Elder Patrick Kearon

A o auauna atu o se Peresitene o le Eria o Europa, sa molimauina e Elder Patrick Kearon le malaga a tagata sulufai e toa lua miliona mai Sasae Tutotonu na faatamaia e le taua i le saogalemu i Europa. “Ina ua maea ona vaai i o latou fofoga ma faalogo i o latou tala, o o latou matata’u na latou sosola ese mai ai ma le malaga lamatia e saili se sulufaiga, o le a ou lē toe avea ma tagata na i ai muamua,” o lana tala lea. “E musuia le molimauina o mea ua foai ma le limafoai e tagata o le Ekalesia mai le lalolagi e fesoasoani ai i nei tagata ma aiga o e ua aveesea le tele o mea.”

O Elder Kearon, sa lagolagoina o se Pulega Aoao o Fitugafulu i le aso 3 Aperila, 2010, sa valaauina i le Au Peresitene o Fitugafulu i le aso 1 Aokuso, 2017.

Sa soifua mai Elder Kearon i Carlisle, Cumberland, i Egelani, ia Iulai 1961, ia Paddy ma Patricia Kearon. A o tautua lona tama i le Ea fosi a le British Royal, sa a’otauina Elder Kearon i Sasae Tutotonu ma le Malo o Peretania.

A o suesue i le Ekalesia, sa ia tau ai i se mau i le Tusi a Mamona lea e faitauina faapea, “Ua ola tagata ina ia latou maua le olioli” (2 Nifae 2:25). “Na tagitagi pea lena mau i o’u taliga,” o le saunoaga lea a Elder Kearon. “Na ou vaaia ia i latou na ou feiloai i ai, le auala e matua faaleleia ai o tatou olaga e ala i le mulimuli i aoaoga a le Faaola ina ia loto tetele.” Sa ia auai i le Ekalesia i le Vaeluapo o le Kerisimasi o le 1987.

Sa la feiloai ma Carole Hulme a o aoga Carole i Egelani ma le Iunivesite o Polika Iaga. Sa la faaipoipo i le Malumalu o Kalefoni Oaklana i le 1991, ma aumau ai i Egelani seia oo i lana valaauga i le 2010. O i la’ua o matua o se fanau e toafa.

Sa ia nofo ma galue ai i le Malo Aufaatasi, Saudi Arabia, ma le Iunaite Setete i pisinisi eseese, e aofia ai tausiga faalesoifua maloloina, meaai, femalagaaiga, ma pisinisi tautaavale, ma faia sana ia lava kamupani tau fesootaiga. O lona auai i le lotoifale ma faalenuu na aofia ai auaunaga i puleaga o auaunaga alofa, o se aoga, ma se kamupani, ma se kolisi.

Sa auauna atu Elder Kearon i le tele o valaauga o le Ekalesia, e aofia ai le avea ma se failautusi fesoasoani o le uarota, peresitene o Alii Talavou a se uarota, fesoasoani i le au epikopo, peresitene o le paranesi, peresitene o le siteki, ma le Fitugafulu Eria.