សំណួរ និង ចម្លើយ
« នៅពេលម្ដាយខ្ញុំមានជំងឺ យើងបានតមអាហារ ហើយអធិស្ឋានឲ្យគាត់ ប៉ុន្តែគាត់នៅតែទទួលមរណភាព ។ តើខ្ញុំអាចមានសេចក្ដីសុខសាន្តចំពោះរឿងនេះតាមរបៀបណា ? »
នេះជាពេលដ៏សោកសៅមួយក្នុងជីវិតខ្ញុំ ។ វាជារឿងធម្មតាដែលចង់បានការបញ្ជាក់ និង ចម្លើយចំពោះសំណួរជាច្រើន ៖ « ហេតុអ្វីបានជាគាត់មិនរស់ ? តើខ្ញុំនឹងជួបគាត់ម្តងទៀតទេ ? តើខ្ញុំអាចបន្តរស់នៅដោយគ្មានគាត់យ៉ាងដូចម្តេចទៅ ?
ដំណឹងល្អរបស់ព្រះយេស៊ូវគ្រីស្ទផ្តល់ទាំងការលួងលោម និង ចម្លើយ ។ ព្រះអម្ចាស់បានសន្យាថា « មានពរហើយអស់អ្នកដែលទួញយំ ដ្បិតពួកគេនឹងត្រូវបានលួងលោម » ( នីហ្វៃទី ៣ ១២:៤ ) ។ សូមស្វែងរកព្រះវិញ្ញាណបរិសុទ្ធ ដ្បិតទ្រង់គឺជាអង្គលួងលោម ។
អ្នកឆ្ងល់ថាតើការអធិស្ឋានរបស់អ្នកនឹងត្រូវបានស្តាប់ឮឬអត់ ។ អ្នកអាចជឿជាក់ ៖ ព្រះវរបិតាសួគ៌ តែងតែស្តាប់ការអធិស្ឋានរបស់យើង ។ ព្រះគម្ពីរ និង ការសន្យារបស់ព្យាការីកំពុងរស់នៅចំពោះយើងនោះគឺជាការពិត ។ អ្វីដែលព្រះអម្ចាស់បានមានបន្ទូលទៅ យ៉ូសែប ស៊្មីធ ក៏អនុវត្តចំពោះអ្នកផងដែរ ៖ « ការអធិស្ឋានរបស់អ្នក និង ការអធិស្ឋាននៃបងប្អូនរបស់អ្នកទាំងប៉ុន្មាន បានឡើងមកឯព្រះកាណ៌របស់យើងហើយ » (គ និង ស ៩០:១) ។ ប៉ុន្តែយើងត្រូវតែចាំថា ព្រះវរបិតាសួគ៌ឆ្លើយតបចំពោះការអធិស្ឋានយើងជាមួយនឹងទស្សនវិស័យអស់កល្បនៅក្នុងគំនិត ( សូមមើល អេសាយ ៥៥:៨–៩ ) ។ នោះជាហេតុផលដែលយើងធ្វើតាមគំរូព្រះអង្គសង្គ្រោះនៃការសុំពរជ័យ ប៉ុន្តែសុំដោយចិត្តស្មោះនូវព្រះឆន្ទៈរបស់ព្រះវរបិតាឲ្យបានសម្រេច ( សូមមើល លូកា ២២:៤២ ) ។
ទោះបីជាវាពិបាកក្តី ការសាកល្បងនេះអាចជាឱកាសរីកចម្រើនមួយសម្រាប់អ្នក ។ អ្នកអាចរៀនដើម្បីមានសេចក្តីជំនឿលើព្រះឆន្ទៈរបស់ព្រះ ទោះបីជាមានន័យថាម្តាយរបស់អ្នកមិនជាសះស្បើយក្តី ។ ពិតមែនហើយ អ្នកចង់ឲ្យគាត់នៅរស់ ។ ប៉ុន្តែ ការសាកល្បងនៃជីវតរមែងស្លាប់នេះ គឺត្រូវទុកចិត្តលើព្រះគ្រប់ពេល—ជាពិសេសនៅពេលលំបាក ។ បើសិនអ្នកទុកចិត្តទ្រង់ « គ្រប់ការទាំងអស់ផ្សំគ្នា សម្រាប់សេចក្ដីល្អ របស់អ្នក » ( គ និង ស ៩០:២៤ ) ។
