O Perofeta, Aposetolo e Auauna Atu i le Lalolagi Atoa

Ua valaauina perofeta ma aposetolo o ni “molimau faapitoa o le igoa o Keriso i le lalolagi atoa” (MF&F 107:23). O nisi nei o gaoioiga talu mai le konafesi aoao ia Aperila.

Sa faamanatuina ma le filemu e Peresitene Thomas S. Monson lona aso soifua lona 90 i Iuta, ISA, i le aso 21 o Aokuso. Sa ia toe taua se moomooga o le aso fanau sa ia faailoa mai i le taimi muamua, o le meaalofa sili e mafai ona ia maua e mo tagata ina ia “saili se tasi o loo feagai ma se taimi faigata pe o ma’i pe o tuuatoatasi ma faia se mea mo i latou.”

I Hamilitone, Niusila, sa faapaia ai e Peresitene Henry B. Eyring ia fale i le Temple View, sa avea muamua ma lotoa o le Kolisi o le Ekalesia a Niusila. I le mavae ai o le Afa Fulifao o Irma, sa ia asia ai Puerto Rico, Saint Thomas, ma volenitia a le Ekalesia na fesoasoani i taumafaiga faamama i Florida, ISA.

Na asia e Peresitene Dieter F. Uchtdorf Texas, ISA, ma molimauina au o Au Paia o Aso e Gata Ai o loo galulue sosoo tauau ma o latou tuaoi i le mavae ai o le Afa Fulifao o Harvey, na fai mai o le uiga “fesoasoani i le mea ou te mafaia” ua taatele i Au Paia o Aso e Gata Ai i le lalolagi atoa.

Sa tuuina atu e Peresitene Russell M. Nelson i le kovana o Nebraska, ISA, se tuufaatasiga o talafaasolopito o aiga, asia taitai ma faifeautalai i Niu Ioka, ISA, ma tau atu i tagata aooga o le inisitituti i Iuta o le Tusi Paia e “tumu i valoaga e uiga … i le Toefuataiga.”

Ina ua maea le asiasi atu i tagata o le Ekalesia i Iapani ma Korea, sa saunoa mai Elder Dallin H. Oaks, “E silafia e le Alii Lana fanau. Na te silafia o latou tulaga ma popolega ma e agalelei i Lona alofa.” I se talanoaga Faafesagai i Korea, sa ia tali atu ai i fesili mai le autalavou. Sa ia feiloai i minisita sa nafa ma le Olimipeka 2020 a Tokyo. Ma i le talosaga a le peresitene o Peru, sa feiloai atu ai Elder Oaks ina ia talia le agaga faafetai a le peresitene mo le fesoasoani a le Ekalesia i le taimi o lologa.

I Iuta, sa uunaia e Elder Ballard talavou nofofua matutua e tausia le Sapati o “se taimi matagofie ma faamamaluina” ma ia suesue i mataupu faavae autu ma aoaoga faavae o le Ekalesia. Sa ia tau atu i tagata faigaluega o le malumalu o malumalu ua fausia i le taimi nei o le a faaaogaina i le taimi o le Meleniuma. Faatasi ai ma Elder Ronald A. Rasband, sa ia asiasi atu i Texas e faamalosiau i volenitia na faamamaina mea na faaleagaina o le afa fulifao ma lologa.

Sa maua e Elder Robert D. Hales le Pioneers of Progress President’s Award mai se faalapotopotoga o le nuu i Iuta. “Ina ia mafai ona fesoasoani i le tasi ma le isi, ia siitia le tasi ma le isi, o le faamalolosia o le tasi ma le isi o le uiga silisili, ou te manatu ai, o le avea ai o se paionia,” o lana tala lea.

I Rusia ma Iukureini, sa aoao ai e Elder Jeffrey R. Holland o le olaga e tatau ona i ai tofotofoga, ae e saunia e le talalelei le vaaiga, faamoemoe, ma le faamalosiauga. I le Konafesi Lona Lua o Windsor e uiga i Sauaga Faalelotu i Egelani, sa ia fai mai e fesoasoani le faatuatua i le toatele o tagata e toefotuai mai tulaga o tagata sulufai ma saofaga atu i le lalolagi. I le mavae ai o le konafesi, sa ia ofo atu le fautuaga i tagata o le Ekalesia, peresitene o misiona, ma faifeautalai i Potukale ma Sepania.

