Tali mei he Kau Taki ʻo e Siasí
Founga ke ʻIlo ai ʻIate koe Peé
Mei ha polokalama Mata ki he Mata ʻi Māʻasi 2017 pea mo Palesiteni Henelī B. ʻAealingi mo ʻEletā Sefilī R. Hōlani.
Siʻoma ngaahi kaumeʻa kei talavou, ko ʻema fakaʻamu kiate kimoutolú takitaha, ke mou ʻiloʻi ʻiate kimoutolu pē, ʻo tauʻatāina mei ha toe taha, ʻoku moʻoni e ʻOtua ʻo e langí, ʻokú Ne ʻafioʻi koe, pea kuo fai ha fakalelei ʻe Hono ʻAló maʻá e ngaahi angahala ʻa māmaní.
Ko ʻema fakaʻānauá ke ke maʻu ʻiate koe pē ha fakamoʻoni taʻeueʻia ʻoku ʻosi fakafoki fakaʻosi mai e ongoongolelei ʻo Sīsū Kalaisí ki māmani. Naʻe mahuʻinga e misiona ʻo Siosefa Sāmitá, ka kuo hoko ʻene lotu fakatōkilaló ko ha sīpinga ʻaonga kiate koe mo au. Naʻe ʻalu ʻa Siosefa ki he vao ʻakaú ke lotu ʻi he tui ʻe ala tali ʻe ha ʻOtua ʻofa ʻa ʻene lotú mo veteange ʻene puputuʻú. Naʻá ne maʻu ʻa e fakamoʻoni ko iá ʻaki hono lau e folofola ʻa e ʻOtuá mo maʻu ha fakamoʻoni ʻoku moʻoni. Naʻe toe lotu fakamātoato foki ʻa Siosefa ke fanongo pea talangofua neongo pe ko e hā ʻe hokó. Naʻá ne tukupā ke ngāue ʻi ha meʻa pē ʻe fakahoko mai ʻe he ʻOtuá kiate ia.
ʻOku ou fie fakahoko atu ha tukupā ʻi he laumālie ko iá, ki he toʻu tupu ʻo e Siasí. Ko e tukupaá ʻeni: ʻai ke ke ʻiloʻi ʻiate koe pē ʻoku moʻoni ʻa e ngaahi meʻá ni. Te ke lava ʻo fai ʻeni ʻaki haʻo muimui ʻi he sīpinga ʻa Siosefa Sāmitá: ako ʻa e folofolá, pea tuku ke tōkakano ʻa e leá ki ho lotó, fakakaukau ki ai mo toutou fai ia, pea toki fehuʻi ki he ʻOtuá, ʻi he loto fiemālie—moʻoni, ke tali ʻEne fakahinohinó, ke fai pē Hono finangaló.
Neongo ʻe ongo e tukupaá ni ʻo hangē ha fakaafe maʻamaʻá, ka ʻoku ou palōmesi atu ʻe ala fie maʻu ha ngāue lahi fau. He ʻikai ke u lava au ʻo palōmesi atu ʻe maʻu hoʻo talí ʻi ha ʻaho pē taha pe uike, ka te u lava ʻo palōmesi atu ʻe folofola atu ʻa e ʻOtuá kiate koe ʻi Heʻene founga pē ʻAʻana pea ʻi Hono taimi pē ʻOʻona, kapau te ke kole ʻi he tuí. Te ke fakatokangaʻi ʻi hoʻo tali mo ngāueʻi ʻa e fakaafe ko ʻení, he ʻikai ngata pē ʻi hono maʻu ʻo e talí, ka te ke toe fokotuʻu foki ai ha sīpinga ki he maʻu ʻo e ʻilo fakalaumālie te ne tāpuakiʻi koe he toenga ʻo hoʻo moʻuí.