Faaeteete faasaga i le Faasamasamanoa

Sa i ai se taimi na ou vaaia ai i se faailoga i se faamalama o se faleoloa na faapea mai: “Fiafia, $15.00.” Sa matuai ou fia iloaina po o le a le tele o le fiafia e mafai ona ou faatauina i le $15.00 tala lea na ou alu ai i totonu e vaai. O mea sa ou maua o le tele o aitema taugofie ma suvania—e leai se mea se tasi na ou vaaia na mafai moni ona aumaia ia te a’u le ituaiga o fiafia lea na ta’u mai e le faailoga! I le aluga o tausaga, sa ou mafaufau i le tele o taimi e uiga i lena faailoga ma le faigofie o le mafai ona saili mo le fiafia i aitema e taugofie pe lē tumau. I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua faamanuiaina i tatou e iloa le auala ma le mea e maua ai le fiafia moni. E maua i le ola ma le faaeteete i le talalelei na faavaeina e lo tatou Alii ma le Faaola, o Iesu Keriso, ma i le taumafai e avea e pei o Ia.

E i ai sa ma uo pele o ia o se enisinia nofoaafi. I se tasi aso a o ia aveina se nofoaafi i lona ala, sa ia iloa atu se taavale o tu i luga o le auala nofoaafi i luma atu o ia. Sa vave ona ia iloa ua mau le taavale ma sa le mafai ona kolosi le auala. Sa vave ona ia tuuina le nofoaafi i le tulaga o faalavelave faafuasei, lea e mau ai taofi o loo i ai i pusa-taavale taitasi ia e oo atu i le tolu kuata maila i tua atu o le afi, o loo aveina se uta e 6,500 tane (5,897 meta tane). Sa leai se avanoa faaletino e mafai ai e le nofoaafi ona tu a o le’i taiaina le taavale, lea lava na taia. O le mea e lelei ai mo tagata sa i totonu o le taavale, sa latou lagona le lapataiga o le faaili a le nofoaafi ma sosola ese ai mai le taavale a o le’i feto’ai. A o talanoa le enisinia ma le leoleo suesue, sa alu atu se fafine ita ia i laua. Sa ia ‘e’ē atu sa ia vaaia le faalavelave atoa ma molimau atu sa le’i taumafai le enisinia e liliu ese ma le auala ina ia faamisi le taavale!

E manino lava, a na mafai e le enisinia ona liliu ma tuua le auala nofoaafi ina ia aloese ai mai le faalavelave, semanu e oti o ia ma maumau lana nofoaafi atoa i le oso ese mai le auala ma semanu e tu faafuasei le nofoaafi a o masau i luma. O le mea e lelei ai mo ia, o u’amea o le auala ia e alu ai i luga lana nofoaafi na taofimaua uili o le nofoaafi agai i luma i lona taunuuga e ui i le faafitauli sa i luga o lona auala. O le mea e lelei ai mo i tatou, o loo tatou i ai foi i luga o se auala, o se ala o feagaiga na tatou tuuto i ai ina ua papatisoina i tatou o ni tagata o Le Ekalesia a Iesu Keriso o le Au Paia o Aso e Gata Ai. E ui tatou te ono fetaiai ma faafitauli mai lea taimi i lea taimi i luga o le ala, ae o lenei ala o le a faatumauina lo tatou agai i luma i lo tatou taunuuga tauia e faavavau pe afai tatou te tumau mausali ai i luga.

Ata

O le faaaliga a Liae o le laau o le ola

Ua faaalia e le faaaliga o le laau o le ola ia i tatou le auala e mafai ai e aafiaga o le faasamasamanoa ona taitai ese i tatou mai le ala o feagaiga. Mafaufau i le āi u’amea ma le ala lauitiiti ma le vaapiapi, po o le ala o feagaiga, e taitai sa’o atu i le laau o le ola, lea o loo i ai faamanuiaga uma ua saunia e lo tatou Faaola ma Lana Togiola ma ua avanoa mo ē faamaoni. Na iloa foi i le faaaliga se vaitafe na faatusa i le eleelea o le lalolagi. Ua faamatala e tusitusiga paia o lenei vaitafe e “tafe ane” i le ala ae e na ona “latalata” i le laau, ae e le oo i le laau. Ua tumu le lalolagi i mea faalavefau ia e mafai ona taufaasese e oo lava i ē ua filifilia, ia latou faasamasamanoa i le ola ai i a latou feagaiga—lea e taitai atu ai i latou e latalata i le laau, ae e le oo i le laau. Afai tatou te lē faaeteete i le ola ai i a tatou feagaiga ma le sa’olele, e ono taitai atu e a tatou taumafaiga faasamasamanoa i tatou i ala faasaina po o le auai foi ma i latou ua ulu atu i le fale tele ma le ateatea. Afai tatou te lē faaeteete, e mafai foi ona tatou malelemo i le loloto o se vaitafe eleelea.¹

