O Cei na Nomu Qaqa?
Na dauvolaivola e vakaitikotiko e California, Amerika.
O Ellie a kila se o cei na nona qaqa, ia a rere vakalevu okoya me tukuna.
“Stand by your conscience, your honor, your faith; stand like a hero” (Children’s Songbook, 158).
E katia ena yalolailai o Ellie na itaukuku ni idovidovi ni kena. A vakamuria voli o Miss Fitz na iyatu teveli ka tarogi ira yadua na gonevuli ena dua na taro, vakayadua.
“O Cei na Nomu Qaqa?” A tarogi Jeremy o MissFitz.
E sega ni vakaoti gauna o Jeremy ni sauma lesu. “O tamaqu!” a kaya vakadokadoka.
A mata marau o Misi Fitz. “Kei na nomu, Sarah?”
Na kena isau a lako talega mai vakatotolo. “Abraham Lincoln.”
A vakila o Ellie na tavatukituki ni utona ni tomana sobu yani o Miss Fitz na iyatu ni gonevuli. Era a veivosaki voli me baleti ira na qaqa eso ena siga taucoko, ka sa dodonu oqo mera tukuna kece se o cei na nodra qaqa—ena mata ni kalasi taucoko!
A tukuna o Amber kei Justin ni nodrau qaqa o tinadrau. A tukuna o Walter ni nona o tukana. E vica tale na gonevuli a kaya ni nodra e dua na tui se dua na peresitedi.
E lailai sara na gonevuli sa vo tiko ni bera ni yacovi Ellie yani o Miss Fitz. Sa dodonu me na vakasamataka e dua na qaqa—ka vakatotolo.
A raica sobu o Ellie na nona ivava, ena madua. Na vakatakilai ni dua na qaqa e sega dina ni leqa. Sa kila taumada okoya o cei na nona qaqa. Oya o Jisu Karisito. E a vakabulai ira na tauvimate o Koya, vakaturi ira cake na mate, ka sauma na isau ni valavala ca ni tamata taucoko. Sa i Koya na qaqa levu duadua a bula taumada! E a rere voli ga okoya me tukuna.
A katia tale na itaukuku ni idovidovi ni kena o Ellie ena vakasamataki ni kena tukuni ki na kalasi taucoko ni o Jisu Karisito e sa nona qaqa. Vakacava ke a dredrevaki koya o Jeremy? Vakacava ke rau vakasolokakanataki koya o Sarah kei Amber ena gauna ni vakacagicagi?
Sa kila okoya vakaidina ni o Jisu Karisito na nona qaqa. Ia oya e sega ni kena ibalebale mera na kila talega na tamata kece.
A duri matua tu o Miss Fitz ena mata saraga ni teveli nei Ellie ka matamarau. “Sa o cei na nomu qaqa, Ellie?”
A vakaraici ira na iyatu gonevuli e yasana o Ellie me yaco kivei Miss Fitz. “Abraham Lincoln,” a vakasolokakanataka okoya.
A qoroqoro o Miss Fitz. “Vinaka!” a kaya okoya ni lakova yani na iyatu ni gonevuli ka tarava.
Ni gauna ga a yali kina okoya, e taluva saraga ena vakacegu na icolacola nei Ellie. Vinaka ni sa oti yani oya. Na iotioti ni ka a gadreva tu okoya oya mera kila na lewe taucoko ni kalasi ni nona qaqa o—
“Jisu Karisito,” a kaya e dua na domo.
A wadra na matai Ellie ni vakararai yani vakamalua. Oya—vakalailai sobu ga na iyatu—a dabe koto kina e dua na gonetagane lailai ulu veinoki. E a lila ka madua okoya, ka sa dau dabe tu ga ena imuri ni rumu ni kalasi. E sega mada ga ni kila na yacana o Ellie. A sega ni nanuma rawa ni a tukuna mada okoya e dua na vosa—me yacova mai oqo.
Era a vuki e vica na gonevuli mera wadrava na gonetagane, ia a sega ni siqemi ira okoya. A raici Miss Fitz cake ga okoya ka kaya tale. “Na noqu qaqa o Jisu Karisito.”
A serau na matamarau nei Miss Fitz ena nona tomana sobu na iyatu. Ia o Ellie a wadrava na gonetagane ena kurabui. E a rere voli okoya me tukuna vei ira taucoko me baleta na nona qaqa, ia na gonetagane a sega ni rere. Erau sega mada ga ni lotu vata. Ia a kila okoya na bibi ni nona duri donu tu me dua na ivakaraitaki i Jisu Karisito, veitalia na kena dredre.
A matamarau o Ellie kivua na gonetagane. Sa na sega tale ni qai rere okoya me tukuna se o cei na nona qaqa. Va oya, sa rua na nona qaqa ena gauna oqo.