Sama sa Biyuda sa Sarepta: Ang Milagro sa Mga Halad sa Puasa
Ang mga tagsulat nagpuyo sa Utah, USA.
Samtang among gikonsiderar ang paghatag og mas ubay-ubay nga halad sa puasa, among nahinumduman nga ang usa ka tawo dili mahimong mohatag og gamayng butang ngadto sa Ginoo nga dili makadawat og daghang mga panalangin agig balus.
gihulagway ni Rose Datoc Dall
Daghang pamilya sa tibuok kalibutan naglisud sa pinansyal, ilabi na atol sa mga panahon sa krisis sa ekonomiya.1 Ang epekto sa ingon niana nga krisis nabatyagan sa among lokal nga ward daghang tuig nang milabay, dihang nakita namo ang daghang pamilya nga nanginahanglan og tabang. Sa sinugdanan nianang tuiga, mipakigbahin ang among bishop ngari namo og usa ka imbitasyon gikan sa among stake president sa paghatag og ubay-ubay nga halad sa puasa aron itabang sa mga nanginahanglan.
Bisan og ang among mga lider mihangyo nga susihon namo ang among tinagsa nga sitwasyon ug hunahunaon kon kami makahatag ba og mas ubay-ubay sa among halad sa puasa, wala nila itumbok kon pila gayud ang among ihatag. Hinoon, ang Espiritu mipahinumdom namo sa tambag nga gihatag mga tuig nang milabay ni Presidente Marion G. Romney (1897–1988), Unang Magtatambag sa Unang Kapangulohan. Miingon siya: “Usa ako ka lig-on nga tumutuo nga kon mohatag kamo sa Simbahan ug sa pagtukod sa gingharian sa Dios dili mahimo nga mas kabus lang gihapon kamo sa pinansyal. … Ang usa ka tawo dili mahimong mohatag og gamayng butang ngadto sa Ginoo nga dili makadawat og daghang mga panalangin agig balus. Kasinatian nako kana. Kon ang mga miyembro sa Simbahan modoble sa ilang paghatag og halad sa puasa, ang ilang espiritwalidad sa Simbahan modoble. Kinahanglan nga ibutang nato kana sa hunahuna ug magmanggihatagon sa atong kontribusyon.”2
Nahibalo kami nga usa ka sakripisyo para sa among pamilya ang paghatag og dako nga halad sa puasa, apan gihunahuna namo ang pagtulun-an ni Presidente Romney ug saad sa mainampingong paagi. Isip usa ka pamilya, napanalanginan kami sa hilabihan ug gibati namo ang lig-ong tinguha nga padakoon ang among halad sa puasa.
Dugang pa, gusto namo nga ang among pamilya makabuntog sa kalagmitan nga mahimong hakog. Tungod kay nagpuyo kita sa katilingban nga nakatutok kaayo sa pag-angkon og mga butang ug pagtagbaw sa kaugalingon natong mga tinguha, among gikabalak-an basin og ang among mga anak motubo nga mga hakog. Apan duna kami paglaum sa mga pulong ni Presidente Spencer W. Kimball (1895–1985): “Sa pagsunod sa balaod sa puasa, ang usa ka tawo makakita og usa ka maayong tinubdan sa gahum nga makabuntog sa pagpatuyang sa kaugalingon ug pagkahakog.”3
Sulod sa unang tulo ka bulan sa paghatag og mas ubay-ubay nga halad sa puasa, nakita namo nga nagsugod ang daghang panalangin. Mas ningminus ang among mga gasto sa grocery, ug ang among tangke sa gas ingon og dugay nga nahutdan og sulod. Ang among mga anak mas diyutay ang gipangayo, ug ang kahakog diha sa among panimalay ingon og wala na.
Sama pananglit, dihang misalmot mi sa lokal nga food drive, ang among mga anak nagsugod sa pag-awhag kanamo sa paghatag og mas daghan pa. Dihang gihimo namo ang tinuig nga imbentaryo sa among suplay sa pagkaon, sa tinuod among nakaplagan nga duna na mi duha ka tuig nga suplay sa pagkaon. Dugang pa, sa nangagi mohangtud ra og usa ka bulan ang among 50 ka libras (22.7 kg) nga sako sa bugas. Karon ang mao gihapon nga sako sa bugas mohangtud na og duha ka bulan. Maingon og ang among tinipigan nga pagkaon [food storage] nagkadaghan.