O loo i ai se auala faaeteete ma se auala faasamasamanoa e faia ai mea uma, e aofia ai le ola i le talalelei. A o tatou iloiloina la tatou tautinoga i le Faaola, o tatou faaeteete po o faasamasamanoa? Ona o lo tatou natura faaletino, pe tatou te le o fetuunaia ea a tatou amioga i nisi o taimi, e i ai taimi e faasino i a tatou amioga o loo feololo (e le lelei, e le leaga foi) pe ua fefiloi foi le mea lelei ma se mea e le lelei tele? Soo se taimi lava tatou te faapea atu ai, “ae ui i lea,” “sei vagana” po o le “ae peitai” pe a faatatau i le mulimuli i fautuaga a o tatou taitai perofeta po o le ola ai ma le faaeteete i le talalelei, ua tatou fai atu moni lava, “O lena fautuaga e le faatatau ia te a’u.” E le mafai ona tatou fetuutuunaia mea uma tatou te mananao i ai, ae o le mea moni, e leai ma se auala sa’o e fai ai le mea sese!

O le autu a le autalavou mo le 2019 ua aumai mai le Ioane 14:15, lea o loo aoao mai ai le Alii: “Afai tou te alofa mai ia te au, ia outou tausi mai i a’u poloaiga.” Afai tatou te alolofa ia te Ia e pei ona tatou folafola atu, e lē mafai la ona tatou faaalia lena alofa e ala i sina faaeteete atili i le ola ai i Ana poloaiga?

O le faaeteete i le ola ai i le talalelei e le faapea o le fiamamalu po o le fiatagata. Ae o lona uiga o le faatauagafau i o tatou mafaufauga ma amioga i le avea ai ma soo o Iesu Keriso. A o tatou mafaufau loloto i le eseesega i le va o le faaeteete ma le faasamasamanoa i lo tatou ola ai i le talalelei, o nisi nei o manatu e mafaufau i ai:

O tatou faaeteete ea i a tatou tapuaiga o le aso Sapati ma i a tatou sauniuniga e taumamafa i le faamanatuga i vaiaso taitasi?

E mafai ona tatou faaeteete atili i a tatou tatalo ma suesuega o tusitusiga paia po o le punouai mataalia atili i le Sau, Mulimuli Mai ia te Au—Mo Tagata Taitoatasi ma Aiga?

O tatou faaeteete ea i a tatou tapuaiga i le malumalu, ma pe o tatou ola ea ma le faaeteete ma le manatu tonu i feagaiga na tatou osia uma i le papatisoga ma i le malumalu? O tatou faaeteete ea i o tatou foliga vaaia ma tauagafau i o tatou laei, aemaise i nofoaga ma tulaga paia? O tatou faaeteete ea i le auala o tatou laeiina ai ofu malumalu paia? Pe o sitaili a le lalolagi na e faatonuina se uiga faasamasamanoa atili?

O tatou faaeteete ea i le auala o loo tatou auauna atu ai i isi ma i le auala o loo tatou faataunuuina ai o tatou valaauga i le Ekalesia, pe o tatou lē popole pe faasamasamanoa i o tatou valaauga e auauna atu?

O tatou faaeteete po o faasamasamanoa i mea tatou te faitau i ai ma mea tatou te matamata ai i luga o le TV ma i luga o a tatou masini feaveai? O tatou faaeteete ea i a tatou gagana? Pe o tatou taliaina faasamasamanoa gagana masoā ma pa’a’ā?

O loo i ai i le tamaitusi o le Mo Le Malosi o le Autalavou tulaga faatonuina ia, afai e mulimulitaia ma le faaeteete, o le a aumaia faamanuiaga silisili ma fesoasoani ia i tatou e tumau ai i luga o le ala o feagaiga. E ui sa tusia mo le manuia o le autalavou, ae o ona tulaga faatonuina e lē muta ai iina pe a tatou tuua polokalama a Alii Talavou ma Tamaitai Talavou. E faatatau ia i tatou taitoatasi i taimi uma. O se toe iloiloga o nei tulaga faatonuina e mafai ona musuia ai isi auala e mafai ai ona tatou faaeteete atili i lo tatou ola ai i le talalelei.

