Ua Fofogaina Mai Malumalu Fou e Valu, Toefaaleleia Malumalu Faasolopito
O malumalu o le vaitau o Paionia, e aofia ai le Malumalu o Sate Leki, o le a toefaafou, ma o le a fausia nisi malumalu fou se valu.
Na faaiu e Peresitene Russell M. Nelson le konafesi aoao ia Aperila 2019 i le fofogaina mai o malumalu fou e valu ma le toefaaleleia o malumalu e fa o le vaitau o paionia, e aofia ai isi faamatalaga e uiga i le toefaaleleia o le Malumalu a Sate Leki.
O le a fausia malumalu fou i Pago Pago, Amerika Samoa; Aai o Okinawa, Okinawa; Neiafu, Toga; Vanu o Tooele, Iuta; ISA; Moses Lake, Uosigitone, ISA; San Pedro Sula, Honduras; Antofagasta, Chile; ma Budapest, Hungary.
O fuafuaga mo se toefaaleleiga tele o le Malumalu o Sate Leki o le a aofia ai le toefaaleleia o le Lotoa o le Malumalu ma le palasa e sosoo ai e lataane i le Fale o le Ofisa o le Ekalesia i le Aai o Sate Leki, Iuta, ISA. O malumalu i St. George, Manti, ma Logan, Iuta, ISA, o le a toe faafou foi i se taimi lata mai. “O lenei galuega o le a manaomia ai ona tapunia malumalu taitasi mo se vaitaimi.” o le saunoaga lea a Peresitene Nelson. “E mafai e tagata o le Ekalesia ona faaauau pea ona olioli i tapuaiga i le malumalu ma auaunaga i isi malumalu o lata ane. A maea ia galuega faatino taitasi, o le a toefaapaiaina ia malumalu faasolopito taitasi.”
Talu mai le avea ai ma Peresitene o le Ekalesia ia Ianuari 2018, ua fofogaina mai e Peresitene Nelson malumalu fou e 27. Talu mai le konafesi aoao talu ai nei ia Oketopa 2018, ua faapaiaina malumalu i Roma, Italia; Barranquilla, Kolomupia; ma Concepción, Chile.