Sa asia e Elder David A. Bednar atunuu e tolu o Aferika i Sisifo e lei asia talu ai nei e se Aposetolo: Senegal, lea sa ia tuuina atu ai se tatalo o le toe faapaiaga; Guinea; ma Mali. Sa ia feiloai foi ma tagata o le ekalesia i Nigeria ma Kana. I le taimi o se faigalotu i le lalolagi atoa na fatuina mai Karolaina i Matu, ISA, sa ia uunaia talavou matutua ia avea ma “sootaga mau” i o latou filifili o aiga e faavavau.

Sa feiloai Elder Quentin L. Cook i tagata o le ekalesia ma faifeautalai i Taiuani, Hong Kong, Initia, ma Taialani, ma matauina “o tagata o le ekalesia o loo fiafia e uiga i le Ekalesia, ma le taulai atu i le malumalu ma galuega faafaifeautalai.” I New Jersey, ISA, sa ia saunoa ai i le Semina a le Seymour Inisitituti i Saolotoga Faalelotu. “E tatau ona tatou faaauau pea a tatou taumafaiga faifai pea ma taua e faateleina le amio mama ma puipuia aiga,” o lana tala lea. I Kalefonia, ISA, sa ia uunaia sosaiete o tulafono i tagata o le ekalesia e faatumauina ai le faatuatua ma le paleni i o latou olaga ma ia puipuia ai saolotoga faalelotu.

I Ekuatoa ma Colombia, sa aoao e Elder D. Todd Christofferson, o le talitonu i le Toetu o Keriso o le a faamafanafana ai ma lagolagoina i tatou. I Initia, sa ia talia se Taui o le Filemu i le Lalolagi e fai ma sui o le Ekalesia ma tuuina atu kopi o le Tusi a Mamona i le faaNepali i le peresitene ma le sui peresitene o Nepali ma i le Paranesi o Kathmandu.

O le tele o masina a o lei oo i afa fulifao ma lologa, sa asia ai e Elder Neil L. Andersen Puerto Rico, Haiti, ma le Dominican Republic, ma talanoa atu e uiga i le ola tutoatasi, aotauina, ma le saunia e maua sauniga o le malumalu. I le Po Aotauina o Aiga AAG i le Iunivesite o le Setete o Arisona i Arisona, ISA, sa ia uunaia Au Paia o Aso e Gata Ai e “tatala a tatou faitotoa, talisapaia talitonuga a isi tagata, [ma] aoao atili e uiga i ai.” Sa fatuina e Elder Andersen le siteki lona 100 i Filipaina ma faapaiaina le faaopoopoga o le nofoaga autu e aoao ai faifeautalai i Manila.

I Aferika i Saute ma le Ripapelika Temokarasi o Congo, sa matauina ai e Elder Ronald A. Rasband faatasi ai ma malumalu e tolu o loo faagaoioia i Aferika ma leisi lima o loo fausiaina pe ua faalauiloa mai, “ua saunia e le Alii tagata Aferika ina ia maua uma Ana faamanuiaga.”

Sa asia e Elder Gary E. Stevenson Vanuatu, Ausetalia, Niusila, Farani Polenisia, ma le Iunivesite o Polika Iaga–Hawaii i Hawaii, ISA. “A o tatou … vaai atu i a tatou luitau e ala i tioata o le talalelei, o le a tatou maua tali lea e aumaia ia i tatou le fiafia ma le olioli,” o lana tala lea. Sa ia feiloai i le peresitene ma le palemia o Vanuatu ma le akiepikopo o Papeete, Tahiti.

Sa asia e Elder Dale G. Renlund malo e lima ia Iuni: Kuatemala, Costa Rica, El Salvador, Nicaragua, ma Honduras, e faatulagaina le uluai siteki faaQ’eqchi’ i Kuatemala ma auai i se konafesi o le saolotoga o tapuaiga ma se konafesi a le autalavou. Ia Aokuso, o ia ma lona faletua, o Sister Ruth L. Renlund, sa auai i le uluai gaoioiga Face to Face na fatuina mai Accra, Kana, ma ia Setema sa ia faamalosiau atu i tagata aooga i le Iunivesite o Polika Iaga–Idaho i Idaho, ISA, ina ia faalagolago i le aoaoga faavae o Keriso.