Pagluwas sa Akong Igpapahulay

Ni Mackenzie Brown

Ang tagsulat nagpuyo sa Utah, USA.

Imahe

young woman in sacrament meeting

Atrasado nako! Misul-ob ko og nindot nga sinina, namugong sa buhok, nagdrayb paingon sa simbahan, miparking, ug nagdali sa pagsulod. Whew! Nakalingkod ko sa atubangan pagbarug lang gyud sa bishop aron sugdan ang miting sa sakrament.

Mamulong ko nianang Dominggoha, mao nga midali ko og tan-aw sa akong mga gisulat, sa pagsiguro nga wala koy makalimtan. Sa mubo ra gyud kaayo nga panahon, ingon og ang miting sa sakrament mahuman na, ug moadto na ko sa Sunday School. Lain na usab nga malampuson nga sakrament!

Apan mao ba gyud?

Sa misunod nga semana nagsugod na ko sa paghunahuna. Laing Dominggo na usab ang molabay, ug samtang naglingkod ko sa miting sa sakrament, nagkonsiderar kon unsa ang kahulugan sa sakrament ngari nako, usa ka hunahuna misantop: Gisubli nako ang pasalig sa matag semana aron kanunayng maghinumdom ni Jesukristo, apan unsa ko ka seryuso sa pagbuhat niana?

Gusto kong mag-usab, mao nga mihukom ko nga maghimo og sinemana nga plano.

Sulod sa semana, migahin ko og panahon sa pagkonsiderar sa akong mga kinaiya ug mihangyo og kapasayloan sa akong mga sala. Siguraduhon usab nako nga makaabut og sayo sa simbahan aron ko makapaminaw sa prelude nga musika ug mabati ang Espiritu.
Atol sa sakrament, maghinumdom ko ni Jesukristo ug sa Iyang Pag-ula. Mainampuon nakong girebyu unsa ang akong nabuhat nga husto ug unsa ang akong nabuhat nga sayop. Akong gipangutana ang akong kaugalingon, “Ginoo, unsa pa may akong kulang?” (tan-awa sa Mateo 19:20).
Matag adlaw human sa sakrament, mag-ampo ko alang sa panabang aron molambo ug aron mahinumdom ni Kristo.

Samtang gisunod nako ang akong plano, nakat-on ko sa paghigugma sa sakrament! Ganahan ko mag-ampo ngadto sa Langitnong Amahan ug mag-istorya Kaniya mahitungod sa akong kinabuhi. Walay labut sa akong kinaiya sa milabayng semana, kanunay kong mapasalamaton alang sa Pag-ula ni Jesukristo ug sa oportunidad sa pagbag-o ug mahimong mas maayo. Karon nakat-on ko nga ang sakrament dili lang para sa Dominggo; kada adlaw kini.