សេចក្តីស្លាប់គឺជាផ្នែកមួយនៃផែនការ
យោងតាមផែនការនៃសុភមង្គលរបស់ព្រះវរបិតាសួគ៌យើង នោះការត្រឡប់ទៅកាន់វត្តមានរបស់ទ្រង់វិញ គឺផ្តោតទៅលើសេចក្តីស្លាប់ និង ការរស់ឡើងវិញ ដែលនឹងជួយយើងឲ្យផ្លាស់ប្តូរពីស្ថានភាពរមែងស្លាប់នេះទៅជាស្ថានភាពអមត ។ អ្នកគ្រាន់តែទទួលយកកត្តាពិតថា សេចក្តីស្លាប់គឺជាផ្នែកមួយនៃផែនការ ហើយជឿថាថ្ងៃណាមួយ អ្នកនឹងអាចរស់នៅជាមួយម្តាយដែលបានចែកឋានទៅរបស់អ្នកម្តងទៀត ។ សូមដឹងថាម្តាយរបស់អ្នកគឺ នៅឯពិភពវិញ្ញាណ ហើយថាគាត់កំពង់រង់ចាំអ្នក ។
ដេវីឌ អិម អាយុ១៨ ឆ្នាំ ខេត្តវ៉េស្ទើន កាសៃ សាធារណៈរដ្ឋប្រជាធិបតេយ្យកុងហ្គោ
គាត់នៅក្នុងភពវិញ្ញាណ
ម្តាយរបស់ខ្ញុំបានធ្វើរោគវិន្ឆ័យថាមានជំងឺមហារីកអស់រយៈកាលពីរឆ្នាំមុន ។ ខ្ញុំ មិនចូលចិត្តឃើញគាត់ឈឺចាប់ទេ ហើយខ្ញុំចង់ធ្វើអ្វីមួយ ។ ហើយទោះបីជាម្តាយរបស់ខ្ញុំបានធូរស្រាលក៏ដោយ វាគឺជាបទពិសោធន៍មួយលំបាកណាស់ ។ ម្តាយរបស់អ្នកនៅក្នុងដំណាក់កាលមួយដែលមិនទទួលអារម្មណ៍ឈឺចាប់ ឬ រងទុក្ខឡើយ ។ វាពិបាកក្នុងការមិនបានឃើញគាត់ទៀត ប៉ុន្តែអ្នកមិនដែលនៅតែម្នាក់ឯងនោះទេ ។ គាត់នឹងស្រឡាញ់អ្នកជានិច្ច ហើយព្រះវរបិតាសួគ៌យើងនឹងតែងតែនៅទីនោះដើម្បីលើកអ្នកឡើងនៅពេលអ្នកធ្លាក់ចុះ ។ អ្នកនឹងមិនត្រូវបានបោះបង់ចោលឡើយ ។ ព្រះយេស៊ូវគ្រីស្ទរងការឈឺចាប់នៃពិភពលោក ទ្រង់មានព្រះបញ្ញាញាណដឹងថាអ្នកមានអារម្មណ៍បែបណា និងអ្វីដែលអ្នកកំពុងឆ្លងកាត់ ។ សូមធ្វើដូចជាអ្វីដែលខ្ញុំបានធ្វើក្នុងពេលនៃការសាកល្បងរបស់ខ្ញុំ ៖ សូមទៅរកទ្រង់ ហើយទ្រង់នឹងធ្វើឲ្យបន្ទុករបស់អ្នកស្រាលបាន ។
ស្ស៊ីឡូ ដ័បុលយូ អាយុ ១៨ ឆ្នាំ ទីក្រុង ឈីវ៉ាវ៉ា ប្រទេស ម៉ិកស៊ិក ។
ក្រុមគ្រួសាររបស់អ្នកនឹងបានជួបជុំគ្នាវិញ
ម្តាយរបស់ខ្ញុំបានទទួលមរណភាពកាលខ្ញុំអាយុ ១២ ឆ្នាំ ។ កាលនោះខ្ញុំពុំមែនជាសមាជិកនៃសាសនាចក្រនោះទេ ។ ពេលគាត់ឈឺខ្ញុំបានអធិស្ឋានយ៉ាងច្រើនសុំឲ្យម្តាយរបស់ខ្ញុំបានប្រសើរឡើងវិញ ។ ខ្ញុំមានសេចក្តីជំនឿយ៉ាងខ្លាំង ហើយបានទុកចិត្តលើព្រះដោយសេចក្តីសង្ឃឹមថាសុខភាពគាត់នឹងបានប្រសើរមកវិញ ។ គួរឲ្យស្តាយណាស់គាត់មិនបានជាសះស្បើយឡើយ ។ ខ្ញុំបានឆ្ងល់ថា ហេតុអ្វីបានគាត់ត្រូវស្លាប់ទាំងនៅក្មេងដូច្នេះ ហើយបានចាកចោលខ្ញុំ ទាំងនៅជំទង់បែបនេះ ។ ខ្ញុំខឹងមួរម៉ៅ ហើយបានធ្លាក់ក្នុងចំណុចមួយធ្វើឲ្យខ្ញុំឆ្ងល់ថា តើមានព្រះឬអត់ ។ ឥឡូវ ខ្ញុំជាសាមាជិកនៃសាសនាចក្រ ខ្ញុំយល់ពីផែនការនៃសេចក្ដីសង្គ្រោះ ។ ខ្ញុំដឹងថា គាត់កំពុងរង់ចាំខ្ញុំ ហើយថាគ្រួសាររបស់យើងនឹងជួបជុំគ្នាម្តងទៀត ។
អ៊ិនណេ អិល. អាយុ ១៩ ឆ្នាំ ទីក្រុង មីណាស ហ្គើរេស ប្រទេស ប្រេស៊ីល
ការសាកល្បងបង្រៀនយើង
ម្តាយរបស់ខ្ញុំបានទទួលមរណភាពបីឆ្នាំមកហើយ ។ ទំនាក់ទំនងរបស់អ្នកនឹងព្រះវរបិតាសួគ៌ និង ព្រះអង្គសង្គ្រោះនឹងកើនឡើង បើសិនអ្នកសម្លឹងទៅពួកទ្រង់នៅពេលដែលអ្នកត្រូវការ ។ អ្នកនឹងឃើញថាការសាកល្បងនេះ ទោះបីជាវាខ្លាំងប៉ុណ្ណា នោះវាអាចក្លាយជាពរជ័យផងដែរ ។ សូមអធិស្ឋានទៅកាន់ព្រះវរបិតាដែលគង់នៅឋានសួគ៌របស់អ្នកដើម្បីសុំភាពសុខសាន្ត និង ការធានាអះអាង ។ សូមទុកចិត្តលើផែនការរបស់ព្រះអម្ចាស់សម្រាប់អ្នក ។ សូមទទួលយកថាព្រះវរបិតាសួគ៌ដឹងថាយើងកំពុងតែទៅកន្លែងណា ហើយអ្វីដែលយើងត្រូវការដើម្បីទៅទីនោះ ។ ព្រះអម្ចាស់ស្រឡាញ់អ្នក ហើយសព្វព្រះទ័យចង់ឲ្យអ្នកមានសេចក្តីអំណរ ។ ការសាកល្បងរបស់យើងគឺជាវិធីដើម្បីបង្រៀនយើង ហើយធ្វើឲ្យយើងកាន់តែរឹងមាំ ។
មេហ្គាន ប៊ី អាយុ ១៨ ឆ្នាំ ទីក្រុង អនតារីយ៉ូ ប្រទេសកាណាដា
អ្នកនឹងជួបគាត់ម្តងទៀត
ជីដូនខ្ញុំបានទទួលមរណភាពកាលម្តាយខ្ញុំមានអាយុ១៧ ឆ្នាំ ។ គ្រួសារបានតមអាហារ និង អធិស្ឋាន សម្រាប់គាត់អស់ជាច្រើនសប្តាហ៍ពីមុនគាត់ចែកឋាន ។ គាត់ក៏ទទួលបានការប្រសិទ្ធពរបព្វជិតភាពផងដែរ ។ ចំណុចសំខាន់មួយដែលផ្តល់ភាពសុខសាន្តដល់ម្តាយរបស់ខ្ញុំនោះគឺការដឹងថាគាត់អាចជួបជីដូនខ្ញុំម្តងទៀតនៅជីវិតបន្ទាប់ ។ គោលដៅរបស់ម្តាយខ្ញុំគឺរស់នៅក្នុងជីវិត ដូច្នេះគាត់នឹងមានភាពសក្តិសមចំពោះពរជ័យនោះ ។ ខ្ញុំសោកស្តាយដែលខ្ញុំមិនអាចជួបគាត់ក្នុងជីវិតនេះ ប៉ុន្តែខ្ញុំរង់ចាំដល់ពេលដែលយើងនឹងជួបគាត់នៅទីបំផុត ។
ខារី អ័រ. អាយុ ១៥ ឆ្នាំ រដ្ឋយូថាយ៍ ស.រ.អា.