Mālō e Lelei mei Mekisikou!
Ko Mako au. Pea ko Paolo au. ʻOkú ma folau ki ha fonua kehekehe he māhina kotoa ke ako fekauʻaki mo e fānau ʻa e ʻOtuá ʻi he funga ʻo e māmaní. Kau fakataha mo kimaua ʻi heʻemau ʻaʻahi ki Mekisikoú!
ʻOku tuʻu ʻa Mekisikou ʻi ʻAmelika Tokelau. ʻOku laka hake ʻi he kakai ʻe toko 120 milioná ʻi ai. ʻOku feʻunga mo ha kāingalotu ʻe toko 1.5 miliona ʻo e Siasí ʻi aí.
Ko e lea tuʻufonua ʻa Mekisikoú ʻa e lea faka-Sipēnisí. Ko ʻeni ha Tohi ʻa Molomona ʻi he lea faka-Sipēnisí. Mateʻi mai angé? ʻI he lea faka-Sipēnisí, ʻoku ʻuhinga ʻa e hingoa ʻo e palōfita ko ʻAlamaá ko e moʻoniʻi laumālie.
ʻOku mahuʻinga ʻaupito ʻa e fāmilí ki he kakai ʻi Mekisikoú. ʻOku faʻa fakatahataha ʻa e ngaahi fāmilí ʻi he ngaahi ʻaho mālōloó ke nau fiefia. ʻOku tā ʻe he fānau ko ʻení ha piñata kuo fakafonu ʻaki ʻa e fuaʻiʻakaú mo e lole!
ʻOkú ke ʻilo naʻe fuofua ngaohi ʻa e sokoletí ʻi Mekisikou? ʻOku kau ʻa e sokoletí ʻi he ngaahi meʻa ʻoku ngaohiʻaki e mole poblano. ʻOku kau ʻi he soosi ko ení ʻa e polo, nati, fuaʻiʻakau, mo e sipaisi ¡Delicioso!
ʻOkú ke saiʻia ʻi he fútbol? Ko e sipoti manakoa taha ia ʻi Mekisikoú!
ʻOku ʻi ai ha temipale ʻe 13 ʻi Mekisikou. Ko ʻeni ha ngaahi tā ʻo e ngaahi temipale fakaʻofoʻofa ʻi Mekisikou Siti mo Tihuana.
Feʻiloaki mo e niʻihi hotau ngaahi kaungāmeʻa mei Mekisikoú!
“ʻI he ʻaho ʻe taha, naʻá ku fetaulaki ai mo ha palopalema lahi, peá u ongoʻi loto mamahi ʻaupito. Naʻá ku ʻalu ki he lotú peá u fanongo ki he ngaahi fakamoʻoni kau kia Sīsuú. Naʻá ku ongoʻi ʻa e Laumālie Māʻoniʻoní, pea naʻá ne ngaohi au ke u fiefia. ʻOku ou ʻilo naʻe tokoniʻi au ʻe he Tamai Hēvaní ke u fiefia.” Abby D., taʻu 7, Puepilā, Mekisikou
“ʻOku ou ʻilo ʻoku folofola ʻa e Tamai Hēvaní ki he palōfitá ʻi he ngaahi ʻahó ni ʻo hangē ko ia naʻá Ne fai ʻi he kuohilí. Kapau te u fakafanongo mo muimui ki he palōfitá, e fai tāpuekina au, pea ʻe tokoni ia kiate au ke u hoko ʻo hangē ko Sīsū Kalaisí.” Benjamin D., taʻu 9, Puepilā, Mekisikou
Fakamālō atu ʻi hoʻo fononga mo kimautolu ki Mekisikoú. Tau toki sio!