Hōho’a

young woman with cell phone

I to’u na’ina’iraa, e mea fifi roa to’u utuafare i te moni tae roa’tu i te ahururaa o to’u matahiti. Aita i ti’a i to’u papa ia roaa te tahi atu ohipa, no reira, ua rave oia i te ohipa hoohoo i ni’a i te purumu, e e mea iti roa te roaa mai iana. Ua faaea to’u mama i te fare no te haapa’o ia’u e i to’u taea’e teina.

Tera râ, noa’tu te mau fifi rau, ua roaa ia matou te iteraa papû o te aufauraa i te tuhaa ahuru e te horo’araa i te tahi atu mau ô. Ua aufau matou i ta matou tuhaa ahuru ma te haapa’o maita’i i te mau ava’e ato’a e aita roa matou i ere i te hoê mea. Ua ite papû matou e, ua haamaita’i-tamau-noa-hia matou no te maita’i hope ore o te Fatu e no te mea, e tapea Oia i Ta’na mau fafauraa ia haapa’o ana’e tatou i Ta’na mau faaueraa.

Ua hope a’era to matou tau fifi i te pae moni. E mea maere te mau haamaita’iraa ta te Fatu i horo’a mai ia matou i roto i teie mau matahiti hopea nei.

Ua ite au e, no te feia e aufau i te tuhaa ahuru ma te haapa’o maita’i e o te aufau i ta ratou mau ô ma te here no te haamaita’i i te oraraa o vetahi ê, e ore roa te hoê mea e erehia, e e nehenehe te hoê mea maita’i atu e tupu mai, mai tei tupu i ni’a ia’u e to’u utuafare. E rahi te mau haamaita’iraa. Ua ite au i te reira. Ua ora vau i te reira.

I te omuaraa o te mau afaraa matahiti ato’a i te fare haapiiraa, e farii matou i te mau tauihaa tamoni ore, mai te buka tapa’opa’o, hoê buka tarena, e te tahi atu mau tauihaa. I te hoê matahiti, ua ti’a vau i roto i te ana’iraa no te haere e tii i ta’u puohu tauihaa, e ua ite a’era vau e, te hoho’a tauihaa i horo’ahia mai na’u e mea faufaa roa ïa no’u.

I te hopea o te mahana, ua ite atu vau e, te horo’a ra ratou e piti hoho’a no te tauihaa hoê. E mea ohie ia ti’a faahou i roto i te ana’iraa e ia farii i te piti o te puohu tauihaa, e ua faaoti au e na reira. Aita e fifi, i te mea e, e mea tamoni ore, e e hinaaro vau i tera tauihaa.

Ua haere ’oi’oi au i te fare haumitiraa, e i reira, ua itehia mai ia’u te hoê niuniu afa’ifa’i ta te tahi mau tamahine i haamo’e. E faito apî roa to te reira niuniu, e no mo’e noa a’e nei ta’u niuniu i te hepetoma i ma’iri a’e nei. Tera râ, aita roa’tu vau i mana’o e tapea na’u. « E eiâ te reira », na reira a’era vau i roto ia’u.

I muri iho, a haere ai au e tii i te piti o ta’u puohu tauihaa tamoni ore, ua ite a’era vau e, e ohipa parau ti’a ore te reira mai te au ato’a i te tape’araa i te niuniu, i te mea e, e haavare ïa vau ma te parau e, aitâ vau i farii atura i te hoê.

Ua mauruuru vau i teie iteraa ha’iha’i tei haapii mai ia’u i te hoê haapiiraa rahi. Ua faaho’i au i te niuniu e ua ho’i au i te fare e ta’u hoê puta tapa’opa’o, hoê buka tarena, e hoê hoho’a tauihaa, ma te mana’o maita’i râ no te vai-parau-ti’a-noa-raa i roto i te mau mea ato’a, noa’tu te ha’iha’i.