Ang Akong Panaw isip usa ka Pioneer gikan sa India
Ang tagsulat gikan sa Telangana, India.
Akong gihanduraw ang akong panaw gikan sa pagka-“jungle boy” sa balangay sa India ngadto sa unsa ako karon ug nahibalo nga ang akong kinabuhi ug pagtuo tinuoray nga mga milagro.
Paghulagway sa litrato sa batang lalaki pinaagi ni Wendy Gibbs Keeler; litrato sa Taj Mahal, paisley background, postage stamp © iStock/Thinkstock, Hemera/Thinkstock
Natawo ko sa gamay nga kalasangan nga balangay nga gilibutan sa mga kabungturan sa Eastern Ghats sa India. Sa nag-edad ko og 18 anyos, namalhin mi ngadto sa usa ka balangay sa Dangrapalli nga daplin sa Suba sa Kolab. Gidala ko nga gisulod sa usa ka basket samtang naglakaw ang akong mga ginikanan. Ang balangay dunay 20 ngadto sa 25 ka pamilya, nga nagpuyo sa mga payag nga walay kuryente. Wala mi eskwelahan, ospital, o estasyunan sa bus. Magkalot lang mi og atabay sa daplin sa sapa para mainom. Gigahin nako ang akong pagkabata sa pagdula sa mga kakahoyan ug sa mga umahan, paglakaw gamit ang karang ngadto sa lamakan, ug paglangoy-langoy sa sapa.
Ang akong mga lolo mga pari sa Hindu temple ubos ni (Hari) Maharaja sa Bastar sa Jagdalpur. Apan sa dihang ang kawalay kasiguroan sa politika nakapamiligro, ang akong lolo ug iyang pamilya mieskapo ngadto sa Kotpad. Gihatagan sila og kadangpan sa usa ka German Lutheran mission, diin nagtrabaho siya isip usa ka tig-atiman ug nagtuon og Ayurveda (herbal medicine). Dinhi ang akong apohan mipili nga makabig sa pagka-Kristiyano.
Ang akong amahan mipadayon sa Kristiyanong tinuohan pinaagi sa pagpili nga mahimong ebanghelista ug usa ka guru (magtutudlo). Sa akong pagkahimugso, ginganlan ko og Mangal Dan Dipty (buot ipasabut “buotan,” “gasa,” ug “kahayag”), napanunod ang tradisyon sa Kristiyano nga tinuohan.
Sa pagkabata regular ko nga mitambong sa German Lutheran nga simbahan. Kanunay mi nga mangadto sa kabungturan alang sa dungan nga pag-ampo. Usa ka ulanon nga adlaw, ang tanan nga diha sa grupo nga pag-ampo nangabasa, ug usa sa mga tigsangyaw mihalad og tinuoray nga pag-ampo naghangyo sa Ginoo nga ipahunong ang ulan. Sa among katingala mihunong ang ulan. Sinugdanan kadto sa akong pagtuo sa Dios ug sa pag-ampo.
Ang Mormonismo ba Kristiyano?
Human sa eighth grade, wala na ko moeskwela aron makatambong ko og tulo ka tuig nga theological seminary sa Kotpad ug gi-orden ko nga usa ka ebanghelista, sama sa akong amahan. Human sa pipila ka tuig nga pag-conduct og mga miting sa sulod ug sa palibut sa Kotpad, mibalhin ko sa northern India, diin didto nagsugod ko sa pagpamaligya og mga basahon gikan sa Evangelical Christian literature society. Nakakita ko og usa ka basahon nga gitawag og Ang Mormonismo ba Kristiyano? Dunay butang sa mao nga basahon ang naka-intriga kanako, ug mihukom ko nga kini akong basahon.
Daghan kaayo ang pagsaway nga nakasulat sa basahon batok sa mga Mormon ug sa ilang mga gituohan. Bisan pa, ang daghang bahin sa basahon naka-intriga kanako, ilabi na sa konsepto niini mahitungod sa Dios nga Kapangulohan, sa mga pamaagi sa ilang pagsimba, ug sa kasaysayan sa pagpangasawa og daghan [polygamy]. Hinoon, ang naka-interes kaayo nako mao nga ang Simbahan ginganlan sunod sa ngalan ni Jesukristo. Nakuryuso ko nga mahibaloan ang daghan pa.
Usa ka adlaw samtang nag-ampo, nadasig ko nga mo-investigate sa Mormon nga Simbahan. Akong nahibaloan ang Salt Lake City, Utah, mao ang headquarters sa Simbahan. Mihukom ko nga mosulat ug gi-address nako sa “Men in charge of The Church of Jesus Christ of Latter-day Saints, Salt Lake City, Utah, USA.”
