7 Ka Tip sa Paghatag og Pakigpulong
Ang tagsulat nagpuyo sa Utah, USA.
Ang pagpamulong sa sacrament meeting sa dili madugay? Sulayi kini nga mga tip.
Ambut lang kaha kon ikaw, apan kon ako ang i-assign nga mamulong sa sacrament meeting, kulbaan gyud ko—dili mahitungod sa pagsulat sa pakigpulong apan sa aktwal nga paghatag sa pakigpulong. Ang kanunay nakong gikabalak-an mao ang, “Unsa kaha kon puol kong paminawon? Unsa kaha kon makalimtan nako unsay isulti? Unsa kaha kon sayop ang akong pagkalitok sa pulong?”
Mibati na ba kamo og sama niini? (Manghinaot ko nga dili kay ako ra.) Kon mao, dili diay kini ang kinangil-arang higayon! Susiha kining pito ka tip sa pagpalambo sa imong kahanas ug paghatag og makapa-interes nga pakigpulong.
Ang Pag-andam sa Pakigpulong
-
Gamita ang mga kasulatan ug mga pagtulun-an sa modernong mga propeta (tan-awa sa D&P 52:9). Mao kini ang sentro sa imong pakigpulong. Hinoon, usa kana sa pinakaunang rason nganong naa ta sa simbahan—aron makatudlo ug makakat-on sa ebanghelyo ni Jesukristo. Pwede nimong matun-an ang imong topic [hilisgutan] pinaagi sa tabang nga naa sa Giya sa mga Kasulatan (sa scriptures.lds.org) ug sa mga pakigpulong sa kinatibuk-ang komperensya (mag-search subay sa topic diha sa gc.lds.org). Siguroa nga masabtan nimo ang mga kasulatan ug mga gikutlo nga giplano nimong gamiton sa imong pakigpulong. Kon nagkinahanglan ka og tabang, hangyoa ang imong mga ginikanan o mga lider sa Simbahan.
-
Dapita ang Espiritu. Maayo kanunay nga ideya ang pag-ampo ug ang pagpangandam sa pagbaton sa Espiritu uban nimo samtang mamulong ka. Ang Espiritu dili lang mohatag og kahupayan sa imong nerbiyos, apan mopamatuod usab Siya sa kamatuoran (tan-awa sa D&P 42:14). Dapita ang Espiritu diha sa inyong miting sa sakrament pinaagi sa pagpamatuod bahin sa unsay gituohan nimong tinuod.
-
Maghunahuna og personal nga sugilanon. Usa sa pinakamaayong paagi sa paghimo og mga koneksyon sa uban mao ang pagpaambit og mga sugilanon. Gusto kitang makadungog sa mga kasinatian sa uban ug kon unsa ang ilang kinabuhi. Mao nga paningkamuti ang paghunahuna og usa ka makalingaw, lahi, o makahagit nimong kasinatian nga may kalabutan sa baruganan sa ebanghelyo nga gi-assign diha nimo nga maoy hisgutan. Unsay nakat-unan nimo gikan niana nga kasinatian? Sa unsang paagiha kini nakatabang kanimo? Usa kini ka maayo kaayong paagi sa pagsugod sa imong pakigpulong kon wala kay ideya kon unsaon sa pagsugod.
-
Magpraktis, magpraktis, magpraktis! Human nimo masulat ang imong pakigpulong, pwede nimo kining praktison sa pagsulti niini og kusog diha sa imong kaugalingon, ug dayon sa atubangan sa mga sakop sa pamilya o mga higala. Imong mahibaloan kon ang imong pakigpulong nasulod ba sa limit sa oras nga gihatag ug kon duna bay mga bahin nga kinahanglan nimong klaruhon. Kon OK ra sa imong bishop, pwede ra gani nga moadto ka sa simbahan sa dili pa ang pakigpulong aron sulayan ang pagpamulong gamit ang podium!
Paghatag sa Pakigpulong
-
Likayi ang pagsugod og “Dili gyud ko ganahang mamulong”. Kini nga matang sa sinugdanan makamugna og daghang hunahuna, apan kadaghanan sa mga tigpaminaw makabantay dayon niini. Sa kasagaran ingon og sama kini niini, “Dihang gitawag ko ni bishop nga naghangyo nga mamulong ko, misulay ko sa paghunahuna og mga ikabalibad.” Kadaghanan sa mga miyembro makasabut unsa kakulba ang pagpamulong, apan kon moingon ra ka og, “Dili gyud ko ganahang mamulong,” kay sabton kana sa mga tawo nga “Palihug ayaw ko ninyog panimawa.” Pinakamaayo nga likayan gayud kini isip sinugdanan—pagmadasigon sa imong topic!
-
Iklaro ang paglitok. Kasagaran gyud tungod sa kulba ang tawo mopaspas og sulti o hinay kaayong mosulti. Mouyon gyud ko niana! Apan importante ang klaro nga paglitok samtang mamulong ka aron masabtan ka sa kongregasyon. Paningkamuti gayud ang paghinay-hinay, lituka ang imong mga pulong, ug eksaktoha ang gikusgon sa imong tingog (oo, bisan dunay microphone, posible nga hinay ra gihapon kaayo). Ang mga tawo gustong maminaw unsay imong isulti!
-
Tan-aw kanunay sa atubangan og tarung. Ang pagtan-aw sa mga mata importante kaayo nga bahin sa maayong komunikasyon. Nagpakita kini nga tinuoray kang nakatutok ug interesado sa gihisgutan. Karon, sa tinuod dili nimo matan-aw sa mata ang tanang naa sa kongregasyon samtang mamulong ka, apan bisan og kanunay kang motan-aw og tarung sa unahan o sa luyo sa lawak, mas makapa-interes ka nga mamumulong. Likayi nga nagtutok ra ka permi sa imong mga kopya! Gustong makakita ang mga tigpaminaw sa imong pahiyom, dili sa alimpulo sa imong ulo.
Bisan niining pito ka tip, pwede gihapon kang masayop sa usa ka pulong o makabantay nga dunay naghagok sa ikatulo nga row. Apan nagpasabut ba kana nga ngil-ad kang mamumulong? Siyempre dili!
Kon daw dili na kaayo kita komportable, normal lang nga bation nato ang kanerbiyos o makahimo og gamayng sayop. Apan basta gihimo nimo ang tanan ug gidapit ang Espiritu, walay problema kon magkanga-kanga o makalimtan nimo ang ubang isulti. Nagbuhat ka sa buluhaton sa Dios ug nagtabang sa Iyang mga anak sa pagkat-on og daghan pa mahitungod sa ebanghelyo!
Kon motudlo ka ug mopamatuod kon unsay imong gituohan, ang tanan momaayo ra gayud.