Galuega Faafaifeautalai: Faasoaina Atu o Mea o Loo i totonu o Lou Loto

Peitai, ae tatou te le’i taoina se keke, fai se patī, ma faamālō ia i tatou lava mo lenei manuia ofoofogia, o le a sili ona lelei lo tatou tuuina o lena tuputupu a’e i se vaaiga manino.

E masalo e fitu ma le afa piliona tagata i le lalolagi, e faatusatusa i sina 16 miliona tagata o Le Ekalesia a Iesu Keriso o le Au Paia o Aso e Gata Ai—o se tama’i lafu itiiti lava.¹

O le taimi lenei, o le aofai o tagata Kerisiano i nisi o vaega o le lalolagi ua faaitiitia.²

E oo lava i le Ekalesia toefuataiina a le Alii—e ui o loo faaauau pea ona tuputupu a’e le faitau aofai o tagata aoao—ua toatele tele tagata ua lē mauaina faamanuiaga o le auai faisoo i le Ekalesia.

I nisi upu, po o fea lava o e i ai i lenei lalolagi, e anoanoai avanoa e faasoa atu ai le tala fiafia³ o le talalelei a Iesu Keriso i tagata tou te feiloai i ai, aooga faatasi, ma nonofo faatasi pe faigaluega ma tafafao faatasi.

I le tausaga ua mavae, sa ou maua ai le avanoa fiafia ina ia auai punouai ai i gaoioiga a faifeautalai o le Ekalesia i le laolagi atoa. E tele lava ina ou mafaufau loloto ma tatalo e uiga i le poloaiga sili a le Faaola i Ona soo: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Alo, ma le Agaga Paia.”⁴

Sa ou tauivi ma le fesili “E mafai faapefea e i tatou, o tagata o le ekalesia ma soo o Keriso, ona faataunuuina sili lena poloaiga sili i o tatou olaga i aso taitasi?”

O le asō ou te valaaulia ai outou ia mafaufau loloto i lena fesili lava e tasi i lou loto ma le mafaufau.⁵

Ua faamamafa pea e taitai o le Ekalesia le valaau manino “O tagata uma o se faifeautalai!” mo le tele o tausaga.⁶

O tagata o le Ekalesia a Iesu Keriso—i taimi uma ua tuanai faapea ai ma o tatou taimi—ua faasoa atua ma le naunautai ma le olioli le talalelei i uo ma ē masani. E mumū o latou loto i le molimau ia Iesu Keriso, ma e latou te mananao faamaoni i isi ia lagonaina lea lava olioli e tasi ua latou mauaina i le talalelei a le Faaola.

O nisi tagata o le Ekalesia e foliga mai ua i ai se meaalofa mo lenei mausa. E fiafia i latou e avea ma amapasa o le talalelei. Latou te auauna atu ma le lototoa ma le fiafia ma taitai le galuega o ni faifeautalai o le au paia.

Peitai, o isi o i tatou e matua palaai lava. A talanoaina le galuega faafaifeautalai i fonotaga a le Ekalesia, e punonou lemu ifo a i lalo ulu seia oo ina leiloa atu i tua o nofoa, o mata ua sioa i tusitusiga paia pe moeiini foi ma mafaufau loloto ina ia aloese ai mata mai le vaai sao atu i isi tagata.

Aisea e fai ai lena mea? Atonu tatou te lagona le ta’usalaina mo le lē faia o nisi mea se tele atu e faasoa atu ai le talalelei. Masalo tatou te lagona le lē mautonu pe faapefea ona fai. Pe tatou te lagona foi le fefe e o ese atu i fafo i o tatou tulaga toafimalie.

Ou te malamalama i lenei mea.

Ae manatua, e le o manaomia lava e le Alii ni taumafaiga faafaifeautalai tomai faapitoa ma atoatoa. Ae, “e manaomia e le Alii le loto ma le mafaufau malie.”⁷

Afai o loo e fiafia lava i le faiga o le galuega faafaifeautalai, faamolemole faaauau pea, ma tu atu o se faataitaiga i isi. O le a faamanuia outou e le Alii.