Ang pagkat-on gikan sa usa ka Apostol
Niadtong 1959, agig tubag sa akong sulat, si Brother Lamar Williams gikan sa Missionary Department sa Simbahan mipadala kanako og kopya sa pagpamatuod ni Joseph Smith, Mga Artikulo sa Hugot nga Pagtuo, ug Basahon ni Mormon. Akong gitun-an kining tanan ug nakombinser sa katinuod niini. Apan, walay mga misyonaryo o mga miyembro sa India nga makatudlo kanako.
Dayon niadtong Enero 1961, si Elder Spencer W. Kimball (1895–1985) sa Korum sa Napulog Duha ka mga Apostoles mibisita sa Delhi. Migahin ko og tulo ka adlaw kuyog niya ngadto sa Taj Mahal sa Agra ug sa Dharamsala. Sama ko sa usa ka espongha nga mipatuhop sa tanang leksyon sa ebanghelyo nga iyang gitudlo. Sa katapusang adlaw sa iyang pagbisita, andam na ko nga bunyagan. Niadtong Enero 7, 1961, nabunyagan ko ni Elder Kimball didto sa Yamuna River; si Sister Kimball mao ang opisyal nga saksi, hinoon dunay daghang kuryuso nga nanagtan-aw. Gikumpirmahan ako nianang gabhiona.
Kadtong tulo ka adlaw nga namulong ang Apostol sa Ginoo ngari nako nga walay mga pagbalda mao ang pipila ka pinakanindot nga adlaw sa akong kinabuhi. Ang pagpanamilit subo kay siya akong nahimong espesyal nga Mormon nga higala.
Ang Pangandoy para sa mga Santos
Human sa pagbiya ni Elder Kimball, akong gipakigbahin ang akong kasinatian sa pagkakabig ngadto sa akong mga higala, ug ila kong gibugal-bugalan. Apan nahibalo ko nga tinuod ang ebanghelyo ug dili nako kini ikalimud, mao nga nakahukom ko nga mangita og laing trabaho. Nagsugod ko sa pagnegosyo og mga sinina sama sa akong amahan. Sa wala madugay, akong naamguhan nga dili ko molambo gawas kon makaangkon ko og dugang pa nga edukasyon. Hapit na ko mag-21, ug ang hunahuna nga moeskwela og balik daw makakulba, apan migahin ko og laing siyam ka tuig sa pag-angkon og edukasyon. Magnegosyo ko inig ka buntag ug moeskwela inig kagabii. Gigasto nako ang tanan nakong kinitaan sa pag-eskwela. Determinado ko ug nag-ampo alang sa balaang panabang. Mipadayon ko og bachelor’s degree sa psychology, sociology, ug arts sa Agra University. Sa katapusan, mieskwela ko sa Meerut University sa pagtuon og degree sa abogasiya.
Atol sa unang bahin sa siyam ka tuig, dunay usa ka pamilya nga Santos sa Ulahing mga Adlaw sa Delhi, ang mga Shortleft, kinsa nagtrabaho sa U.S. Embassy. Mibiyahe ko ngadto sa Delhi alang sa sakrament miting didto sa ilang balay. Niadtong 1962, si Elder Richard L. Evans (1906–71) sa Korum sa Napulog Duha ka mga Apostoles mibisita kanamo, ug niadtong 1964, si Elder Gordon B. Hinckley (1910–2008) sa Korum sa Napulog Duha ka mga Apostoles miabut. Nahinumdom ko nga mitaod og kwentas nga bulak kang Elder Hinckley ug mitunol kaniya sa usa ka anglit [pot] nga tinigom nga ikapulo, nga akong natigom sulod sa daghang katuigan.
Subo lang, kini nga mga panahon sa pag-fellowship—bisan dako og ikatabang—kini usahay ra, ug samtang naa ko sa India walay ubang mga Santos nga padayon nga mo-fellowship nako. Kini nakahasol sa akong kasingkasing. Sa nanglabay ang katuigan, ang kasubo nagsugod sa paghatag kanako og negatibong pagbati, ug wala koy nakita nga kaugmaon para nako sa India. Nangandoy ko nga makabaton og priesthood ug magpuyo kauban sa mga Santos.
Pagkahimong usa ka Pioneer
Dihang gibati nako nga panahon na nga mas maduol sa mga Santos, gihunong nako ang akong kurso sa abogasiya ug milangyaw ngadto sa Canada. Dihang miabut ko sa Edmonton, Alberta, akong giadto ang pinakaduol nga ward. Akong nahimamat si Bishop Harry Smith ug diha dayon gibati ang pagkahisakop ug ang fellowship niana nga ward. Gibisita nako ang Cardston Alberta Temple, bisan og dili pa ko makadawat sa akong endowment.
