Ang Basahon ni Mormon Makausab sa Kinabuhi
Kini nga mga kinabig nakapalambo og hugot nga pagtuo pinaagi sa pagbasa sa Basahon ni Mormon.
Paghulagway sa litrato pinaagi ni Cody Bell
Ang Basahon ni Mormon usa gayud ka gasa nga gitumong aron pagdala nato, ang mga anak sa Dios, ngadto sa kahibalo sa tinuod nga ebanghelyo ni Jesukristo. Si Enrique Serpa Bustamante, usa ka miyembro gikan sa Lima, Peru, naghunahuna sa Basahon ni Mormon isip mga sulat gikan sa usa ka mahigugmaong ginikanan: “Ang atong Langitnong Amahan misulat og ‘mga sulat’ pinaagi sa mga propeta, naghatag og mga tambag, kahupayan, ug giya alang sa atong kaayohan ug sa pagpanalangin nato sa tanang panahon. Maalamon kaayo Siya sa Iyang plano nga nakahibalo Siya unsaon sa paghatag nato niadtong mga sulat sa gugma ilabi na kon andam ang atong mga kasingkasing sa pagsabut sa Iyang mga panalangin ug sa Iyang ebanghelyo.”
Aniay pipila ka mga pagpamatuod gikan sa pipila ka mga kinabig sa tibuok kalibutan kon unsa ang mga pagtulun-an sa Basahon ni Mormon nga importante kaayo nila sa dihang nagkat-on sila mahitungod sa Simbahan.
Lain nga Tugon ni Jesukristo
Nakakita ko og kopya sa Basahon ni Mormon didto sa balay sa akong pag-umangkon sa Ibadan, Nigeria. Isip usa ka tawo nga himasa kaayo, nakuryuso ko sa pagsabut nganong nag-ingon ang basahon nga “lain nga tugon ni Jesukristo,” maong gikuha nako ang basahon ug gibasa kini.
Ang subtitle nga “lain nga tugon ni Jesukristo” nakapaabli sa akong hunahuna sa posibilidad sa usa ka Manluluwas sa tibuok kalibutan kay sa Manluluwas lang sa mga Israelite, nga niadtong higayuna usa sa akong dakong gikabalak-an. Ang Iyang pagbisita ngadto sa mga Nephite ug pag-establisar sa Iyang mga balaod ug mga ordinansa ngadto sa mga tawo nakadapit nako nga makahibalo pa og dugang mahitungod sa Iyang pangalagad.
Ang subtitle migiya nako nga makat-on pa og dugang mahitungod sa Simbahan. Nagsugod ko sa pagbati sa Espiritu samtang akong gisunod ang mga tambag nga gisulat sa Basahon ni Mormon, sama sa pag-ampo aron makahibalo sa kamatuoran alang sa akong kaugalingon (tan-awa sa Moroni 10:4). Karon nahibalo na ko nga buhi ang Manluluwas ug nahigugma kanatong tanan.
Ezekiel Akeh, Idaho, USA
1 Nephi 8—Bunga “labaw pa sa Tanan nga Ako Sukad Nakatilaw”
Sa 1 Nephi 8:11–12, gihulagway ni Lehi ang bunga sa kahoy sa kinabuhi nga “hilabihan ka tam-is, labaw sa tanan nga ako sukad nakatilaw. … Kini mipuno sa akong kalag sa tuman nga hingpit nga kalipay.” Sa akong pagbasa niini nga mga bersikulo, gibati nako nga kini nga bunga espesyal kaayo ug ako nagtinguha nga makabaton usab niini.
Gibati nako ang tumang empatiya alang ni Lehi. Naghunahuna ko kon unsa kaha kon ako pa si Lehi ug mitunga kini nga bunga, mobati ko og sama kaniya ug gusto gayud nga ang akong pamilya mokaon usab niini. Gibati nako nga tinuod kini alang nako tungod kay ang akong mga ginikanan dili pa mga miyembro sa Simbahan; mao nga bisan kon ako mobasa niini nga mga bersikulo karon, ingon og nagsulti kini unsay anaa sa akong kasingkasing.