Peitai, afai e te lagonaina ua tatoso ou vae pe a oo mai i le faasoaina atu o le savali o le talalelei, e mafai ona ou fautua atu ni mea se lima e lē ta’usalaina e mafai ona faia e soo se tasi e auai ai i le poloaiga sili a le Faaola e fesoasoani ai e faapotopoto Isaraelu?

Muamua, faalatalata i le Atua. O le poloaiga muamua ma le sili o le alofa lea i le Atua.⁸ O le mafuaaga autu lea ua tatou i ai i lenei lalolagi. Fesili ifo ia te oe lava ia, “Ou te talitonu moni ea i le Tama Faalelagi?”

“Ou te alofa ea ma faalagolago ia te Ia?”

O lou latalata atili i lo tatou Tama Faalelagi, o le susulu atili mai foi lena o Lona malamalama ma le olioli mai totonu ia te oe. O le a matauina e isi o loo i ai se mea tulagaese ma faapitoa e uiga ia te oe. Ma o le a latou fesili e uiga i lena mea.

Lua, faatumu lou loto i le alofa mo isi. O le poloaiga lona lua lena ma le sili.⁹ Taumafai ia vaai atu moni i tagata uma o siomia ai oe o se atalii o le Atua. Auauna atu ia i latou—e tusa lava pe i ai o latou igoa i lisi o uso po o tuafafine o auaunaga pe leai.

Taliē faatasi ma i latou. Olioli faatasi ma i latou. Fetagisi faatasi ma i latou. Faaaloalo ia i latou. Faamalolo, siitia, ma faamalolosia i latou.

Tauivi e faataitai le alofa o Keriso ma maua le agaalofa mo isi—e oo lava ia i latou e agaleaga atu ia te oe, o ē faatauemu atu ia te oe ma mananao e faamanua ia te oe. Alofa ia i latou ma taulima i latou o isi foi fanau a le Tama Faalelagi.

Tolu, tauivi e savavali i le ala o le avea ma soo. A o faalolotoina lou alofa mo le Atua ma Ana fanau, e faapena foi lou tautinoga e mulimuli ia Iesu Keriso.

E te aoao i Ona ala e ala i le taumafa fiafia i Ana afioga ma faalogo ma faaaoga aoaoga a perofeta ma aposetolo o aso nei. E te tuputupu a’e i le to’afimalie ma le lototele e mulimuli i Ona ala a o tatou fesootai ma le Tama Faalelagi i se loto aoaoina.

O le savali ai i le ala o le avea ma soo e manaomia ai faatinoga—i aso taitasi, sina mea itiiti, “alofa tunoa mo le alofa tunoa,”¹⁰ “i lea fuaiupu ma lea fuaiupu.”¹¹ O nisi taimi e lua laa i luma ma le laa e tasi i tua.

O le mea e taua ia e lē faavaivai; ia taumafai pea ia faia ia sa’o. O le a i’u lava ina e lelei atili, fiafia atili ma sili ona faamaoni. O le talanoa faatasi ma isi e uiga i lou faatuatuaga o le a oo ina avea ma natura masani. O le mea moni, o le talalelei o le a avea ma se vaega taua ma faapelepele o o outou olaga lea o le a lagona ai o se mea e le masani ai le lē talanoa i isi e uiga i le talalelei. Atonu e le tupu lena mea i se taimi vave—o se taumafaiga i le olaga atoa. Ae o le a tupu lava.