Napahinumduman kami sa istorya bahin sa biyuda sa Sarepta. Atol sa panahon sa kagutom, gibisitahan ni propeta Elijah ang usa ka biyuda, kinsa walay ikapakaon kaniya, nga tubig ug pan. Ang tubag sa biyuda mao, “Ingon nga ang Ginoo nga imong Dios buhi, wala akoy usa ka buok nga tinapay, apan usa ka kumkom nga harina anaa sa tadyaw, usa ka diyutayng lana anaa sa tibud-tibud; ug, ania karon, ako namunit niining duha ka lugas nga kahoy aron sumulod ug magluto niana alang kanako ug sa akong anak nga lalaki, aron kan-on namo kini, ug mamatay” (1 Mga Hari 17:12).
Ang propeta misaad kaniya nga “ang tadyaw sa harina dili mahutdan, ni mahutdan ang tibud-tibud sa lana. …
“Ug siya miadto ug nagbuhat sumala sa pulong ni Elias: ug siya, ug siya nga lalaki, ug ang mga kauban sa iyang balay, mingkaon sulod sa daghang mga adlaw” (1 Mga Hari 17:14–15). Ang iyang tadyaw, nga ang sulod igo na lang sa usa ka katapusang pagkaon para sa iyang pamilya, midaghan aron ang iyang pamilya ug ang uban makakaon sulod sa daghang mga adlaw. Ang sama nga matang sa milagro—pinasikad sa kaugalingon namong paghalad—nanghitabo sa among pamilya.
Atol sa pinansyal nga mga kalisud, malisud ang paghatag og ubay-ubay nga halad sa puasa ug pagtabang nga maatiman ang nanginahanglan, ilabi na kon kita—sama sa biyuda sa Sarepta—kauban sab sa nanginahanglan. Ang paghatag og ubay-ubay nga halad sa puasa, bisan pila ang kantidad, nagkinahanglan og hugot nga pagtuo sa Ginoo ug sa Iyang saad nga kita atimanon. Apan ang Ginoo motuman sa Iyang mga saad, ug ang kasinatian sa among pamilya nagtudlo namo nga kon mas andam kami nga mopakigbahin, mas mapanalanginan pa kami.
Sama sa giingon ni Presidente Romney: “Ayaw paghatag para lang sa kaayohan sa mga kabus, apan mohatag para sa kaugalingon ninyong kaayohan. Mohatag og igo aron kamo makahatag sa inyong kaugalingon ngadto sa gingharian sa Dios pinaagi sa pagpahinungod sa unsay anaa kaninyo ug sa inyong panahon.”4 Ang paghatag og mas ubay-ubay nga halad sa puasa nakatabang sa among pamilya nga makakaplag og kalipay sa pag-atiman sa mga kabus ug kalig-on sa among kaugalingon nga espirituhanong kaayohan.
Mga Pan [Tinapay] ug mga Isda, ni Rose Datoc Dall
Ang among kaandam nga mohatag og gamay adunay daghang panalangin nga gibalik agig balus. Ang among kaandam nga mohatag og ubay-ubay nga halad sa puasa sobra pa nga midoble sa among tinipigan nga pagkaon. Sa pagkatinuod, ang gahum sa Ginoo nga gipadaghan ang pan ug ang duha ka isda nga gipakaon sa 5,000 ka mga kalalakin-an, way labut sa mga babaye ug mga bata, nga may sobra pa nga makapuno og 12 ka basket (tan-awa sa Mateo 14:16–21), mao gihapon nga gahum nga mipuno sa tadyaw sa biyuda sa Sarepta ug mipadaghan sa among tinipigan nga pagkaon. Sa gihapon, ang dako kaayo nga benipisyo diri kanamo wala moabut sama sa pagpadaghan sa pagkaon apan sa pagpakunhod sa kahakog ug paglambo sa espiritwalidad sa among panimalay.
Kini maoy among saksi nga kon kita motampo og ubay-ubay alang sa pundo sa halad sa puasa sa Simbahan, nga lakip sa panahon nga dyutay ra ang atoa, palamboon sa Ginoo ang atong mga paningkamot ug mapanalanginan kita lapas pa sa atong panabut.