Te ke Lava Moʻoni ʻo Fai ha Ngāue Lelei Lahi
Fai ʻe ʻEletā Eduardo Gavarret
ʻO e Kau Fitungofulú
Mei he lea ʻi ha fakataha lotu ne fakahoko ʻi he ʻUnivēsiti ʻo Pilikihami ʻIongí–ʻAitahō ʻi he ʻaho 16 ʻo Mē, 2017, “… Ka ko Au mo Hoku Falé, Te mau Tauhi kia Sihova.”
ʻOku ou fie talaatu kiate kimoutolu ko e kau moʻungaʻi tangatá mo e kau moʻungaʻi fefiné ʻoku nau ʻi heni. Pea ko kimoutolu ia. ʻOku ou tui fakapapau ko e tuʻunga malava, mo e lotofalala ʻoku fie maʻu ke fakahoko ʻaki ha ngāue lelei pea fakahoko ʻa ia ʻoku ʻiloa ko e mālohi ʻo e toko tahá, ko e mālohi ke ngāué, ko e mālohi ke lea haké, ʻoku makatuʻunga ia ʻi he ʻilo ki he ongoongoleleí, pea toki hoko leva ha liliú, ʻoku ʻi heni ia; ʻoku ʻiate kimoutolu ia.
ʻIkai ko ha kau helo kitautolu ʻo ʻetau moʻui ʻi he maama fakalaumālié? Naʻa tau fakafepakiʻi kotoa ʻa Lusefā mo ʻene palaní. Naʻe fanauʻi kitautolu ko e kau ikuna, pea ʻoku tau kau ki he timi te nau ikuna ʻa e taú. ʻI he ʻilo leva ʻoku tau maʻu ko ení, kuo pau ke tau fai ha ngaahi fili ke tau ikunaʻi hotau ngaahi vaivaiʻangá pea tau laka atu kimuʻa mo e mata ʻoku hanga tāfataha ki he Tokotaha naʻá ne fakahaofi kitautolú.
ʻOua ʻe fili e hala ʻo e fakafiefiemālie koví, ʻa ia ʻoku haʻu mo e fakafiefiemālié mo e taʻetokangá. Tuiaki ke ke makehe; ngāueʻi ʻa e mālohi ʻoku ʻiate koé, pea fai ha ngāue lelei.
ʻOku lahi ha ngaahi taumuʻa fisifisimuʻa ke ke ngāueʻi. Hoko ko e taha ʻo kinautolu ʻoku nau tā e fihí pea fai ha ngāue lelei. Manatuʻi, ko e tokotaha ikuna koe, fanauʻi mai ko e taha ikuna. Te ke lava moʻoni ʻo fai ha ngāue lelei lahi.
Fili ha taumuʻa fisifisimuʻa maʻá e ʻEikí te ke lava ʻo ngāueʻi, pea fakaʻaongaʻi ki ai ho iví. ʻOku ʻi ai ha kakai ke tokoniʻi, ngaahi nima ke hiki hake, ngaahi tui vaivai ke fakamālohia, kau pōpula ke ʻahia mo fakahaofi, fiekaia ke fafanga, tēlefua ke fakakofuʻi, mo e mahakí ke fakamoʻui. Hiki hake ho leʻó. Faitotonu kiate koe pea mateaki līʻoa ki ho misioná.
“Ko e ‘ʻamanaki leleiʻanga kimoutolu ʻo ʻIsilelí.’ ʻOku hāngaifofonga hifo ʻa e ngaahi langí, pea ʻoku tatali mai ʻa e māmaní kiate koe.”1
Fokotuʻu hoʻo fuakava fakatāutaha mo Ia, ko hotau Fakamoʻuí, pea pehē, “Ka ko au mo hoku falé, te mau tauhi kia Sihova” (Siosiua 24:15). Pea ʻi heʻetau fai iá, ʻe fai tāpuekina ai foki mo e niʻihi kehé.