Fa, faasoaina atu o mea o loo i totonu o lou loto. Ou te le o fai atu e te alu e te tu i luga o le auala tele ma se sipika faaleotele leo ma faitau leotele ai fuaiupu o le Tusi a Mamona. O le mea o loo ou fai atu ai o lou tagai lea i taimi uma mo ni avanoa e talanoaina ai lou faatuatuaga i ni fesootaiga tupu fua ma masani ai ma tagata—faafesagai ma tagata faapea ai ma luga i le initoneti. O loo ou talosaga atu ia outou “tutu o ni molimau”¹² o le mana o le talalelei i taimi uma—ma pe a talafeagai ai, ia faaaoga upu.¹³

Ona “o le talalelei a Keriso … o le mana o le Atua i le olataga,” e mafai ona to’afimalie, lototetele, ma lotomaualalo pe a e faasoa atua.¹⁴ O le to’afimalie, lototele, ma le lotomaualalo atonu e foliga mai e pei o ni uiga feteenai, ae e leai. O loo atagia atu i nei uiga le valaaulia a le Faaola ia lē natiaina tulaga faatauaina o le talalelei ma mataupu faavae i lalo i le mea e tuu ai saito ae ia faasusulu atu lo outou malamalama, ina ia viia ai lo tatou Tama i le Lagi i a tatou galuega lelei.¹⁵

E tele lava auala masani ma tupu fua e faia ai lenei mea, mai faatinoga i aso taitasi o le agalelei i molimau a le tagata lava ia i luga o le YouTube, Facebook, Instagram, po o le Twitter i talanoaga faigofie ma tagata tou te fetaui i ai. O lenei tausaga o loo tatou aoaoina ai le Feagaiga Fou i totonu o o tatou aiga ma le Aoga Sa. Oka se avanoa inā ofoofogia o le valaauliaina o uo ma tuaoi e o mai i le lotu ma o outou aiga e aoao ai e uiga i le Faaola faatasi ma outou. Faasoa atu ia i latou le Gospel Library app, lea latou te maua ai le Sau, Mulimuli Mai ia te Au. Afai tou te iloaina ni autalavou ma o latou aiga, ave i ai le tamaitusi o le Mo le Malosi o le Autalavou, ma valaaulia i latou ia o mai e vaai pe o faapefea ona taumafai a tatou talavou e ola i na mataupu faavae.

Afai e fesili se tasi e uiga i le faaiuga o lou vaiaso, aua le faatuai ona talanoa i ai e uiga i mea e te lagonaina i le lotu. Faamatala i ai le fanau iti o ē tutū i luma o se faapotopotoga ma pepese ma le naunautai i le auala o loo latou taumafai ai ia pei o Iesu. Talanoa e uiga i le vaega o talavou o ē faaalu le taimi e fesoasoani ai i tagata āumatuā i nofoaga mo tagata matutua e tuufaatasi ni talaaga faaletagata lava ia. Talanoa e uiga i suiga talu ai nei i le faasologa o sauniga o le Aso Sa ma le auala ua faamanuiaina ai lou aiga. Pe faamalamalama atu i ai le mafuaaga tatou te faamamafaina ai o le Ekalesia lenei a Iesu Keriso ma o i tatou o le Au Paia o Aso e Gata Ai, e pei lava ona ta’ua foi tagata o le Ekalesia anamua o le Au Paia.

Po o a lava auala e foliga mai e tupu fua ma masani ai ia te oe, faasoa atu i tagata pe aisea e taua ai Iesu Keriso ma Lana Ekalesia ia te oe. Valaaulia i latou ia “omai ina matamata.”¹⁶ Ona uunaia lea o i latou e o mai ma fesoasoani. E anoanoai avanoa nei mo tagata e fesoasoani ai i le tatou Ekalesia.

Aua le tatalo mo na o faifeautalai ia mauaina ē filifilia. Tatalo i aso uma ma lou loto atoa ia e maua i latou o le a o mai inā matamata, o mai ma fesoasoani, ma o mai ma nonofo. Manatua ia faaauai pea faifeautalai faamisiona. E pei i latou o agelu, ua sauni e fesoasoani mai!

A o e faasoa atua le tala fiafia, ia e faia lava i le alofa ma le onosai. Afai o tatou fegalegaleai ma tagata ma se faamoemoega atoa o le a le pine ae latou ofuina se ofusoloatoa paepae ma fesili mai mo se faasinoala i le vai papatiso sili ona lata ane, o loo sese la le tatou faiga.

