Pagdagan sulod sa Simbahan
Daniel R. Thompson, California, USA
Paghulagway pinaagi ni Allen Garns
Usa ka adlaw, samtang nangita og dapit nga kadaganan, mihukom ko nga sulayan ang parking lot sa usa ka simbahan sa akong kasilinganan. Ganahan ko kay duna kini mga suga ug sementado. Akong nakita nga ang pagdagan og 10 ngadto sa 15 ka paglibut sa building mokompleto sa akong tulo ka milyas (4.8 km) nga ehersisyo.
Ang akong mga pagdagan sulod sa parking lot nagpadayon, duna usahay ug usahay wala, sulod sa tulo ka tuig. Sa matag karon ug unya, makakita ko og mga tawo sa parking lot tungod kay usahay modagan ko atol nga dunay mga serbisyo sa Simbahan ug sa ubang mga kalihokan.
Sa daghang higayon, duna koy impresyon nga kinahanglan kong makigsulti og tawo mahitungod sa Simbahan, apan wala ko kahibalo kon unsaon. Sa akong pagpauli gikan sa trabaho usa ka gabii, mihukom ko nga mohunong ug sa pagsusi kon duna ba koy makit-an nga tawo didto. Dihang misulod ko sa building sa simbahan, nakit-an nako ang mga misyonaryo dihang nahuman na sila nga mainterbyu sa ilang mission president. Akong gipaila ang akong kaugalingon ug nanglingkod mi sa foyer. Didto ko nila gitudloan sa unang leksyon sa ebanghelyo.
Human sa misunod nga pipila ka semana, padayon kong nakigkita sa mga misyonaryo. Dihang mitambong ko og sacrament meeting, ang mga miyembro sa ward mipakita kanako og gugma, pagdawat, pakigdait, ug pagdasig. Dihang akong gihunahuna unsay akong nakat-unan, akong naamguhan nga ang akong pagkakuryuso mahitungod sa Simbahan milambo sa panginahanglan nga ako modesisyon sa pagpabunyag. Akong gibati nga giaghat ko sa Espiritu sa paghimo unsay gusto sa akong Langitnong Amahan nga akong buhaton, apan padayon kong nanglimbasog sa desisyon. Sa katapusan, nabunyagan ko niadtong Nobyembre 2001, sa edad nga 36.
Ang akong desisyon sa pagdagan gamit ang parking lot sa simbahan daw dili talagsaon niadtong higayona. Apan miresulta kini sa kinadak-an nakong mga panalangin: nga mao ang akong pagkamiyembro sa Simbahan; pagkatagbo nako sa akong talagsaong asawa, si Jennefer; ug pagka-sealed ngadto niya alang sa karon ug sa kahangturan sa San Diego California Temple.
Mao nga, kon mahitabo nga makakita ka og tawo nga mag-exercise sa parking lot sa inyong meetinghouse, ipaila ang imong kaugalingon! Kinsay nahibalo—posibling siya ang mahimong pinakabag-ong miyembro sa imong ward!