Gusto nakong bisitahon ang Salt Lake City ug surprisahon ang buotan nakong mga higala sila si Elder Kimball ug Brother Lamar Williams. Sa katapusan, sa tingpamulak niadtong 1969, walo ka tuig human sa akong bunyag, mibisita ko sa Salt Lake City ug nahimamat si Elder Kimball. Nalipay kaayo siya ug gigahin ang tibuok adlaw nga gikauban ako.
Samtang didto sa Salt Lake City, miadto ko sa tupihanan aron magpatupi. Akong gipakigbahin ang akong pagpamatuod ngadto sa barbero, nga usa diay usab ka kinabig. Usa ka lalaki, naghulat sa iyang turno, nakadungog nako ug iya kong gisuginlan mahitungod sa iyang mga biyahe ngadto sa India. Siya ang mibayad sa akong pagpatupi, iya kong gidapit og panihapon, ug gidala ko ngadto sa Brigham Young University. Nakadayeg ko sa campus. Nakahisgot ko nga gusto kong mopadayon og eskwela dinhi apan wala koy ikagasto. Ang tawo mitanyag nga mobayad og $1,000 para sa akong tuition. Nakalitan ko ug labihan ang akong pasalamat.
Sa ibabaw: Si Brother Dipty isip usa ka estudyante didto sa India. Sa ubos: Si Brother Dipty (sa wala) kauban ni Paul Trithuvadass, lain nga pioner nga miyembro nga Taga-India, sa Temple Square sa Salt Lake City. Sa wala: Si Presidente Spencer W. Kimball nagdala og importanting bahin sa pioneer nga panaw ni Brother Dipty.
Miapil ko sa social work program sa BYU. Niadtong 1972, human naka-graduate sa BYU, mibalhin ko sa Salt Lake City aron magpadayon og master’s degree sa University of Utah. Sa wala madugay mibalhin ko sa California, USA, diin nakab-ot nako ang PhD sa clinical psychology, nagtudlo og mga kurso sa pagpahunong sa domestic violence, ug misulat og usa ka basahon. Retirado na ko karon ug nagpuyo kauban sa akong asawa, si Wendy, sa Nevada, USA.
Dunay panahon nga miagi ko og grabe nga personal nga kasamok, mga hagit, ug mga kalisdanan. Ang akong pag-focus sa ebanghelyo ug mga panalangin sa templo nakatabang nga akong mabuntog ang daghang hagit sa kinabuhi.
Ang Iyang mga Plano Mga Katingalahan
Akong gihanduraw ang akong panaw gikan sa pagka-“jungle boy” sa balangay didto sa India ngadto sa unsa ako karon ug nahibalo nga ang akong kinabuhi ug pagtuo tinuoray nga mga milagro. Ang gihimo sa Ginoo sa akong kinabuhi mas matahum kay sa akong gidahuman. Pagkatalagsaon nga adunay pinili sa Ginoo nga si propeta Spencer W. Kimball nga mitudlo nako ug mikuyog kanako sa mahinungdanong mga panahon sa akong panaw sa kinabuhi.
Kanunay nakong gihanduraw ang akong panahon kauban ni Presidente Kimball. Iya kong gidapit sa iyang mga biyahe sa pamilya sa pag-camping, mga picnic, ug sa Thanksgiving ug mga pagpangaon sa Pasko. Sukad pa kaniadto nahibalo ko nga siya tinuod nga Apostol ug propeta sa Ginoo nga si Jesukristo.
Akong nahimamat si Presidente Kimball kausa sa katapusang higayon dihang luya na kaayo siya. Apan iya gihapon kong gipahiyuman ug gigakos. Siya ang una nakong kontak nga LDS, ug nahibalo ko nga dili gayud niya ako hikalimtan.
Mapasalamaton ko sa Dios tungod sa atong mga propeta ug sa gipahiuli nga ebanghelyo. Ang atong Simbahan mao ang balaan natong modelo nga gikinahanglan sa kalibutan karon. Tungod sa Simbahan nakaangkon ko og edukasyon ug mitubo nga usa ka tawo. Mapasalamaton ko niana nga adlaw dihang nahibalo ko nga ang pag-ampo tinuod ug nga ako andam nga maminaw sa hinay, hinagawhaw nga tingog ug nag-investigate sa Simbahan. Nagpasalamat ko nga akong gitugutan ang Ginoo nga mohulma sa akong kinabuhi. Nahibalo ko nga kon pangitaon nato ang Iyang gingharian, ang tanang butang igadugang ra kanato (tan-awa sa Mateo 6:33).