Ayaw Itugot nga Pakyas Kita sa Pagbati
Ni Elder Jorge F. Zeballos
Sa Seventy
Dunay pwersa nga mas gamhanan kay sa mga linog, mga hangin nga bangis, o nagdilaab nga mga kalayo. Apan usa kini ka ligdong ug hinagawhaw, ug kinahanglan natong hatagan sa pagtagad kon gusto kita nga kini mogiya kanato.
Mga Paghulagway pinaagi ni Irena Freitas
Niadtong Pebrero 27, 2010, sa alas 3:34 sa buntag, usa ka linog sa gikusgon nga 8.8 nga marka ang mitay-og sa Chile, nagmugna og kalisang, kahadlok, ug kabalaka sa minilyon nga katawhan.
Paglabay sa pipila ka adlaw, gi-assign ko nga mag-preside sa stake conference sa lokasyon nga duol sa nahitaboan niining grabe nga linog. Naghunahuna ko kon ang linog ug ang padayong mga aftershock makaapekto ba sa attendance sa komperensya. Natingala ko nga ang attendance sa matag sesyon sa komperensya mas daghan pa kay sa nangaging mga komperensya.
Maingon og ang linog mipahinumdom sa mga sakop sa stake, bisan sa temporal lang nga paagi, mahitungod sa kaimportante sa pagpaduol sa Dios, pagbalaan sa Igpapahulay, ug pagtambong og mga miting. Paglabay sa pipila ka semana akong gitawagan ang stake president. Nangutana ko kon ang attendance sa mga miting sa Simbahan taas ba gihapon. Mitubag siya nga samtang nagkadiyutay ang gidaghanon ug gikusgon sa mga aftershock, mao usab ang attendance sa simbahan.
Ang susamang kinaiya misunod sa subo nga hitabo nga mipahagsa sa World Trade Center sa New York, USA, niadtong Septyembre 2001. Liboan sa katawhan ang namalik og simba sa ilang mga simbahan sa pagpangita og kalinaw sa hunahuna ug kahupayan nga ila kaayong gikinahanglan. Apan paglabay sa panahon, kini nga pagpangita mikunhod ug ang mga butang mibalik sa normal. Dili ang mga linog, mga unos, o mga katalagman ug mga trahedya, natural man o hinimo sa tawo, ang makapalambo og pagtuo, pagpamatuod, ug malungtarong pagkakabig.
Si Elijah ug ang Ligdong, Hinagawhaw nga Tingog
Sa kapanahunan ni propeta Elijah, si Ahab maoy hari sa Israel. Gipakaslan ni Ahab si Jezebel, nga usa ka Phoenician nga prinsesa. Gipaila niya sa mga Israelite ang mga pamaagi sa Phoenicia, lakip ang pagsimba og mga dios-dios. Human gihagit ni Elijah ang daghang mga pari ni Baal nga didto sa korte ni Haring Ahab, gihulga ni Jezebel ang kinabuhi sa propeta ug mieskapo siya ngadto sa kamingawan. (Tan-awa sa 1 Mga Hari 18:4, 13, 19, 21–40; 19:1–4.)
Human gipakaon sa anghel didto sa kamingawan, naglakaw si Elijah sulod sa 40 ka adlaw ug 40 ka gabii padulong sa Bungtod sa Horeb (tan-awa sa 1 Mga Hari 19:5–8). Sa kamingawan, miabut kang Elijah ang pulong sa Ginoo. Gisultihan siya nga mogawas sa langob diin siya nagpalabay sa kagabhion. Samtang mibarug siya sa bungtod atubangan sa Ginoo, “daku ug makusog nga hangin” mihuros, sa grabing kakusog nga mibuak kini sa mga dagkong bato ug sa mga bukid, “apan si Jehovah wala diha sa hangin.” Dayon miabut ang linog, “apan si Jehova wala diha sa linog.” Dayon miabut ang kalayo, “apan si Jehova wala diha sa kalayo” (1 Mga Hari 19:11–12). Bisan sa kabangis sa hangin, linog, ug kalayo, dili kini mao ang pagpakita sa tingog sa Ginoo ngadto sa propeta.
