Naʻe Fakahaofi Au ʻe Hoku Tuongaʻané
ʻOku nofo ʻa e tokotaha naʻá ne faʻú ʻi ʻAitahō, USA.
Ko e taimi ne hoko ai e taʻu 12 ʻo hoku tuongaʻane ko Tená, naʻá ku fakaafeʻi ia ke ma kamata ō ki he temipalé. Naʻe ʻikai haʻaku lavelaveʻiloa te ma fuʻu fie maʻu ke ma fepoupouaki ʻi he ngaahi taʻu hokó.
Ne mei hoko hoku taʻu 12 ʻi he taimi ne fakatapui ai ʻa e Temipale Tuini Folo ʻAitahoó. Naʻá ku mātuʻaki fiefia ʻi he taimi naʻe fuofua ʻeke mai ai ʻe hoku tokoua lahí pe te u fie kamata ʻalu maʻu pē ki he temipalé mo ia pea mo hono kaungāmeʻá.
Naʻá ku fiefia ʻi he hoko e taʻu 12 hoku kiʻi tuongaʻane siʻí, ʻi he ʻosi mei ai ha taʻu ʻe tolú, he naʻá ku lava ai ʻo fakaafeʻi ke ma ō ki he temipalé.
Ko e pongipongi kotoa pē naʻá ma ō aí, naʻá ma fetokoniʻaki ke ma ʻā pea ma ō, pea ko e taimi naʻá ma helaʻia aí, naʻe fai ʻe Tena ha ngaahi meʻa fakakata ke tokoni ke ma ʻā. Naʻá ma faʻa talanoa he taimi ʻe niʻihi ʻi he hili ʻema ō ki he temipalé fekauʻaki mo e ongo naʻá ma maʻu ʻi aí pea mo ʻema fakakaukau ki aí.
Ne hoko ʻema ʻalu mo Tena ki he temipalé ko ha aʻusia fakalaumālie ia ʻo e uiké kiate au. Naʻá ma hoko ko ha ongo kaungāmeʻa lelei ange tuʻunga ʻi heʻema toutou ō ki he temipalé, ʻo ne fakamālohia au ʻo laka ange ʻi he meʻa naʻá ku fakakaukauloto ki aí ʻi he taimi ne hoko mai ai ʻa e ngaahi faingataʻá. Kuo ʻosi mavahe ʻa e ongo tamaiki fefine lalahí ia ki he kolisí pea kuo toki ʻosi hono vaeua homau uōtí, peá u hoko ai mo Tena ko e ongo toʻu tupu pē ne kei mālohi ʻi homau uōtí.
Naʻá ku fakaʻaongaʻi mo Tena ha ngaahi houa ke telefoni mo fakaafeʻi ʻa e toʻu tupu māmālohí ki he lotú mo e Mutualé. Naʻá ku faʻa ongoʻi ne hangē ha fāngota faʻo ki he kato avá he naʻe ʻikai teitei haʻu ha taha neongo pe ko e hā e tokolahi ʻo e tamaiki fefine naʻá ku feinga ke fakamaheni ki aí.
Naʻe hoko e ʻalu ki he temipalé mo Tená ko e tumutumu fakalaumālie ia ʻo hoku uiké. Naʻe feinga ʻema ongomātuʻá ke tokoni. Naʻá na faʻa fakahoko ʻena fakamoʻoní kiate kimaua ʻi he taimi ne ma lotofoʻi aí, peá na tuku ke ma fakahaaʻi ʻema taʻe-fiemālié ʻi he taimi ne ma foki loto mamahi mai ai ki ʻapí. Ka neongo ia, naʻe ʻikai ke tokolahi fakafokifā pē homa ngaahi kaungāmeʻa ʻi he lotú, pea fakaʻau ke toe faingataʻa ange ke u fie ʻalu ʻi he taimi ko au toko taha pē e finemui aí. Naʻe fakaʻau ke tōmokosi ʻema ō ki he temipalé tuʻunga he femoʻuekina ʻema taimi tēpile fakaakó.
Naʻá ku fakaʻaongaʻi ha taimi lahi ke lau ʻeku folofolá mo tangi ki he ʻEikí ke tokoni mai ke u toʻa. Naʻá ku taʻelata mo helaʻia—helaʻia ʻi he toko tahá, helaʻia ʻi he ʻikai ʻaonga ʻeku ngaahi feingá, helaʻia ʻi he fekuki fakalaumālie mo fakaelotó.