O nisi e o mai ma matamata masalo o le a lē auai lava i le Ekalesia; o nisi o le a auai i se taimi mulimuli ane. O le latou filifiliga lena. Ae lē faapea la e suia ai lo tatou alolofa mo i latou. Ma e lē suia ai a tatou taumafaiga naunautai e faaauau pea le valaauliaina o tagata taitoatasi ma aiga ia o mai inā matamata, o mai ma fesoasoani, ma o mai ma nonofomau.

Lima, faalagolago i le Alii ia galue Ana vavega. Ia e malamalama e le o sau galuega le liuaina o tagata. O le matafaioi lena a le Agaga Paia. O lau matafaioi o le faasoa atu o mea o loo i totonu o lou loto ma ola ia tutusa ma ou talitonuga.

O lea, aua ne’i e lotovaivai pe afai e lē taliaina vave e se tasi le savali o le talalelei. E le o se toilalo patino.

O le mea lena e i le va o le tagata ma le Tama Faalelagi.

Ae o oe, ia e alofa i le Atua ma ou tuaoi.

Talitonu, alofa, fai.

Mulimuli i lenei ala, ma o le a faia e le Atua ni vavega e ala atu ia te oe e manuia ai Lana fanau faapelepele.

O nei fautuaga e lima o le a fesoasoani ia te oe e fai ai mea na faia e soo o Iesu Keriso talu mai aso anamua. O Lana talalelei ma Lana Ekalesia o se vaega taua o lou olaga ma le tagata e i ai oe ma mea e te faia. O le mea lea, valaaulia isi ia o mai inā matamata ma o mai ma fesoasoani, ma o le a faia e le Atua Lana galuega laveai, ma o le a latou o mai ai ma nonofomau.

Atonu e te fesili, “Ae ā pe afai ou te faia nei mea uma ae lē lelei le tali mai o tagata? Ae ā pe afai e faitio i latou i le Ekalesia? Ae ā pe afai latou te lē toe fiauo ia te a’u?

Ioe, e ono tupu na mea. Talu mai aso anamua, sa sauaina lava soo o Iesu Keriso.¹⁷ Sa fai mai le Aposetolo o Peteru, “[Olioli a o] … tofusia outou faatasi i tiga o Keriso.”¹⁸ Sa olioli na uluai Au Paia “ina ua ta’uaogaina i latou ia [puapuagatia i le maasiasi] ona o lona suafa.”¹⁹

Manatua, e galue le Alii i auala faalilolilo. Atonu o lou tali atu FaaKeriso i se faatautee mai, e mafai ai ona faamalūlūina se loto ma’a’a.

I le avea ai ma se Aposetolo a le Alii o Iesu Keriso, ou te faamanuia ia te outou i le to’afimalie e avea ai ma se molimau ola o tulaga faatauaina o le talalelei, faatasi ma le lototele ina ia iloa ai oe i taimi uma o se tagata o Le Ekalesia a Iesu Keriso o le Au Paia o Aso e Gata Ai, faatasi ai ma le lotomaualalo e fesoasoani ai i Lana galuega e avea o se faailoaga o lou alofa mo le Tama Faalelagi ma Lana fanau.

A’u uo pele, o le a outou olioli i le iloaina o outou o se vaega taua i le faapotopotoina o Isaraelu ua loa ona muaita’u mai, sauniaina o le afio mai o Keriso i le “mana ma le mamalu tele; faatasi ai ma agelu paia uma.”²⁰

E silafia oe e le Tama Faalelagi. E alofa le Alii ia te oe. O le a faamanuia oe e le Atua. O lenei galuega ua faauuina e Ia. E mafai ona e faia lenei mea. E mafai ona tatou faia uma faatasi lenei mea.

Ou te molimau atu ai i le suafa o Iesu Keriso, amene.