Nasayud ko nga kini nga bunga espesyal, bisan sa wala pa ako masayud nga kini nagrepresentar sa gugma sa Dios ug sa Iyang ebanghelyo. Unya, sa dihang nakasabut na ko sa kahulugan sa bunga, naghunahuna ko mahitungod kon unsa ka sakto ang paghulagway niini diha sa mga kasulatan.
Ang mga kasulatan tinuod nga mga rekord sa kamatuoran gikan sa mga propeta ug anaa ang pulong sa Dios.
Eun Jin Yeom, Gyeonggi, South Korea
Jacob 5:74—Usa ka Tinguha sa Pag-alagad sa Dios
Sa dihang nagkat-on ko mahitungod sa Simbahan, nagbasa ko sa Jacob 5:74. Kanunay kong makahinumdom gikan sa panahon nga ako nakabasa niini. Aktibo kaayo ko nga miyembro sa akong unang simbahan sa akong tibuok kinabuhi ug kanunay adunay tinguha sa pag-alagad sa Dios. Naglaum gani ko nga magtuon og pilosopiya ug teyolohiya aron makaalagad Kaniya. Nakapasar na ko sa akong entrance exams aron moeskwela og pilosopiya.
Apan dili gayud nako makalimtan sa dihang una nakong nabasahan kana nga kasulatan. Nakahinumdom ko nga gabii kadto human una kong mitambong sa tulumanon sa LDS nga Simbahan. Atol sa usa ka mga break sa mga klase, nakita nako sa bulletin board ang pagpadayag nga nadawat ni Presidente Thomas S. Monson kabahin sa pagpaubos sa edad sa misyonaryo.
Sa dihang akong gibasa ang Jacob 5:74 nianang gabhiona, nasayud ko nga kinahanglan kong moalagad sa Dios. Ug tungod niini, nagtan-aw sa mga misyonaryo—kadtong duha ka batan-ong mga lalaki nga sama nako og edad—naghatag sa ilang mga kinabuhi alang Kaniya, nasayud ko nga kini ang angay nakong buhaton. Ang gabii sa wala pa ang tulumanon sa Simbahan, nakahukom ko nga magpabunyag. Ang gabii human sa tulumanon, nakahukom ko nga magmisyon. Miuli ko nga madungganon human makaalagad sa matahum nga katawhan sa Philippines Cebu East Mission.
Josef Gutierrez, Batangas, Philippines
Ang Basahon ni Enos—Kapasayloan sa mga Sala
Sa dihang una kong mibasa sa Basahon ni Mormon, wala ko makahibalo asa magsugod. Nakigbisog ko sa pagpasaylo, ilabi na sa pagpasaylo sa akong kaugalingon ug sa paghunahuna kon takus ba ako nga pasayloon. Usa sa mga sister missionary misulti nako nga ako makakuha sa tubag diha sa mga kasulatan ug nga kon wala ko mahibalo asa magsugod, kinahanglan kong mag-ampo mahitungod niini ug ang mga kasulatan nga akong gikinahanglan makita ra. Nakahukom ko nga mopakli ug mobasa diin ko mihunong—sa basahon ni Enos, mga bersikulo 4–6. Nasayud ko nga ang Basahon ni Mormon tinuod niana gayung higayuna human mobasa niini.
Jennifer Andreski, California, USA
Mosiah 27—Ang Oportunidad sa Kausaban
Sa una nakong pagbasa sa Basahon ni Mormon, ang seksyon sa Basahon ni Mormon nga akong giganahan pag-ayo mao ang anaa sa Mosiah sa dihang ang anak nga lalaki ni Alma misalikway sa Simbahan ug naningkamot sa paglaglag niini. Apan dihay dakong kausaban kaniya—gibati niya ang Espiritu Santo ug nausab ngadto sa usa ka tumutuo. Ganahan kaayo ko niana tungod kay ang oportunidad nga mausab kinahanglang ihatag ngadto sa tanan.
