Unimwaane Carlos A. Godoy

Ni banen te ririki n 1980 tabun, Unimwaane Carlos A. Godoy e a tibwa kerikaaki man nakoana ae te bitiobi. E a tia naba n angabeeba man te kaoreti, e mwakuri n te kambwana ae nakoraoi, ao n iangoia bwa e aki kona n raoiroi te maiu—ni karokoa e roko raoraona ni kawaria.

Raoraona anne e katekeraoia ma imwiina e titirakinna te titiraki are e tiku n aki karaua: “Ngkana ko reitinako ni maiuakina ane ko maiuakinna, e na kona ni kakoroaki bukin berita n am kakabwaia iroun te tamanuea?”

Unimwaane Godoy e ataia bwa e riai ni karaoa te bitaki ngkana e tangiria ni karekei ni kabane berita ake a anganaki n ana kakabwaia. Ibukin unna, e baireia bwa e na karekea ana mwatita tikuri. E kitana ana mwakuri, e kaboi nako ana bwai, ao, ma ana utu, a kitana Brazil ni kaea te reirei n te United States.

Unimwaane Godoy, e weteaki nakon te Beretitentii n te Itingaun ni Maati 31, 2018, e taku bwa te taneiai e reireinna n ae mwaiti taekan onimakinan ana baire te Uea ao ni karaoi bwaai aika e na aki mwengaraoi iai.

“I ataia ae iai ana babaire te Uea ibukira n te maiu aei,” e taekinna n te maungatabu ni kabuta n 2014. “E ataira. E ataa te bwai ae tamaroa ibukira. Tii ibukina ngkai a nakoraoi bwaai tiaki nanona bwa ti aki riai n iango n te tai teuana ma teuana ngkana iai te bwai ae tamaroa riki.”

Unimwaane Godoy e katabuaki bwa te Mataniwi ni Kabuta n te Itingaun n Eberi 5, 2008. E beku bwa te Beretitenti i Amerika Meangmaiaki ao e na moana ana mwakuri n te Beretitentii n te Itingaun n Aokati 1, 2018.

Imwain ana wewete nakon te Itingaun, Unimwaane Godoy e mwakuri bwa te manatia ibukiia taan mwakuri ibukin uoua bitineti aika bubura imwain ae wakina oin ana kambwana. E karekea ana baetira tikurii n te ikanaomiti ao te boritiko tiaienti mai São Paulo Pontifical Catholic Iuniwetiri n 1987 ao ana mwatita tikurii iaon anua inanon te bootaki man te Brigham Young Iuniwetiri n te 1994.

E a tia Unimwaane Godoy ni beku bwa te mitinare ae bwanin ana tai n te Brazil São Paulo South Mition, te bitiobi, kauntira ae rietaata, te tia tei ibukin te warebea, Itingaun n te Aono, ao te beretitenti n te Brazil Belém Mition.

E bungiaki i Porto Alegre, Brazil, n Beberuare 4, 1961. E mare ma Mônica Soares Brandao n Maati 1984, ao iai natiia aika aman.