Naʻá ku hoko ko ha taha fakahaofi moʻui ʻi he vaikaukau ʻo e koló ʻi he lolotonga e taimi ko ʻení. Naʻá ku manako lahi ange ke u ʻi ai ʻi heʻeku ʻi he lotú he naʻe hoko hoku ngaahi kaungā-ngāué ko hoku ngaahi kaungāmeʻa mo nau fiefia maʻu pē ke sio mai kiate au. Naʻá ku pehē ʻi ha ʻaho ʻe taha he ʻikai ke u toe foki au ki he Mutualé he naʻe fakafiefia ange ʻa e ngāué mo ʻaonga fakapaʻanga lahi ange kiate au.
Naʻe ʻikai ke u fakakaukau au ko ha meʻa mahuʻinga kae tālunga ʻeku fakatokangaʻi ʻeku holoki ʻeku ngaahi tuʻunga moʻuí. Naʻe ʻikai ke u lau ki he kapepake hoku ngaahi kaungāmeʻá, pea ʻi ha ʻaho ʻe taha naʻá ku ʻohovale ʻi he fakafokifā pē ʻeku kapekapé ka naʻe ʻikai ke u teitei pehē kimuʻa. Naʻe aʻu ʻo u mamata ʻi ha heleʻuhila taʻe-taau he pō ʻe taha ʻi ha paati mo hoku ngaahi kaungā fakahaofi moʻuí. Naʻá ku ongoʻi taʻe-feʻunga peá u fakakaukau pe ko e hā naʻá ku faí.
Lolotonga iá, ne ʻosi talamai heʻeku ongomātuʻá e taʻelata ange ʻa Tena talu mei he ʻikai ke u toe ʻalu ki he Mutualé. Naʻá ne (Tena) ʻeke mai ʻi he uike kotoa pē, “Ei, te ke haʻu ki he Mutualé he pooni?” Ko e taimi naʻá ne foki mai ai mei he Mutualé, naʻá ne ʻalu hangatonu pē ki hono lokí ʻo lau ʻene folofolá ʻi ha taimi lōloa. Naʻe ʻikai ke ne toe faʻa talanoa, pea ko e taimi naʻá ku ʻeke ange ai pe ʻoku sai peé, naʻá ne pehē mai pē ia, “ʻIkai” pea ʻalu ia.
Naʻá ne foki tangi mai ʻi ha pō ʻe taha koeʻuhí he naʻá ne ongoʻi mātuʻaki tuēnoa.
Ko e taimi ia naʻá ku pehē ai ne fie maʻu ke u fokí. Naʻe ʻikai mahuʻinga kiate au hono faingataʻa ʻo e tuēnoá; ka naʻe fie maʻu au ʻe Tena.
Naʻe kau ʻa Tena ʻi ha kalasi hisitōlia fakafāmili ʻi he lotú, peá u fakakaukau ke u kau fakataha mo ia. Naʻá ma loto ke toe kamata ō tuʻo lahi ange ki he temipalé, pea te ma lava heni ke kumi ha ngaahi hingoa ʻiate kimaua pē.
Naʻá ma fiefia heʻema kau fakataha he kalasí ʻi he Sāpaté. Naʻá ma kumi fakataha ʻa e ngaahi hingoá ʻi he tuku ʻa e lotú. Ko e meʻa fakafiefia taha ʻi hono ʻave ʻema ngaahi hingoá ki he temipalé ko ʻema kumi fakataha kinautolú, pea toe lelei angé, ko ʻema lava ke fepoupouaki ʻi he lotú pea fiefia ai koeʻuhí he naʻá ma fakahoko e ngāue ʻa e ʻEikí.
Ne hoko e faivelenga ʻa Tena ʻi he maʻulotú mo e Mutualé ko ha sīpinga kiate au. Naʻá ku maʻu ha fakamoʻoni ki he ongoongoleleí, ka naʻá ne tokoniʻi au ke u maʻu haʻaku fakamoʻoni ki he maʻulotú mo e ngaahi ʻekitivitií.
Naʻá ma lava ʻo fefakafiemālieʻiʻaki mo fakaʻaongaʻi ʻema fakamoʻoni ki he temipalé ke fetokoniʻaki ke ma mālohi ʻi he Siasí. Naʻe ʻikai ke toe tokolahi ange e maʻulotu mo e Mutuale ʻa e toʻu tupú, ka naʻá ku toe mālohi ange mo Tena mo malava ke ma fuesia ʻema ngaahi kavenga mafasiá ʻi heʻema fetokoniʻaki ke vilitaki atu ki muʻá.
ʻOku ou fiefia moʻoni ʻi heʻeku fakaafeʻi ia ke ma ō ki he temipalé. Neongo ʻoku ou ʻiloʻi naʻe tokoni kiate ia, ka ʻoku ou ʻiloʻi naʻá ne fakahaofi au.