Mibati Ka Ba nga Walay Koneksyon? Sulayi ang Paghinay-hinay

Swerte lang alang kanato, ang paghulat sa tinuod nagkahimong susama sa mga makahadlok nga damgo: butang nga atong kahadlukan, apan butang nga wala nato masinati sa matag adlaw. Nagpuyo kita sa mga kapanahunan diin tagsa na lang kaayo kitang maghulat sa bisan unsa. Ang teknolohiya naghimo sa tanan nga hilabihan kapaspas diin sa kasagaran mubo na lang kaayo ang atong atensyon sa usa ka butang kay sa atensyon sa goldfish (oo, sa tinuod lang).¹ Kon ang panginahanglan sa paghulat motumaw, maningkamot kita sa pagpuno sa atong panahon—sa kasagaran sa pag-focus sa atong atensyon ngadto sa mobile device.

Walay sayop sa teknolohiya o kamapuslanon, apan ang paspas nga dagan sa kinabuhi ug padayong mga kasamok basin maoy magpugong kanato sa butang nga mas importante.

Dili pa lang dugay, wala kaayo ko mobati sa pagka-esprituhanon. Wala ko kasabut. Mosimba ko, mag-ampo ra og mubo, ug mopakli og kadiyot sa akong mga kasulatan. Panagsa mobati ko og espirituhanong mga pag-aghat, apan sa kinatibuk-an, mibati ko nga daw walay koneksyon.

Dihang gisugilon nako kini sa Langitnong Amahan sa mabalak-ong pag-ampo, kini nga mga pulong misulod sa akong hunahuna: “Humilum [ka] ug ilhon [mo] nga ako mao ang Dios” (Salmo 46:10).

Daw ang pulong nga humilom gihatagan og gibug-aton sa daghang pamaagi.

Posibling nagbuhat ko sa tanang eksakto nga butang, apan gihimo ko kini sa paspas ug mabaw nga focus. Ang pagsunod sa ebanghelyo gipahaum nako sa usa ka samok nga paagi.

Gani ang relihiyusong mga kalihokan dili maghatud kanako og lawom nga espirituhanong koneksyon sa Dios kon ang akong partisipasyon daklit ra ug anaa sa kasamok. Mas labaw pa kini kay sa usa ka matahum nga kasulatan. Aron makaila sa Dios ug makaangkon sa balaan, manuot-suot sa kahiladman nga kahibalo nga akong gipangandoy, kinahanglan akong maghinay-hinay ug maghilum.

Ang pagpatalinghug niana nga pag-aghat dili sayon. Apan naghimo kini sa tanang kalainan.

Gitudlo ni Nephi nga kadtong kinsa “sa makugihon nga paagi mangita makakaplag; ug ang mga misteryo sa Dios ipadayag ngadto kanila, pinaagi sa gahum sa Espiritu Santo” (1 Nephi 10:19; emphasis gidugang).

Tagsa-tagsaon nato kini sa pagsusi: Ang pagkat-on sa mga misteryo sa Dios nagkinahanglan og makugihon nga pagpangita. Usa kini ka padayon ug mainampingon nga kalihokan, dili kausa lang nga pag-search sa internet. Sunod, ang mga misteryo dili kay mokalit lang og tumaw; anam-anam kini nga ipakita. Kini nga proseso nagkinahanglan og panahon. Ug kana nga panahon delikado! Ang igahin natong panahon sa pagpamalandong ug pagpangita maghatag kanato og panahon sa pagkonektar sa Espiritu, kansang gahum ang tubag moabut.

Si Presidente David O. McKay (1873–1970) mipahayag nga ang pagpamalandong—“sa lawom, nagpadayong paghunahuna sa pipila ka relihiyoso nga tema”—maoy “usa sa … labing sagradong mga pultahan nga atong agian ngadto sa atubangan sa Ginoo.”² Pinaagi sa paghinay-hinay ablihan niya ang pultahan sa pagpadayag. Atong malantaw ang sayop nga mga tradisyon sa kalibutan ug makonektar kini sa mga butang nga balaan. Gikinahanglan nato kana nga pultahan. Kinahanglan kitang maghinay-hinay.

Para nako, ang paghinay-hinay nagpasabut sa pagluhod ug pagsulti og kusog samtang mag-ampo ko. Ang may pagtahud nga posisyon ug kaugalingon nakong mabati nga tingog nakatabang nga mas maka-focus ko. Ang paghinay-hinay nagpasabut sa pagtuon gikan gayud sa mga kasulatan ug paghimo og mga pahinumdom. Nagkinahanglan kini og paningkamot ug panahon, ug kanang nagtubo nga paningkamot ug panahon usa ka maayong paagi nga “mopukaw ug modasig sa inyong mga galamhan,” sa ingon niana nagtugot sa Espiritu ug sa tinguha alang sa kamatuoran nga “molihok diha kaninyo” ug ang binhi sa pagpamatuod “ mogamot, ug motubo, ug modala og bunga” (Alma 32:27, 37).

Makaplagan nato ang hapit tanang impormasyon pinaagi sa pipila ka pagpindot sa mga tuplukanan, apan ang espiritwal nga panabut ug pagkakabig nagkinahanglan og panahon ug makugihon nga paningkamot. Ang gihimo nimong paghinay-hinay ug paghalad sa imong paningkamot alang sa ebanghelyo dili maoy importante, ang importante mao nga imo lang gayud kining buhaton! Kon ihungit pa sa atoa ang impormasyon, giwagtang nato ang daghan sa atong personal nga partisipasyon sa kaugalingon natong pagkat-on. Atong giwagtang ang mga kahigayunan aron maadunay koneksyon sa Espiritu.

Sigurado nga pwede ra natong hangupon ang teknolohiya ug mga kalamboan nga magpasayon sa inadlawng mga buluhaton ug mahimo natong magamit ang atong panahon sa mas maayong paagi. Apan dili kita makatugot nga hangupon ang samok nga pagpakabuhi ug mabaw nga panghunahuna nga kasagarang nag-uban niini. Imbis nga likayan ang makaalarma nga panginahanglan sa paghulat, pwede natong hangupon kini isip oportunidad sa paghinay-hinay, pagpamalandong ug pagpalambo sa atong koneksyon uban sa Espiritu.