Kae ʻOua Ke Tau Toe Feʻiloaki
Tokoniʻi Ha Taha he ʻAhó Ni
Fai ʻe Palesiteni Thomas S. Monson
Mei he “Ko e Hā Kuó u Fai Maʻa ha Taha he ʻAhó ni?” Liahona, Nōvema 2009, 89–92.
Ko e toʻukupu kitautolu ʻo e ʻEikí. ʻOku falala mai kiate kitautolu.
FAKAIKIIKI MEI HE Christ Healing the Sick at Bethesda, AI ʻE Carl Heinrich Bloch, ʻI HE ANGALELEI ʻA E Brigham Young University Museum of Art
ʻOku ou tui moʻoni ko e taumuʻa ia ʻa e mēmipa takitaha ʻo e Siasí ke ngāue mo tokoniʻi kinautolu ʻoku masivá. ʻOku tau fuakava ʻi hotau papitaisó ke “fefuaʻaki ʻa ʻetau ngaahi kavengá, koeʻuhí ke maʻamaʻa.” [Mōsaia 18:8]. Kuo tuʻo fiha nai ha ongo ki ho lotó ʻi haʻo siotonu ʻi ha fie maʻu ʻa ha taha? Kuo tuʻo fiha nai haʻo fakataumuʻa ke ke tokoni? Kae hili iá, kuo tuʻo fiha nai ha toe hū mai ha meʻa ia he lolotonga ʻo e ʻahó peá ke tuku ai ke fai e tokoní ʻe ha taha kehe, mo ke ongoʻi “sai pē, he kuo pau pē ke tokoniʻi ʻe ha taha ʻa e fie maʻu ko iá.”
ʻOku tau femoʻuekina pē he moʻumoʻua ʻetau moʻuí. Ka, kapau ne tau kiʻi tuʻu ʻo sio fakalelei ki he meʻa ʻoku tau faí, te tau ala ʻiloʻi … kuo fuʻu tuʻolahi ʻetau fakamoleki e konga lahi taha ʻo hotau taimí ʻi he tokangaʻi ʻo e ngaahi meʻa ʻoku ʻikai fuʻu mahuʻinga fēfē ʻi he fakahokohoko ʻo e ngaahi meʻá, pea liʻaki ai ʻa e ngaahi ngāue ʻoku mahuʻinga angé. …
ʻOku ʻākilotoa kitautolu ʻe ha niʻihi ʻoku nau fie maʻu ʻetau tokangá, fakalotolahí, ʻetau poupoú, fakafiemālié, ʻetau angaʻofá—ʻo tatau ai pē pe ko ha mēmipa kinautolu ʻo e fāmilí, kaungāmeʻa, maheni pe ko ha muli. Ko e toʻukupu kitautolu ʻo e ʻEikí ʻi he funga ʻo e māmaní, kuo fekauʻi mai ke tau tokoniʻi mo hiki hake ʻEne fānaú. ʻOku fakafalala mai kiate kitautolu taki taha. …
ʻOfa ke mahuhuhuhu ki hotau laumālié ʻa e fakalea ʻo ha himi ʻiloa … :
Kuó u fai ha lelei ʻi he māmaní?
Pe kuó u fai nai ha tokoni?
Ke fiefia ai ʻa e loto mamahí,
Ka ʻikai, kuó u vaivai.
ʻE maʻamaʻa pē ʻa e haʻamongá
Ke ngāue loto tahá
Pe kuó u fakamoʻui nai ha mahaki?
Ne fie maʻu pe kuo ʻi ai?
“[Kuó u Fai Ha Lelei?” Ngaahi Himi, fika 129].
… ʻOfa ke tau fai kiate kitautolu ʻa e fehuʻi … : “Ko e hā kuó u fai maʻa ha taha he ʻahó ni?” Ko ʻeku faleʻi ki he kāingalotu he funga ʻo māmaní, ke mou kumi ha taha ʻoku faingataʻaʻia pe puke pe taʻelata, pea fai ha meʻa maʻana he ʻahó ni.