“Au Rai Vei Kemuni”

Ena yakavi ka tarava keirau basika yani ki na nona vale na gonetagane oqo, ka vakarau tu me veivakavulici. Keirau kurabuitaka ni keirau kila ni vinakata talega o Pak Mi-Jung me keirau vakavulica na luvena yalewa, o Kong Su-Jin. Me vaka ni keirau vulagi yani ki nodratou vale, sa mani vinakata talega o Pak Mi-Jung me dabe tiko ena lesoni. Keirau marautaka dina me keirau vakavulici ira na kena levu ga era vinakata me ra vakarorogo.

Ni oti nodratou solia vei keirau eso na ivakalomavinaka, keitou dabe vata ka tekivu veitalanoa. Sega ni keitou sa tekivuna sara na lesoni, ia a vinakata taumada o Pak Mi-Jung me kilai keirau mada vakavinaka ka tukuna vei keirau na ituvaki ni nona matavuvale. A tukuna vei keirau na veivakatovolei kei na dredre eratou a sotava mai, okati kina na nona valuta tiko na kenisa na luvedrau tagane. Sa qaravi oti ena veiqaravi ni cina vakavuniwai, sa tarovi toka kina na kenisa ena gauna oqo, ia era vakasalataka tiko na vuniwai ni rawa ni basika tale mai ena dua ga na gauna. E vakila sara vakalevu na dredre na matavuvale ena ka oqo. Na nodratou matavuvale e kalasi ga vakacakacaka, ka dau cakacaka sara vakaukauwa na tamadratou me rawa mada ga ni ratou toka ena dua na vale ka kana tiko.

Au kurabui ka rarawataka na veivakatovolei ena nodratou bula. E sega ni rawarawa vei iratou na bula, ia na veivolekati ena loma ni matavuvale sa ivakadinadina levu au qai bau raica ena dua na matavuvale au sotava e Korea, ka levu sara na ka e tukuna me baleta e dua na vanua yavutaki ena bula vakamatavuvale me vakataki Korea. Keirau biubiu mai na nodratou itikotiko ena yakavi oya ni sa yaco me keirau kila vakavinaka cake na matavuvale oqo ka rawa ni keirau wasea vei iratou na itukutuku ni kosipeli.

Keirau a lesu tale vakavica kei noqu itokani ena macawa oya ka veivakavulici, ka keirau vakila tiko ena veigauna yadua oqori na raragi kei na yalovinaka keirau a vakila ena imatai ni neirau veisiko. Ni basika mai na ulutaga ni papitaiso, erau sa nanamaki tiko na gone me rau curu ki na Lotu. Ia, e sega ni yalonanamaki vakakina na tinadrau. E dina ni tarai koya na ivakavuvuli ka nuitaka ni dina, ia e sega ni vakabauta ni rawa ni cakava ka rokova na mataqali yalayala e gadrevi ena noda lewena na Lotu. E sega talega ni nanuma ni kilikili vua me papitaiso ka segai na watina, ka keitou se bera tiko ni sota. Ia, e lomasoli tu me tomani tiko nona sota vata kei keirau ka vinakata talega me lako vata yani kei rau na luvena ki lotu.

Ena mua ni ikarua ni macawa oya, ni keirau veivakavulici tiko ena nona vale, keitou qai sota kei watina, o Kong Kuk-Won—e dua na turaga yalomalumalumu, vakaturaga, ka yalovinaka. E duavata kei keitou ena iotioti ni vica na veitalanoa ka vakabauta sara na veika kece keirau vakavulica, okati kina na ivunau dau dredre vei ira tale eso me vaka na ikatini kei na Vosa ni Vuku. Ena loma ni bula dredre vakailavo, sa tekivu me ratou soli ikatini. Na itatao duadua ga vei tamadratou ni dau cakacaka ena Sigatabu. E dau cakacaka ena rara ni waqavuka levu mai Seoul ena Veisigatabu, e sega kina ni rawa ni dau lotu kei iratou na vo ni nona matavuvale. E dina ni tu na osooso vakacakacaka, rau tuva kei na watina me rau na tiko ena nodrau papitaiso na luvedrau ena Sigatabu ka tarava.

Ni oti nodrau papitaiso na gone, keitou dau sota ena veigauna eso ena nodratou vale. Keitou dau lotu vakamatavuvale, veiwasei ena ivolanikalou kei na veika dau veilaveti eso, ka vakaveikilaitaki iratou vei ira na lewe ni tabanalevu. Ia, mai na veika vakosipeli dau sotavi, se bera ga ni voleka me rau papitaiso na itubutubu.