Human niadtong kusog nga mga pagpahayag sa mga pwersa sa kinaiyahan, “usa ka malinawon nga diyutayng tingog” ang miabut kang Elijah, ug nadungog niya kini (tan-awa sa 1 Mga Hari 19:12–13). Ang makahupay nga tingog sa Ginoo nagsulti kaniya kon si kinsa ang dihugan isip sunod nga hari sa Syria, kinsa ang dihugan isip sunod nga hari sa Israel, ug kinahanglan nga iyang dihugan si Elisha isip propeta nga mopuli kaniya.
Pagpangita sa Tingog
Ang mao gihapong tingog nga miabut kang Elijah—ang tingog nga nagsulti niya unsay buhaton atol sa lisud nga panahon sa iyang kinabuhi ug pangalagad—anaa gihapon sa matag anak sa Dios kinsa sinserong mobuhat sa kabubut-on sa Amahan. Apan taliwala sa daghang alingugngog, kalibutanong mga tingog nga nagdapit kanato sa pagbiyahe sa ngitngit ug makalibug nga mga dalan, asa man nato makaplagi ang hinay, hinagawhaw nga tingog nga magsulti kanato kon unsay buhaton, unsay isulti ug unsay gusto sa Dios nga atong maabut?
Si Nephi mitambag kanato sa “pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton” (2 Nephi 32:3).
Ug asa man nato makaplagi ang mga pulong ni Kristo aron magbusog kita niini? Makapangita kita sa mga kasulatan, ilabi na sa Basahon ni Mormon, nga gisulat ug gipreserba uban sa kaputli niini alang kanato, nga mga lumulupyo niini nga henerasyon. Mopatalinghug usab kita sa mga pulong sa modernong mga propeta, kinsa mosulti kanato sa mga tinguha sa atong Mahangturong Amahan ug sa atong Manluluwas nga si Jesukristo karon.
Ang mga pulong sa buhing mga propeta mogiya kanato kon mag-atubang kita og bag-o ug komplikadong mga hagit. Sa bag-o lang nga mga katuigan, sama pananglit, samtang ang nagpatigbabaw nga kalibug sa kalibutan ug mga pilosopiya niini nagtinguha kanunay sa pag-usab sa konsepto sa kaminyoon ug pamilya, ang mga pulong sa mga propeta sa lig-on, maisugon, ug mapinanggaong paagi mipasabut og maayo sa sagradong matang sa pamilya, nagpahayag nga “ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak.”1
Gipanghingusgan usab sa mga propeta karon ug mga apostoles ang kaimportante sa pagbalaan sa Igpapahulay sa panimalay ug sa simbahan ug pagkab-ot sa kaluwasan sa atong mga katigulangan pinaagi sa family history ug buhat sa templo. Sa matag kinatibuk-ang komperensya, naghatag sila og dugang espiritwal nga giya alang sa Simbahan.
Ang Espiritu Santo Moggiya Kanimo
Midugang pa sa pagtudlo si Nephi nga, “Kon kamo mosulod pinaagi sa agianan, ug modawat sa Espiritu Santo, kini mopakita nganha kaninyo sa tanan nga mga butang nga kinahanglan inyong buhaton” (2 Nephi 32:5). Mao nga, kay gidugangan pa ang pagpasabut sa kaimportante sa pagpangita sa mga pulong ni Kristo, karon gitudloan kita ni Nephi bahin sa himoon natong direkta nga komunikasyon sa Espiritu Santo, ang ikatulong sakop sa Dios nga Kapangulohan.
Si Nephi nahibalo gayud sa tukma kon unsay iyang gihisgutan. Mga 30 o 40 ka tuig sa una, samtang ang iyang pamilya didto pa sa disyerto ug nagtukod og barko nga modala kanila ngadto sa gisaad nga yuta, gibadlong ni Nephi ang iyang mga magulang nga igsoon tungod sa paghimo og mga sala, bisan human nakadungog sa tingog sa anghel.
