Founga ke Kei Moʻui Taau Aí

ʻĪmisi

young woman reading the scriptures

Kuó u moʻui fuoloa feʻunga ke u sio tonu ʻi he mafuli e tuʻunga fakaangamaʻa ʻo e sosaietí. Kuo ʻosi atu e taimi ia naʻe meimei fenāpasi lelei ai e tuʻunga moʻui ʻa e Siasí pea mo e sosaietí, ka kuó na faikehekehe lahi ʻeni kinaua pea ʻoku fakaʻau pē ke toe lahi ange.

ʻOku fakafōtunga ʻe ha ngaahi heleʻuhila mo e ngaahi polokalama televīsone lahi ha tōʻonga ʻoku tuʻu fehangahangai hangatonu mo e ngaahi fono ʻa e ʻOtuá. ʻOua naʻa tuku ke mou moʻulaloa ki he ngaahi fakahala mo e ʻuli ʻoku faʻa maʻu aí. Ko e fakalea ʻi he konga lahi ʻo e ngaahi fasi ʻo e ʻaho ní ʻoku ʻi he tuʻunga tatau. Ko e ngaahi lea taʻefeʻunga ʻoku mafola lahi ʻiate kitautolu he ʻaho ní naʻe ʻikai meimei kātakiʻi ia ʻi he kuo hilí. ʻOku ou kole kiate kimoutolu ke ʻoua naʻa mou lea ʻaki pe fai ha faʻahinga meʻa he ʻikai ke mou lava ʻo laukau ʻaki.

Fakamamaʻo kakato mei he ponokalafí. ʻOua naʻá ke teitei mamata ai. Kuo ʻosi fakamoʻoniʻi ʻoku hoko ko ha ivi maʻunimā ʻoku mātuʻaki faingataʻa ke ikunaʻi. Fakaʻehiʻehi mei he ʻolokaholó mo e tapaká pe ha faʻahinga faitoʻo kona tapu pē, pea mo ha faʻahinga maʻunimā ʻe faingataʻa fau ke ke ikunaʻi.

Ko e hā te ne maluʻi koe mei he angahala mo e kovi ʻokú ne ʻākilotoa koé? Te u kei pehē ko ha fakamoʻoni mālohi ki hotau Fakamoʻuí mo ʻEne ongoongoleleí te ne fakapapauʻi atu ke ke haó. Kapau kuo teʻeki ke ke lau e Tohi ʻa Molomoná, lau ia. Kapau te ke fai ia ʻi he faʻa lotu, ʻi he loto holi fakamātoato ke ʻilo e moʻoní, ʻe fakahaaʻi atu ʻe he Laumālie Māʻoniʻoní kiate koe ʻa e moʻoní. Kapau ʻoku moʻoni—pea tā ko—Siosefa Sāmitá ko ha palōfita naʻe mamata ki he ʻOtua ko e Tamaí mo Hono ʻAlo ko Sīsū Kalaisí. ʻOku moʻoni ʻa e Siasí. Kapau kuo teʻeki ai ke ke maʻu ha fakamoʻoni ki he ngaahi meʻá ni, fai e meʻa ʻoku fie maʻu ke ke maʻu ai iá. ʻOku mahuʻinga ke ʻi ai haʻo fakamoʻoni pē ʻaʻau, he ʻe fāi pē pea ngata hono tokoniʻi koe ʻe he fakamoʻoni ʻa e niʻihi kehé. Ko hono maʻú pē, ʻe fie maʻu leva ʻe he fakamoʻoní ke tauhi ke mahuʻinga mo moʻui ʻo fou he talangofua ki he ngaahi fekau ʻa e ʻOtuá pea ʻi he lotu mo e ako maʻu pē ʻo e folofolá. Maʻulotú. Maʻu-seminelí.

Kapau ʻe ʻi ai ha meʻa ʻe fehalaaki ʻi hoʻo moʻuí, ʻoku ʻi ai ha founga ke ke hao ai. Taʻofi ha faʻahiga anga taʻe-māʻoniʻoni pē. Talanoa mo hoʻo pīsopé. Ko e hā pē ʻa e palopalemá, ʻe lava ke fakaleleiʻi ʻo fou he fakatomala totonú. Te ke lava ʻo toe maʻa (vakai, T&F 58:42).

Naʻe fakamatalaʻi ʻe he Fakamoʻui ʻo e faʻahinga ʻo e tangatá ʻa ʻEne ʻi he māmaní kae ʻikai ʻo e māmaní Iá. ʻE lava foki ke tau ʻi he māmaní kae ʻikai ʻo māmani ʻa kitautolu, ʻi heʻetau fakasītuʻaʻi ʻa e ngaahi fakakaukau mo e ngaahi akonaki halá. Tuʻu maʻu ʻi he meʻa kuo fekau ʻe he ʻOtuá.