Fesoasoani i Taimi o Faalavelave

I le mavae ai o se afa fulifao ma lologa matautia i Houston, Texas, ISA, sa vaaia e se loomatua ni Au Paia o Aso e Gata Ai mitiafu sasama Lima Fesoasoani i lo latou ala e fesoasoani i tagata na aafia i le faatamaiaga. “Sa ou iloaina e o mai le au Mamona!” o lana tala lea.

O lenei mea na tupu, na lipotia i se tusiga i le Facebook e peresitene o le Misiona a Texas Houston i Saute, o Aaron T. Hall, ua faailoa mai ai le auala e o mai ai le Ekalesia e fesoasoani uma i tagata ma tuaoi i taimi o faalavelave. “E leai se luitau e silisili tele mo tagata o le Ekalesia a le Alii!” Na tusia a Peresitene Hall.

A tupu se mala, e masani ona i ai le Ekalesia i [vaega] e tali atu muamua, ma i eria na aafia, e masani ona faaauau pea le fesoasoani agaalofa i taimi o le toe faamalosia i taimi pupuu ma taimi uumi, faatasi ai ma le sini o le atiaeina o le ola tutoatasi. E galulue faatasi taitai i le lotoifale ma le laumua o le Ekalesia i le iloiloina ma le sauniaina mo manaoga ma i le faatulagaina o tagata e fesoasoani atu i le auina atu o punaoa, faamamaina, toefuataiga, ma le toe fausiaina.

E ala i Auaunaga Limafoai a le AAG ma le faigapaaga ma toomaga i eria na aafia, e lei leva atu ona saunia e le Ekalesia le fesoasoani i tagata na aafia i lologa i Peru; papala solo i lalo i Sierra Leone; afisasao i Montana, ISA, ma Alberta, Kanata; afa fulifao i Texas, Florida, ma le atu Karipeane, e aofia ai Puerto Rico, Haiti, ma le Ripapelika Temokarasi; ma mafuie malolosi e lua i Mekisiko.

Ia Setema, sa fofogaina e le Ekalesia le tuuina atu o le I.S. $11 miliona e lagolago ai le toomaga faatino o le oge ma fafaga ai fanau fiaaai i atunuu e valu i Aferika ma Sasae Tutotonu. Ua faipaaga le Auaunaga Limafoai a le AAG ma faalapotopotoga e 11 i galuega faatino e 25 e auina atu le fesoasoani.

Ua saunia e le Auaunaga Limafoai a le AAG le toeitiiti $2 piliona e fesoasoani ai i le faitau miliona o tagata i atunuu e 189 talu mai le 1985, e amata i le toomaga na tuuina atu i tagata na aafia i le oge i Ethiopia.