Ena loma ni gauna oqori sa lesi na noqu itokani, ka noqu itokani vou e dua na cauravou se qai lesu sara ga mai na koronivuli ni kaulotu. E sinai ena vakabauta, igu, kei na yalonanamaki, ka dredre toka na noqu tovolea me keirau salavata tiko. Ni oti neitou sota vakavica kei rau o Kong Kuk-Won kei Pak Mi-Jung, a lako mai na noqu itokani ka taroga se keirau a sa bau lolo vata kei rau kei noqu itokani e liu. Se bera. Se bera vakadua ni bau basika vei au na vakasama oya. Keitou sa mani sota kei na matavuvale ka vakatura me dua na lolo. Au kurabui niu kila ni ratou sa dau lolo tiko vakataki iratou ena so na gauna, me baleta na bula ni luvedrau tagane ka vakakina me veisau na gauna ni cakacaka me rawa kina vei Kong Kuk-Won me mai lotu. Ni oti neirau duavata kei iratou ena lolo kei noqu itokani, a saumi na neirau masu ka veisau na gauna ni cakacaka nei Kong Kuk-Won. Ia se bera ga ni veisau na vakasama nei Pak Mi-Jung me baleta ni na sega ni papitaiso.

Qai dua tale na vakasama totoka nei noqu itokani. Qai dreta mai nona ivolanisere tawaitaga ka kerea me keitou lagasere vata. E dina ni keitou sa dau lagasere vata e liu, au se bera vakadua ni raici Pak Mi-Jung me lagasere kau dau nanuma ga ni sega ni taleitaka na lagasere se baleta beka ga ni vou vua na sere. A tarogi koya na noqu itokani se dua beka nona serenilotu taleitaki, au qai kurabui, ni sauma mai ka kaya ni tekivu mai na gauna se gonelailai, dau nona serenilotu taleitaki “AuRai Vei Kemuni” (Sere ni Lotu, naba 51). Keitou tekivu ena domova, lagalaga o tamadratou, alto o tinadratou, tena noqu itokani, kau besi.

Kaukauwa sara na vakilai ni Yalotabu ena rumu. Ni keitou lagata na ikatolu ni qaqana, sa luluvu na lomana, ka sega ni rogo na domona ni toso neitou lagasere:

Ni keitou tinia na ikava ka iotioti ni tikina, sa mamakeukeu toka. Ni tovolea na watina me vakalogavinakataki koya, a yalodoudou mai. A raica mai vakadodonu na mataqu ka kaya, “Au gadreva meu papitaiso.”

iVakatakilakila

drawing of woman holding an Asian hymnbook

Na nodrau lotu ni papitaiso o Kong Kuk-Won kei Pak Mi-Jung ena yakavi ni Sigatabu oya e dua ka vakilai vakalevu kina na yalotabu ena noqu kaulotu. Erau vakaitavi ena parokaramu na luvedrau, ka ra tiko kina e lewelevu na lewenilotu e kea me ra vakaraitaka nodra veitokoni ki na matavuvale saumaki vou duadua mai ena tabanalevu. Keirau a lagata kei na noqu itokani e dua na sere digitaki: “Au Rai Vei Kemuni.”

Sa mani oti noqu kaulotu kau lesu tale ki vale. Ni oti e dua na yabaki ena koliji, au lesu tale i Korea ena vulitara ni vulaikatakata, ena veimuanimacawa yadua au dau sikovi ira yadua na vuqa na itokani kei na matavuvale au a sotova ena noqu kaulotu. Ni oti e vica na macawa au a lesu tale ki Balsan ka sota kei na matavuvale digitaki oqo. Niu yaco yani ki nodratou vale au raica ni yali tiko e dua—na luvedrau tagane. Ni tonawanawa tu na wainimatana, e talanoataka o Pak Mi-Jung na itukutuku: a lesu tale mai na kenisa vei luvedrau tagane, ni yabaki 14, a vakadrukai ena ivalu kei kenisa.

Niu tovolea meu vakaraitaka na noqu lolosi ka sotava na mosiniyalo, a vakadeitaka vei au o Kong Kuk-Won ni na sega ni dua na leqa. Era taleitaka na kosipeli, lotu vakavinaka, ka dau nuitaka tu na siga ni ratou na gole kina vakavuvale me ratou laki vauci vata me tawamudu ena Valetabu na Seoul e Korea. Ena mosi ni yalo eratou vakila, eratou kila vakamatavuvale ni ratou na raici Kong Sung-Gyun tale ka ratou na duavata tale. E tukuna talega vei au o Pak Mi-Jung ni dau vukei koya ena nona rawata na kaukauwa me rawa ni toso tiko kei na veitokani ni vakacegu e kauta mai na Yalo na lagasere e veisiga.

Niu biuta na nodratou itikotiko ena yakavi oya, au vakananuma lesu tale na qaqa ni nona serenilotu taleitaki o Pak Mi-Jung. Au vakavinavinaka ni a vakalougatataka ena yalovakacegu na matavuvale oya na Tamada Vakalomalagi ni oti nona takali o Kong Sung-Gyun, kau vakavinavinaka talega vakalevu ena itavi ni Yalo ena saumaki mai nei Pak Mi-Jung, ka rawa kina ni kilikili na matavuvale ki na veivakalougatataki tawamudu ni valetabu.