Ang Templo nga naa sa Pikas bahin sa Kalibutan

Sa ulahing bahin sa akong pagkatin-idyer nagpamiyembro ko sa Simbahan nga supak sa gusto sa akong pamilya. Sa dihang 20 nako, nagsugod nako sa pagtrabaho sa akong family history human namatay ang akong amahan. Sa wala madugay, nahimo kong usa ka busy nga asawa ug inahan nga nagpadako sa mga anak, ug ang buhat sa family history nahunong.

Tungod kay wala koy bisan usa nga pamilya sa Simbahan, aduna koy dakong tinguha sa pagsiksik sa akong family history. Ganahan ko nga nagbuhat niini ug kanunayng nagtinguha nga makaangkon og dugang nga panahon sa pagbuhat niini.

Sa dihang 33 nako, adunay wala damha nga paghitabo sa akong kinabuhi sa dihang ang akong panlawas nagdaut. Sa una makahimo ko sa pakiglakaw uban sa akong pamilya, ang paglakaw-lakaw sa palibut nahimo nang lisud. Nahimong imposible ang makapanlimpyo sa balay sulod sa duha ka oras, ug malipay nalang ko kon mahuman ko og pang-vacuum. Bisan og daghan ko og higala sa una, karon gamay nalang ang akong mga higala tungod kay dili nako makauban nila sama sa kaniadto.

Sama niini kadtong panahona nga gisugdan na usab nako ang akong family history. Ang akong anak nga babaye nagsugod na sa pagbuhat sa iyang pagsiksik sa habig sa iyang papa ug sa usa ka gabii nakompleto ang buhat nga daghang katuigan nakong gibuhat. Nakakompleto ko og pipila ka mga henerasyon sa akong linya ug misumiter sa mga pangalan ngadto sa templo aron pagkompleto sa buhat. Gusto gyud nakong humanon didto sa templo alang sa akong mga sakop sa pamilya nga ako mismo, apan ang akong panglawas ug ang gilay-on gikan sa temple nakapahimo niining imposible.

Human sa pagsumiter sa mga pangalan, nakahilak ko, mibati nga daw akong gipakyas ang akong mga sakop sa pamilya gumikan kay dili ko mauban nila sa espesyal nga adlaw sa mga ordinansa nga gihimo alang kanila. Human sa usa ka semana sa akong paglog-on sa FamilySearch.org aron pagsusi sa kalamboan sa ilang buhat sa temple, nakita nako ang nindot kaayong butang. Dili lang nga ang buhat nakompleto na, apan ang mga miyembro didto sa Accra Ghana Temple ang naghimo sa buhat! Nasurprisa kaayo ko nga makita nga ang mga miyembro nga naa sa pikas bahin sa kalibutan ang nagkompleto sa buhat sa templo alang sa akong gamay nga pamilya. Nakahilak na usab ko nga naghunahuna sa mga sakripisyo sa mga tawo didto sa Ghana samtang sila naningkamot padulong sa templo alang sa akong pamilya. Mapasalamaton kaayo ko alang niadtong mga miyembro sa Accra Ghana Temple district nga mihimo sa unsay dili nako mabuhat: pagtambong sa templo ug paghatag sa akong pamilya sa panalangin sa mga ordinansa sa templo.