Miingon si Nephi kanila, “Kamo dali nga mobuhat og kadautan apan dugay nga mahinumdom sa Ginoo nga inyong Dios. Kamo nakakita og usa ka anghel, ug siya namulong nganha kaninyo; oo, kamo nakadungog sa iyang tingog matag karon ug unya; ug siya nakapamulong nganha kaninyo sa usa ka hinay nga hinagawhaw nga tingog, apan kamo ingon sa walay pagbati, mao nga kamo dili makabati sa iyang mga pulong; busa, siya nakapamulong nganha kaninyo sama ngadto sa tingog sa dugdog, nga mao ang hinungdan sa pagkauyog sa yuta ingon og kini mabuak” (1 Nephi 17:45).
Dili Kita Mohunong sa Pagbati
Ang komunikasyon sa Dios sa Iyang mga anak sa kasagaran moabut pinaagi sa Espiritu Santo, kinsa sa kasagaran makigsulti kanato sa usa ka tingog nga mosulod sa atong mga hunahuna ug kasingkasing, “ang ligdong nga hinagawhaw nga tingog, nga naghong-hong ngadto ug midulot sa tanan nga mga butang” (D&P 85:6). Paminawon nato ang malumo nga tingog ug dili maghulat hangtud nga may tawo nga mamulong kanato sa tingog nga sama sa usa ka dalugdog! Hinumdumi, nakakat-on si Elijah nga ang tingog sa Ginoo wala sa hangin, linog, o kalayo. Namulong ang Ginoo kaniya pinaagi sa Espiritu Santo, usa ka ligdong, hinagawhaw nga tingog.
“Ang tingog sa Espiritu moabut isip usa ka pagbati kay sa usa ka tingog,” miingon si Presidente Boyd K. Packer (1924–2015), Presidente sa Korum sa Napulog Duha ka mga Apostoles. “Kamo makakat-on, sama nako, sa ‘pagpaminaw’ niana nga tingog nga mabati imbis nga madungog. …
“…Usa kini ka espirituhanong tingog nga mosantup sa inyong hunahuna samtang ang panabut o pagbati ibutang sa inyong kasingkasing.”2
Bation nato ang mga pulong gikan sa Espiritu Santo, labaw kay sa atong mabati sa atong mga dalunggan, sa atong hunahuna ug kasingkasing. Ayaw itugot nga pakyas kita sa pagbati niana nga mga pag-aghat! Unta ablihan nato ang atong hunahuna ug kasingkasing aron madawat ang mga pulong sa mga propeta. Unta atong tugutan ang Espiritu Santo nga magpadayon sa pagtudlo kanato pinaagi sa ligdong, hinagawhaw nga tingog. Nagtudlo sa Iyang mga disipulo mahitungod sa Espiritu Santo, nga ipadala ngadto kanila human sa Iyang pagbiya, gisultihan sila sa Manluluwas, “Apan ang Manlalaban, nga mao ang Espiritu Santo, nga sa akong ngalan igapadala sa Amahan, siya ang magatudlo kaninyo sa tanang butang, ug magapahinumdom kaninyo” (Juan 14:26).
Ang matag takus nga miyembro sa Ang Simbahan ni Jesukristo sa mga Santos sa Ulahing mga Adlaw dunay katungod ug panalangin sa pagkadawat og personal nga giya, inspirasyon, ug personal nga pagpadayag gikan sa langit pinaagi sa Espiritu Santo.
Si Presidente Thomas S. Monson (1927–2018) miingon: “Himoa nga maimpluwensya kamo sa hinay, hinagawhaw nga tingog. Hinumdumi nga ang may awtoridad nga tawo mipandong sa inyong ulo sa pagkumpirmar kaninyo ug miingon, ‘Dawata ang Espiritu Santo.’ Ablihi ang inyong kasingkasing, bisan ang inyong espiritu, alang nianang espesyal nga tingog nga nagpamatuod sa kamatuoran. Sigun sa gisaad ni propeta Isaias, ‘Ang imong igdulungog makadungog sa usa ka pulong … magaingon, Kini mao ang dalan, lumakaw kamo diha niana’ [Isaias 30:21].”3