Maria Gracia Henrique Gonzalez, Maule, Chile
Mosiah 27:28–29—Kalipay ug Katubsanan
Isip usa ka bag-ong miyembro, nadasig ko sa Mosiah 27:28–29. Ako kaniadto—ug ako sa gihapon—mapasalamaton kaayo nga ang Ginoo nalooy nako ug mitubos nako gikan sa makasasala nga kinabuhi. Sa wala pa ang akong bunyag, nagtuo ko nga ako malipayon, apan walay ikatandi sa kalipay nga akong gibati sa dihang gidawat nako ang gipahiuli nga ebanghelyo. Wala gyud ko mibati og sama nga pagsalig ug sigurado kaayo nga usa ka mahayag nga kaugmaon ang nagpaabut.
Human modawat sa pagdapit ni Alma “duol ug pagpabunyag ngadto sa paghinulsol, nga kamo usab mahimo nga tig-ambit sa bunga sa kahoy sa kinabuhi.” (Alma 5:62), nakasinati ko og makahupay ug malinawon nga kaluwasan sama ni Alma ang Batan-on sa dihang misulat siya: “Ako diha sa kinangitngitan nga bahin sa kahiladman; apan karon ako nakakita sa kahibulongan nga kahayag sa Dios. Ang akong kalag giuyog uban sa walay katapusan nga paghasol; apan ako gisakmit, ug ang akong kalag wala na mag-antus” (Mosiah 27:29). Kini nga tudling nakatabang nako nga makasabut nga ang akong bag-ong sinugdanan ug ang akong bag-ong nakaplagan nga kalipay naestablisar sa pagdawat nga si Jesukristo mao ang akong Manluluwas ug akong Manunubos. Karon ako mapasalamaton sa kahangturan nga ang akong Manluluwas mibayad sa bili sa kaangayan ug nagtugot nako, balik-balik, nga mobati nianang maong matubsanong gugma matag higayon nga ako maghinulsol.
Marie-Chantal Hogue, Ontario, Canada
Kana nga Gamayng Blue nga Libro
Nagdako ko sa India, diin didto akong natagboan ang mga misyonaryo ug unang pagsimba. Kadtong Dominggoha naatol nga Pasko sa Pagkabanhaw. Tungod sa iskedyul sa akong trabaho, wala ko makasayo sa pagsimba ug mitambong og klase sa Sunday School, diin usa sa mga misyonaryo ang nagtudlo sa leksyon. Mikutlo siya og mga kasulatan gikan sa blue nga libro nga sukad wala pa nako makita apan daw Biblia nga paminawon. Samtang nagtudlo siya, mibati ko og talagsaong pagbati sa akong kasingkasing nga ako nagkinahanglan usab nga makaangkon niini nga basahon.
Midiretso ko niya human sa klase ug gisultihan siya, “nagkinahanglan ko niana nga libro.” Tungod kay ang libro kaugalingon niya nga set sa kasulatan, dili niya kini ikahatag nako, apan gipatan-aw ko niya ug gipabatyag kini. Nakita nako ang gipabulawan nga mga pulong nga giimprinta sa atubang: “Ang Basahon ni Mormon.” Mibati na usab ako nga nagkinahanglan ko niini nga libro para sa akong kaugalingon. Gikuha sa misyonaryo ang akong address ug gisaaran nga dad-an ko niya og usa. Mao gyud, miadto ang mga misyonaryo sa akong balay pagkahuman niana ug gihatagan ko sa akong kaugalingong kopya sa Basahon ni Mormon. Didto dayon ila kong gisugdan sa pagtudlo sa diskusyon.
Niadtong tuiga, ang Pasko sa Pagkabanhaw nagdala og dili katuohang panalangin sa akong kinabuhi: ang Basahon ni Mormon. Kadtong blue nga libro midala og madasigong kinaiya sa akong kinabuhi, ug nagpasalamat kaayo ko nga may kahigayunan ko nga makakat-on gikan niini.
Venu Bhaskar Nakka, California, USA