Tatou te lē tuua i lalo o tatou tulaga faatonuina ina ia faafetaui ai i isi pe ia lagona ai le toafimalie o se isi tagata. O tatou o soo o Iesu Keriso, ma i le avea ai ma soo, o le tatou tiute o le siitia o isi, siitia i latou i se nofoaga maualuga atu ma paia atu lea e mafai foi ona latou selesele ai i faamanuiaga silisili.

Ou te valaaulia i tatou taitoatasi ia saili atu i le taitaiga a le Agaga Paia ia iloa ai po o a fetuunaiga e manaomia ona tatou faia i o tatou olaga ina ia faaeteete atili e faaogatusa ma a tatou feagaiga. Ou te augani atu foi ia te outou ina ia ‘aua ne’i faitio i isi o loo i ai i lenei lava faigamalaga e tasi. “O le faamasinoga e a au ia, ua fetalai mai ai le Alii.”² O loo i ai taitoatasi i tatou i le faagasologa o le tuputupu a’e ma suiga.

O le tala ua faamatalaina i le Tusi a Mamona e uiga i le liliu ese o sa Amiliki, e mata’ina ia te a’u. I se auala e ta’u atu ai i isi ua lē toe fesootai i latou ma Iesu Keriso ma Lana Ekalesia, sa latou tuu ai se faailoga manino lanu mumu i o latou muaulu mo tagata uma e vaai i ai.³ I se auala faafeagai, ma i le avea ai ma soo o Iesu Keriso, e faapefea ona tatou faailogaina i tatou lava? E mafai ea e isi ona vaaiagofie Ona fofoga i o tatou foliga ma iloa po o ai o tatou sui ai e ala i le auala tatou te faatautaia ai ma le faaeteete o tatou olaga?

I le avea ai ma se nuu o le feagaiga, e le o faamoemoeina i tatou ia milo faatasi ma le lalolagi. Ua ta’ua i tatou o ni “tagata filifilia”⁴—e ma’eu lea faamamaluga! A o faateleina le taliaina e faatosinaga a le lalolagi o mea leaga, e tatau ona tatou tauivi ma le filiga atoa ia tumau mausali i luga o le ala lea e taitai atua i tatou ma le saogalemu i le Faaola, ma le faalauteleina o le mamao i le va o lo tatou ola i feagaiga ma faatosinaga faalelalolagi.

A o ou mafaufau i le mauaina o le fiafia tumau, ua ou iloa ai o nisi taimi tatou te taumafai ai e ta’uamiotonu a tatou filifiliga lē lelei. O puao o le pogisa e lē ma’alofia a o tatou malaga ai i luga o le ala o feagaiga. E mafai e faaosoosoga ma le faasamasamanoa ona uunaia i tatou e suia lemu lo tatou ala agai i le pogisa o le lalolagi ma ō ese mai le ala o feagaiga. Mo taimi atonu e tupu ai lenei mea, ua uunaia i tatou e lo tatou perofeta pele, o Peresitene Russell M. Nelson, ina ia toe foi mai i luga o le ala o feagaiga ma ia vave ona fai. E maeu lo’u faafetai mo le meaalofa o le salamo ma mo le mana o le Togiola a lo tatou Faaola.

E le mafai ona ola i se olaga atoatoa. E na o le tasi le tagata sa mafai ona soifua atoatoa a o i ai i luga o lenei paneta telesitila. O Iesu Keriso lea. E ui tatou te lē atoatoa, uso e ma tuagane, ae mafai ona tatou agavaa: agavaa e taumafa i le faamanatuga, agavaa mo faamanuiaga o le malumalu, ma agavaa e maua faaaliga faaletagata lava ia.

Sa molimau mai le Tupu o Peniamina e uiga i faamanuiaga ma le fiafia e oo mai ia i latou o ē mulimuli ma le faaeteete i le Faaola: “Ma e lē gata i lea, ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata.”⁵

E mafai ea ona faatau le fiafia i le $15.00 tala? Leai, e le mafai. E oo mai le fiafia loloto ma tumau e ala i le ola ai ma le manatu tonu ma le faaeteete i le talalelei a Iesu Keriso. I le suafa, o Iesu Keriso, amene.