi nona matavuvale me vakalougatataki Peresitedi Thomas S. Monson kei rau nona daunivakasala.

A raragi mai na yaloi Dani. E kila o koya ni tukuna tiko vua na Tamada Vakalomalagi ni lomani ira kece na Luvena ka rogoca kece na nodra masu, kevaka mada ga ra lako ki na dua tale na lotu ka sega ni tu kina na taucoko ni kosipeli.

Ni ratou tucake me ratou lako, a raica o Ta nona talevoni. E rairai rarawa ni wilika na itukutuku. “Sa takali o Sisita Monson,” e kaya mai.

“Oilei!” E cavuta e yalona o Dani e dua na masu totolo me kua ni dua na leqa e yaco vei Peresitedi Monson.

“E vakaivei?” e taroga mai e dua. O koya na gonetagane mai liu. E rogoci Dani, ka vaka me lomaleqa mai.

“Sa takali o Sisita Monson,” e kaya o Dani. “O koya na watina na neimami parofita, o Peresitedi Monson.”

“Vosoti au,” e kaya mai ena yalovinaka. “Au na waqaca e dua na kadrala me baleti koya.”

Matadredredre o Dani ka vakavinavinaka. E nanuma ni sa dua na ka vinaka me cavuta e dua na masubibi ena vukui Peresitedi Monson na gonetagane oya. E kila ni na rogoca na Tamada Vakalomalagi na masu e cavuta o koya kei na masu e cavuta na gonetagane.