“Na sala cava e rawa niu logavinaka kina meu vosa vei noqu bisopi me baleta na leqa eso se na kauwai?”

Na bisopi ni nomu tabanalevu sa soli tu vua na veivakadonui me dusimaki iko ena ikabakaba ni veivutuni. Ena so na gauna na sala duadua ga ena taucoko kina na veivutuni vua na iVakabula na nomu gole vua nomu bisopi. Niu gadreva meu vosa vua noqu bisopi, a vukei au ko koya meu kunea na iVakabula ka vakamamacataka na mavoa titobu duadua e sa bau yaco vei au. Na nomu bisopi e gadreva me vukei iko. Na nona veikacivi me qarauni iko, ka na sega kina ni raici iko sobu ena dua na ka o gadreva mo raici koya kina.

Au dau logalogaca ena gauna ni veivakatarogi, ia au qai kila ni sa dau tuvakarau tu na noqu bisopi me vukei au ena noqu walia na noqu leqa. Vakabauta na nomu bisopi; o koya na ivakatawa ni sipi ka qelenisipi na tabanalevu.

Sa yaco meu kila ni o bisopi e dua na itabaqase e rawa ni vakabauta vakavinaka duadua e dua na itabagone ka rawa ni kunea mai vua na veivuke. Ena sega vakadua ni vakawalena na nomu veivakabauti—na veika kece o wasea vua ena tiko ga ena nona valenivolavola. Ena so na gauna ena dredre sara ni o wasea na nomu leqa, ia ni da veitalanoa e matanavotu kei na dua e lomani keda ka kauwaitaki keda ka vinakata na veika vinaka duadua me baleti keda ena rawarawa cake sara kina.

Na nomu bisopi se peresitedi ni tabana e italai dina ni Turaga. E rawa ni o vakararavi vua me tuberi iko ena nomu vakasaqara na veivakauqeti mai vua na Yalo Tabu kei na ivolanikalou. Sa dodonu mo kila ni tu na bisopi me veivuke ka liutaki koya tiko na Kalou.

Kevaka e tiko e dua na ka o vinakata dina sara mo veitalanoataka kei bisopi, ena rawarawa cake beka mo tekivu ena nomudrau veitalanoataka na veika baleta na vuli kei na veika raraba eso. Kevaka o madua baleta ni o vinakata mo veitalanoa vata kei koya me baleta na veivutuni, nanuma tiko ni lomani iko o koya. Sega ni dodonu mo madualaka na veika ena nanuma o koya me baleti iko, baleta na cava me na raici iko sobu kina ni o vinakata mo toro yani vei Karisito?

Tarogi iko mada se cava mo logaloga ca kina ena vosa vei nomu bisopi. O nanuma beka ni na sega ni rawa vua me walia na nomu leqa? Masuta mo kila ni lomani iko na bisopi ka sa kacivi me vukei iko.

E rawa ni dredre ka vakamadua me da vakatusa eso na ka vei bisopi, ia ni o lako yani mai na valenivolavola oya, o na vakila na vakacegu, ka o na kila ni lomani iko na Tamada Vakalomalagi. E vinakata o koya mo marau, kevaka sara mada ga o cakacala.

Na bisopi na ivakatawa ni sipi ena nomu tabanalevu. Nanuma ni na solia na nona vinaka duadua me vukei iko ka tu vata kei koya na kaukauwa ni Kalou. Kevaka o rere, e rawa ni o masuta na kaukauwa me rawa kina ni o vosa vua na nomu bisopi. E muri, o na marau ni o a lako vua—ka na veiganiti vinaka.