ʻIloʻi Kimuʻa Peá ke Toki ʻAlú: Papitaiso ʻi he Temipalé
ʻOku ʻikai fie maʻu ia ke toe tatali. ʻE lava ʻa e kāingalotu moʻui taau kotoa, kau ai e toʻu tupú mo e kaingalotu foʻoú, ʻo ngāue ʻi he temipalé he taimí ni.
Naʻe pehē ʻe Palesiteni Hauati W. Hanitā (1907–95), “Tau hoko ko ha kāingalotu ʻalu ki he temipale mo ʻofa he temipalé.” “ʻOku totonu ke tau fakavavevave ki he tempalé ʻi he tuʻo lahi tahá … ʻo fakatatau mo e meʻa ʻoku lava ʻi hotau tūkungá fakatāutahá. ʻOku ʻikai totonu ke tau ō pē maʻa hotau kāinga kuo pekiá ka koeʻuhí foki ko e tāpuaki fakafoʻituitui ʻo e moihū ʻi he temipalé, pea mo e māʻoniʻoni mo e malu ʻoku ʻi loto ʻi he ngaahi holisi toputapu mo ʻosi fakatapui ko iá” (“A Temple-Motivated People,” Ensign, Feb. 1995, 5).
ʻOku kaunga ʻa e faleʻi ko ʻení ki he kāingalotu kotoa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní—tatau ai pē kapau ko ha mēmipa toki papi kimuí ni mai. ʻOku ʻikai ha vahaʻa taimi tatali ia ka ke toki lava ʻo ʻalu ki he temipalé, kehe pē ke ke moʻui taau. Ko e hili pē ho papitaiso mo hilifakinimá, te ke lava ʻo maʻu ha lekomeni temipale fakangatangata.
ʻOku fakaʻatā koe ʻe he lekomeni ko ʻení ke ke hū ki he temipalé ke papitaiso mo hilifakinima fakafofonga maʻá e ngaahi kui kuo pekiá. ʻI hoʻo ngāue mo lotu ʻi he temipalé, te ke lava ai ke fakamālohia hoʻo fakamoʻoni ki he ongoongoleleí.
Naʻe pehē ʻe Natalia Lolena mei ʻĀsenitiná fekauʻaki mo ʻene fuofua aʻusia ʻi he temipalé, “Naʻá ku siofi ha papitaiso ʻo ha tangata ʻi he faiʻanga papitaiso ʻo e temipalé, ʻi heʻene fakafofongaʻi ʻeku kui tangatá mo e ngaahi tuongaʻane ʻeku faʻeé. Hili iá pea papitaiso au maʻa ʻeku kui fefiné mo e ngaahi tokoua ʻo ʻeku faʻeé. Ko e fiefia naʻá ku maʻú naʻe taʻeʻamanekina. Ne tō e loʻimatá mei hoku fofongá, pea naʻá ku ongoʻi ha māfana ʻi hoku lotó kuo teʻeki pehē kimuʻa. ʻOku tatali ha ngaahi tāpuaki tatau pehē kiate kinautolu ʻoku taau mo nau fakaʻaongaʻi e ngaahi lekomeni temipale fakangatangatá.